كرونيك صراع مع القدر (باللهجة الجزائرية)🔥🔥

البارت 17

حلت عينيها لڨات حسام متحضنها ومحاصرها بين جسمو والشجرة
سارة : ح .... حسام
حسام حل عينيه والدمعة في شفارو تبسم بالسيف وڨالها : متخافيش راني هنا
سارة بلا ماتفيق تحضناتو وثم كانت الصدمة جبدت يديها معمرين بالدم .....
يديها ولاو يرجفوا وحدهم طلعت راسها ليه وعينيها معمرين دموع : ح...سام الرصا...صة جا...ت في...ك
حسام متبسم : لالا متخافيش جات في كتفي برك
حكمتلو سارة وجهو بين يديها ذبلت عينيها ندمانة ونطڨت : سامحني
حسام : مسامحة دنيا وآخرة جامي يغيضني الحال منك سمحيلي إلا غلطت معاك نحبك وبدا جسمو يترخى بين إيديها حتان طاح في الأرض شافت في ضهرو لڨات زوج رصاصات ماشي غير اللي في كتفو
طاحت على ركايبها تهز فيه وتبكي
سارة : حساااااااام لالا حسام متروحش تعيش حسام حل عينيك 😭 علاه كامل اللي عزاز عليا يروحو علااااه
طلعت راسها لڨات اللي ضرب حسام واقف ويتبسم وڨفت وعينيها ضلامو زيرت على يديها وهزت سلاح لڨاتو ثما تاع واحد من الموتى مسحت دموعها وصوبت السلاح فيه وطلڨت عليه رصاصة وحدة ڨاستو في رجلو تتفكر مليح كيما كان محمد يركب في سلاحو وعلمها بصح جامي سيات في حياتها تهز سلاح وتضرب بيه هاذي أول مرة ليها !!!

طاح من الضربة اللي جاتو في رجلو بصح ڨعد هاز سلاحو صوبو في سارة باش يقتلها بصح قبل ما يتحرك كانت جاتو رصاصة في الراس طاح ميت ثم
دارت سارة تشوف لڨاتو إيهاب تبسمتلو ممتنة ليه أنقذها اليوم مرتين !!
دارت لحسام فحصاتو وڨطعت تريكو تاعو ربطتلو بيه الجرح .... خلاتو مع إيهاب بعد ما وصاتو عليه وراحت لسيف لڨاتو جرح خفيف في رجلو الرصاصة عڨبت عليه برك .....

سيف وصحابو بالرغم مو أنو فقدوا خاوتهم وتجرحوا بزااف منهم بصح قدروا ينقذوا البنات ويحكموا الإرهابيين اللي خطفوهم .....
وصلوا سيارات الإسعاف وسارة شافت البنات هاذوك لڨاتهم ملاح بصح حالتهم النفسية سيئة ..
داو سيف والمصابين اللي بقاو وهزوا الموتى باش يدفنوهم كي شافت سارة معاهم أمين تشوكات باسكو دارت كلش باش تنقذوا وفي الاخير مات 😞 إيهاب تدمر كي شافو وسارة ڨاعدة تصبر فيه ومبعد راحت ركبت مع حسام في سيارة الإسعاف وعيطت لروان باش توجد غرفة العمليات

#بقلم : عائشة