كرونيك صراع مع القدر (باللهجة الجزائرية)🔥🔥

البارت 03

💔 أشتاق إليك أشتاق لعينيك و وجنتيك و شفتيك أشتاق إلى ضحكاتك و أنفاسك و عبراتك و حركاتك و لمساتك و نصائحك و حنانك أشتاق إلى كل تفصيلة فيك💔

عندها نص ساعة و هي ڨاعدة فوڨ السرير تتفكر تفكرت نهار خرجت هي وياه و ضحكوا و جراو و تفكرت نهار ودعها و راح للمهمة و من هاذيك خلاص كلش .......

مسحت دموعها اللي لڨاتهم يسيحوا وحدهم سلمت على الفوطو تاعو و خباتها و خرجت ......

راحت للكوزينة لڨات يماها ثما ڨاتلها :"
أقعدي تفطري بنتي ."

ڨاتلها سارة :"لالا ماما ضك نهبط نفطر مع سوزا."

هزت حبة ڨاطو و هبطت و يماها ڨعدت تدعيلها باسكو شافتها بلي وجهها مڨلب عرفتها بلي تفكرت محمد ....

هبطت سارة ديراكت لصالون الحلاقة تاع صحبتها.

-صباح الخير سوزا لباسووو؟!
سوزان :"صباح النور لباس الحمد لله ون... مع دارت و شافتها ڨطعت الكلمة ثم و راحت تجري ليها سارة حبي وشبيك كنتي تبكي ؟!"

سارة : "والو مابيا والو!!"

سوزان :"سارة متقلقينيش ڨولي وشبيك ؟!"

سارة : "محمد ..... اليوم كمل عليه عام ملي ما..... يخي علابالك مقدرتش نقولها ."

سوزان تحضنتها و ڨاتلها :" خلاص سارة هو راح خلاص مات ...."قاطعتها سارة ثم

- خلاص سوزا ربي يعيشك متكمليش و أنا راني رايحة نخدم و كون تسقسيك ماما عليا ڨوليلها فطرنا مع بعض و راحت .

سوزان :" منكذبش أنا على خالتي زينب أقعدي أفطري معايا صح و روحي ."

سارة : "سوزا و الله ما عندها منين تعڨب تعيشي متزيديش عليا راني رايحة تهلاي في روحك ."

راحت سارة ركبت في طوموبيلها و مشات هي تسوڨ و الدموع يسيحوا وحدهم، هزت يدها و مسحتهم .

وصلت للسبيطار اللي تخدم فيه هبطت و راحت لبست طابليتها و هبطت لڨاتهم يهدروا ثما، و الفرمليات يتخابروا سقسات روان صحبتها ڨاتلها:" جا طبيب جديد وتشوفييييه بقلاوة معسلة ."

ضحكت عليها سارة و راحت لڨات جماعة واڨفين ثما و واحد لابس طابلية عرفاتو بلي هذاك هو الطبيب اللي جا.......

دارت رايحة باش تشوف المرضى تاوعها و هي سمعت واحد منهم عيطلها بإسمها دارت ليه ڨالها:" سارة ختي وشراكي ؟!"

ڨاتلو :"آه أهلا سيف وش راك لباس ؟!"

سيف :" لباس الحمد لله ختي وشبيك تبانيلي ماكيش مليحة ."

سارة : "سيف يخي علبالك اليوم وشنهي ."

سيف بصوت حزين : "إيه علابالي على هذيك جيت وصلت حسام و ڨلت نهبط للمقبرة نشوف محمد و نروح ."