قصة بعنوان:#عروسي بقلم:#ساجدة_سجود (زيني حلا)

🔺الحلقة 42 والاخيرة ⁦🔺

🔺الحلقة 42 والاخيرة ⁦🔺
🔻عروسي..........#ساجدة_سجود🔻
لمرأة الفحلة هي لي تخلي دارها جنة....وراجلها ما يشوف كان فيها....تعرف كيفاه تحكي وقتاه لازم تحكي واش لازم تقول....المرأة الفحلة هي لي تخالي راجلها يتبعها غير بحلاوة لسانها....تكون أميرة في دارها تصونو في غيابو وترفع راسو في حضورو....تكون ليه مرأة تغنيه على ألف مرأة....وهذا حال سجى...كان نعمة الزوجة لداوود....ونعمة البنت ....ولاهم نعمة الكنة... قلب صافي أخلاق عالية....تواضع وأدب....حكمة ورزانة ... برغم المشاكل والصعوابات قدرت تتخطاهم وتعيش هي وراجلها مرتاحة....وهذا حال لي يخالي امالو بربي كبير....وقلبو نضيف ...وكيف يقولو الله يمهل ولا يهمل....المهم انت اخدم بنية وخالي الباقي عليه....وقال الرسول عليه افضل الصلاة والسلام إنما لأعمال بالنيات....وهي حسنت النية وخدمت بيها نتيجتها كسبت بيها محبة راجلها ورضاه....قبول من عند ربي سبحانو....فاحسنو اعمالكم وخالو دائما وابدا املكم بربي كبير....
فاتو خمس شهر كاااملين....خمس شهر عاشو فيهم مرتاحين ....عايشين متهنيين فرحاانين بولدهم ويحضرو ليه ولزيادتو....بعدو على المشاكل وعلى أي حاجة ممكن تنغص عليهم فرحتهم....اي حاجة يتشاركو فيها ... و يتناقشو عليها ..اكيد كأي كوپل لازم يختلفوا مرة مرة لكن فيسع ما يرجعو ...و ينساو واش وقع ...
واقفة في الكوزينة كرشها قدامها دخلت في شهرها ... برغم كل تنبيهات داوود باه ترتاح وما تعبش روحها لكن هي مصرأ تبقى تخدم...طفات على لغداء و تمشات قعدت فوق كرسي ثم تنهج و الوجع مرة مرة يجيها و يروحه... بقات قاعدة تستنى فيه وقتاه يدخل حتى سمعت لمفاتح ....و صوتو يعيط عليها نطقت من بلاصتها...
سجى:هاني هنا اروحي...
داوود:دخل عندها مبتسم قرب منها وباسها من شفايفها ونزل باس كرشها يحكي...صفا العمر...
سجى:صفا صفا...
داوود:لقيت نادية لتحت زعما راح تطلع عندك...
سجى:كون غير طلعت من قبيلا وانا وحدي...
داوود:نتغدو و نزلك عندهم ابقاي معاهم هكا نتهنى عليك...
حركت ليه رأسها باه وناضت من بلاصتها تحط لغداء وهو راح غسل روحو....كملت حطات اخر صحن من يديها وتكات على طاولة حاكمة في كرشها ومغمضة عينيها ....دخل عليها وغير شافها هكاك قلبو تهز وقرب منها يحكي...
داوود:سجى واش بيك...
سجى:حتى شيء ما تتخلعش وجع ويروح اقعد تغدأ ...
داوود:واش من غداء يهديك ربي ...نديك لسبيطار عندك لوجع بزااف...
سجى:عييت صابر في لآخر حركت رأسها ليه بأه...جاب ليها جلابتها وخيمرها لبسها وهز لحوائج لي محضرتهم ليها وللبيبي وخرجو من دار سامحين في لغداء...فاتو على الدار لكبيرة عيط على نادية لي تخلعت عليها ... طلب منها تروح معاه ما ترددتش عوناتو ركبوها لوراء وهي معها وهو ساق بأقصى سرعة ....عين عليها وعين على الطريق...ونادية تصبر فيها من لوراء ....حتى وصلو لسبيطار ....داخلوها طول لغرفة لولادة خلوهم هم لبرأ.... عيطو على أهلها خبروهم لحقت عليهم عزيزة وعلي مع كان وقت لغداء كانو في الدار جابهم والدهم عادل....أما الباقي قليل واين تشوفهم ...لقوهم يستناو قعدو معاهم....لحقو حتى عائلة سجى وبقاو الكل يستناو على أعصابهم .... حتى خرجت عندهم الطبيبة وبشرتهم بولادتها...سألها داوود على صحتها هي والبيبي والحمدلله كل شيء كان بخير وصحتهم في زوج بالف خير....ستناوهم حتى نظفوها عاد دخلو عندها الكل باركو ليها فرحانين ليها...وداوود فرحتو ما يعطيها لحد... نادية وعزيزة تقول ماشي هم نفس لاشخاص لي كانو يكرهوها....الفرحة راح تخرج عينيهم...نادية من وقت زيارة سجى خلاتها تراجع روحها وترجع لحياتها .... عزيزة ما بقاتش دارت بيها بالعكس ولات دايرة ليها كي الماء لقليل.... وحتى سجى نسات وكملت حياتها عادي...واستمتعت بفترة حملها مع راجلها....اهلها حتى هم طمنو عليها و زاروها ما مرة ما زوج ...ودورك كلهم تلمو عندها....فرحانين ليهم جابو ليهم لبيبي حطوه في يد سجى معرفتش تهزو وخافت لا كشما تعملو ولات تبكي وهم شبعو عليها ضحك... نعتولها كيفاه تحكمو ...عاد حسات بإحساس الأمومة وداوود يدور يدور و يبوسو...شافت فيه سجى وقالت..
سجى:لازمنا نسموه....
نادية:زعما ما يهديكش الله تخليني نسميه انا عمتو...
داوود:والدي ما نسميه كان أنا ... قعد جنبها فوق سرير شاف فيها هي لي حركت ليه رأسها بأه...نطق وهو عينيه على والد ....راح نسميه أيوب ....
تسمعت تغريدة عزيزة بعدها صوت ضحكهم عليها... نسات روحها ومن فرحتها زغردت...استغل داوود اللحظة وهمس ليها بصوت سمعاتو كان هي...
داوود:الله يخليكم ليا الحلوة...
سجى: بنفس صوتو نطقت..ويخليك ليا ادودو... ضحكت على تخنزيرتو ليها وطلعتلو حواجبها على خاطرو ما يقدرش يعاقبها....
#تمة_الحمدلله
#النهاية
حكايتنا خلاصت بنوتاتي ...كاين لي راح يقول زربتي وحطيتي النهاية ....لكن أنا هكا رسمتها في بالي الفائدة ماشي في عدد الاجزاء الفائدة في العبرة لي بين السطور.... لحكاية ما تخلاص كون نبقى نكتب حتى لالف جزء ... قصة قصيرة بسيطة واقعية معبرة....وصلت فيها رسالة والحمدلله وصلت...نلتقى في عمل آخر وشكرا لمتابعااكم ....