قصة بعنوان:#عروسي بقلم:#ساجدة_سجود (زيني حلا)

🔺الحلقة 9⁦🔺

🔺الحلقة 9⁦🔺
🔻عروسي..........#ساجدة_سجود🔻
بعد مرو ثلاث ساعات....
الوقت وقت تكوني مشغولة ومضغوطة ما تحسيش بيه وقتاه يفوت....وهذا لي كانو محسسينو دار لعروسة لي بداو يستقبلو في ضيوف...وكانت كلثوم لي تستقبل فيهم و ومروة تقدم ليهم في ضيافة واقفة جنب أمها لابسة حتى هي قفطان ازرق مزين بالدوري ... شعرها مسيباتو ومكياج ثقيل....مهزية سلة في يديها فيها ورود معمرة بالحلوة كل واحدة تسلم عليها تقدم ليها وحدة تحت ترحيب حار من كلثوم...ومباركة من ضيف....
في غرفة عروستنا ....واين كانت حتى هي مسلما روحها للماشطة تخدم ليها في شعرها وتحكي معها يفوتو في الوقت....
الماشطة:شعرك ارطب مشاء الله....
سجى:ايه حنا الكل شعورنا هكا خفيفة ورطبا...يقولو جينا لجداتي حتى هي شعرها كان هكا...
الماشطة:لازمك تبقي تهتمي بيه...شعرك من شعور لي مزيت بزااف اغسليه بشومپو لقارص...
سجى:حتى انا هذاك هو شومپو تاعي...على الله غير يجيب نتيجة...
الماشطة:لماتو ليها تضحك على كلامها...جاء وقت المكياج ....
دورتها عندها وبدأت تعمل ليها في المكياج لي يناسب اللبسة لولى لراح تحني فيها ... ومرة مرة يجبدو موضوع يحكو فيه....
لتحت واين الضيوف كثرو وكلثوم مرة تستقبل مع مروة ومرة يعطو عليها تروح وتخليها هي متكلفة.... لغناء مسموع ولي واقفة تشطح ولي واقفة تعمل في سلفي وهذي تسلم على جارتها....المهم دنيا زاهية ....والفرح بدأ والجو ولا احلى....وقت تسمع صوت تزمير طموبيلات معلنين على وصلو اهل لعريس اصطفو كلثوم وخالة وعمة سجى لكبار قدام الباب يستقبلو فيهم...نزلو كلهم وحدة تابعة لوخرى كانو محصورين كان في امو اختو نادية....مرت خوه لكبير صالح ....وخالتو وعمتو وبنات عماتو وخالتو.... حاضرين ...نزلو محملين بحوايج لعروسة واهم حاجة هي صندوق الحنة مهزياتو اختو....قربو من بالباب سلمو عليهم بالوحدة والضحكة على الوجه ولي تدخل تزغرد.....دخلوهم للخيمة لجهة الخاصة بيهم متقابلين مع المنصة واين راح تقعد لعروسة قريب منها....قعدو بعد ما نحو كلهم جلالبهم وهزو ليهم لفاليز تاعهم ادوها للغرفة الخاصة بتبديل....
الجو حلى لغناء مطلوق....وضياق كلثوم كل ماهم قاعدين يزيدو....الوقت يمشي والفرح حتى هو قاعد يفوت ....بعد ما رتاحو من الطريق وضيفوهم ...ولي جاتها على شطيح ناضت بردت قلبها ولي قاعدة تفوت في عينيها وتحسب وتهندس في كل شيء....واخيرا جاء الوقت لي تنزل فيه لعروسة تحني....ديما وقتها يكون مع قريب المغرب.....قبل ما يتحط لعشاء بشوي..
في غرفة سجى واين كانت لابسة لبسة التقليدية واقفة قدام لمراية تعمل في أخر لمسات ....واقفة جنبها كلثوم تحكي...
كلثوم:واش كملتي لازمك تنزلي...
الماشطة:واجدة الحاجة هاهي...
سجى:دارت شافت في أمها تحكي...واش شكون جاء فيهم...
كلثوم:كيف قالو لينا جاو هم بعد.... يلاه ابنتي انا نسبقك لتحت مشاء الله ...الله يحميك ابنيتي...
دارت قبل ما تنزل دمعتها وخرجت من عندها مخليا الماشطة تنزل لغطاء على وجهها وتحكم في يديها تعاون فيها تمشي....حتى نزلو وحدة وحدة تحت تزغريد ....حتى وقفت بعيد شوي على الدخلة ...لقات نادية اخت لعريس وبنت خالتو سلمو عليها ...ورجعت نادية دخلت بعد مخلات بنت خالتها معهم.هي لي راح تهز الشمعة من طرفهم ومن طرف لعروسة اختها نهى...تشعلو الشمعات ووقفت وحدة في جنبها ليمين ولوخرى في ليسار....وكملت خطواتها تحت تزغريد دخلت عليهم وكل واحد من الحضور قعد في بلاصتو ....قعدوها في بلاصتها والغناء مطلوق.... وكلثوم دور دور وتدعي ليها في قلبها ربي يحجبها من العين...قربت منها عزيزة واختو وعماتو وخالتو قعدو في كراسة قدام طاولة محطوطة قدام لعروسة محطوط عليها صندوق الخاص بالحنة....وجنبها لوخر امها وعماتها وخالتها ....فتحت نادية الصندوق كان فيه حوائج لحنة...الحنة...الزهر...الدراجي...صحن خاص واين تحط لحنة...قفزات تلبسهم بعد الحنة....وشمعات لي مهزينهم ليها....مخدة صغيرة تحط عليها يديها.... وقطن ...بداو يبلو في الحنة تحت انغام الغنية لي أغلبية يحنو عليها عندنا....
مدي يدك للحنة يا لالة...
طفلة صغيرة فرحانة....
مبروك عليك عروسة ....
والفرح مواتيك ربي يهنيك...
تعمر دارك....مدي يدك يا لالة ...
امك ناديها قبل ما تحني....بوسي ايديها...
عاشت فرحك تستنى...مدي يدك للحنة....
كاين بزاف غناء تحني عليه لعروسة ....منهم هذي.. كملت عروستنا حنتها وتشيد لي هي حنات على مقايس لويزة....وزوج لويزات في يديها ....ترمى دراجي على لحضور وكل عزبة تذوق منو حبة لعلى تلحقها....ترفع عليها لغطاء وبدات المباركات وتسليم وتصورا....من امو وامها حتى للباقي أفراد العائلة...
#يتبع