قصة بعنوان:#عروسي بقلم:#ساجدة_سجود (زيني حلا)

الحلقة 26⁦🔺

🔺الحلقة 26⁦🔺
🔻عروسي..........#ساجدة_سجود🔻
غابت الشمس معلنة على نهاية نهار اخر من حياتهم... وحل في بلاصتها ليل بعتمتو و سكنو....
كأي عائلة جزائرية بسيطة....ملمومين على طاولة لعشاء فرحانين ببنتهم...لي رجعت زينة قعدتهم....كل واحد فيهم يعامل فيها معاملة خاصة....واي حاجة قبل ما تحل عليها فمها يقربوها ليها....محبة صادقة بعيدة على التصنع ولا على الحقد....وحتى سجى فرحانة بمعاملاتهم... تعشاو واش قسم الله وناضو لبنات و معاهم حتى سجى لي عيات فيها كلثوم باه تقعد لكن والو حلفت حتى تمد يديها معاهم...ودارت ليها محاضرة طويلة عريضة مفادها انها ماشي غريبة وماشي ضيفة....هي بنت الدار واذا قاست الماء وعاونت خواتها ماشي راح ينقص منها والو.....
تعاونو على دنيا ولموها مع بعض خالقين جو مع بعضهم غير كملو تلمو في الشمبرة خاصة ب tv غير هم برك ومعهم كلثوم ...أما باباها راح رقد وخواتها خرجو يسهرو لبرأ ....دارو مسلسل و بقاو متبعينو حتى كمل عاد شافت مروة فيهم ونطقت بحماس..
مروة:ماما سجى عندها حوايج راح تشريهم وقاتلنا نخرجو غدوة نشاء الله واش قولتي...
كلثوم: شافت فيها تحكي...واش عندي ما نقول اخرجو مع اختكم أنا غير اعفوني....
نهى:علاه اماما وقت تخرجي معنا ولادك ماشي راح يبقاو يعسو علينا ويحسبو في الوقت....
سجى:حنا اصلا ما نطولوش نشري واش خاصني ونروحو ...غيري معنا جو ومشي رجليك شوي...
كلثوم:راجلك يخليك تخرجي انتي....
سجى:قوتلو قبيلا وقالي أخرجي ....
مروة:دورك ما بقى عندك ما تقولي....اصلا حنا لي ديما مخشيين في دار...
كلثوم:اسكتي اللفعة انتي كون نتبعوك من نحلو عينينا وحنا ندرو لبرأ حتى نرجعو نقفلوها في ليل....
مروة:رجعنا لنفس الهدرة....غير كملتها كانت كلاكيت عزيزة قريب لوجهها ....كون ماشي بعدت عليها مخليين سجى ونهى يضحكو عليهم....
عند داوود بعد كمل كلامو مع سجى دار بناقص من رقاد ناض هذي ساعة...دوش ولابس قميص وبقى حاكم المصحف يقرأ في القرآن حتى أذن المغرب عاد حطو من يديه وناض صلى صلاتو ...مزال يطوي في سجادة حتى سمع واحد يدق على الباب ....حطها من يده وخرج يشوف شكون....غير فتحو لقى خوه علاء الصغير فيهم الكل....حركلو راسو بمعنى خير...كان يسبح ما قدرش يحكي معه...
علاء:عزيزة قاتلك أهبط تتعشاء معنا...
داوود:كمل تسبيحو مع نهاية جملتو...شاف فيه وقال... كيفاه حتى شوفناك اسي علاء....
علاء: والله اخويا كون جيت مزال تروح لدار كون راك تصبح وتمسي على وجهي....بدلت السكنة ولينا قليل واين نتشاوفو...
داوود:راني ساكن فوقكم ماشي في اخر الدنيا كيف تطلع دق على باب خوك واش راح يوقع....
علاء:نحشم من مرتك....ما بقيتش وحدك دورك اخويا ...
داوود:جبد الباب قفلو بعد ما نحى منو المفتاح دار يديه على كتف خوه وهبطو...ماله قوتلي تحشم من سجى راهي قدك في العمر احمار ....علاه تحشم منها...
علاء:مزال ما تعودت عليها برك ...
داوود:تتعود إنشاء وقت تروح دير نهار واطلع عندي ...
علاء: خلاص نديرو نهار ونطلعو نتعرفو على مرت خويا زوينة....
داوود:ضربو لراسو من لوراء...احترم روحك ابغل..
دخلو على عزيزة للكوزينة واين كانت العائلة مجموعين يتعشاو ....غير شفاتو نطقت...
عزيزة:مرحبا بولدي تفضل...
علي:ترحبي بطفل في دارو أقعد اولدي ...
حرك ليه رأسو وقعد ناضت هي سربات ليه ولعلاء ورجعت قعدت هي كملت مكلاتها....حتى واحد ما قال كلمة...حتى كملو وناضو بالوحد من راجلها لولادها بقى كان داوود شافت ولقاتها فرصة نطق..
عزيزة: والدي توحشتي مكلات ماماك ...تقول ما كنتش تاكل في الماكلة...
داوود:لا نأكل الحمدلله سجى ما مخليا ما تعمل كل مرة محطيا ليا ماكلة في شكل...ما تغديتش مليح على هذي ....
عزيزة:وايني سجى عندها سمانتين ونص راحت لدارهم مخلياتك أنت وحدك...
داوود:نمنعوها حتى على دارهم....اي نادية طالعة هابطة عليك الوليدة....
عزيزة:علاه مراكش تهدر مع اختك روحت مقلقة منك...
داوود:تتقلق ولا تضرب رأسها مع الحيط...خوها لكبير أنا احترم مرتي من احترامي ....اذا هي هانتها شكون يحترمها ماله....وقت تجي عندي عارفة غلطتها ثم نحكي معها...
عزيزة:مرتك هبلاتك اولدي وكحلت قلبك اختك....تبقى هكا غير تابعها راح تخسر وبزاف زير عليها شوي حتى هي ماشي خصيصة..
داوود:تعصب من كلامها من صباح وهي تشر و ساكت ...ناض من بلاصتو وقال...نهار لي توصل تقلق منك انتي ولا واحد اوخر ثم أنا لي نعرف كيفها نتصرف أما مدام ما قاست حتى واحد حتى انتم ما تقسوهاش والموضوع يتقفل...يلاه بسلامة...
#يتبع
نحب ارائكم البنات تحركو معيا