قصة بعنوان:#عروسي بقلم:#ساجدة_سجود (زيني حلا)

الحلقة 5⁦🔺

الحلقة 5⁦🔺
🔻عروسي..........#ساجدة_سجود🔻
قدام دار لعريس كانو زوج حوائج يتسمعو هما صوت تزمير طموبيلات....وصوت زغاريد النساء....توقفو قدامهم وخرجو خوات لعريس لخمسة عادل علاء نبيل توفيق صلاح ...ومعاهم صحابهم ينزلو في لفراش بحذر ويطلعو فيه لدار لعريس....أما كلثوم وعمة وخالة لعروسة فستقبلتهم عزيزة والضحكة من لوذن حتى لاوذن و طلعتهم لدار واين راح تسكن لالة لعروسة.... لقاو حتى داوود ثم يعاون في ذراري ...غير شافهم قرب منهم وسلم عليهم اكتفى كان بسلام وسؤال على لأحوال ورجع يكمل واش كان يعمل....وهم يحاولو يرتبو في الشيء لي يحطوه ليهم....على لأقل مبدائيا حتى لين تجي مولاتها وتبدل الديكور كيف ما تحب....
كل شيء وصل حوايجها تحطو في شمبراتها وقفلها داوود بيديه...وباقي لحوايج تحطو في بلايصهم كيف لاثاث وزرابة وحوايج يخصو لكوزينة ....غير كملو خدمتهم نزلو كلهم وحتى من داوود بعد ما قفل دارو تبعهم... نساء داخلوا لدار لعائلة يضيفوهم....أما هو فخرج للبرأ واين كان أب لعروسة و خوها سمير سلم عليهم وقعد جنبهم مكمل معاهم على لحديث لي كان مفتوح....غير كملو ضيافتهم ناضو الرجال سلمو عليهم وتكلف واحد من العائلة يخبر النساء باه يخرجو عندهم...وهذاك لي وقع بعد سلام ركبو في طموبيلات ورجعو على طريقهم مخليين أهل لعريس لي عندو خدمة قصد ربي يخدمها....
عند عروستنا كانت متكية على سريرها وبالها يخمم في حياتها الجديدة...مبقاش بزاف وراح تغادر دار أهلها لدار راجلها....راح تحمل مسؤولية عائلة وراح تتحول من مجرد بنت لزوجة وبعدها لام...الف سؤال يخطر على بالها....و الأهمهم زعما راح تنجح انها تكون قد المسؤولية.... خرجت من دوامت أفكارها على صوت تليفونها والنغمة الخاصة بيه...كاسرة الصمت لي كان مسيطر على الغرفة ابتسمت ومدت يدها هزاتو وفتحت الخط من غير حتى ما تضطر تقرأ لاسم ....جاها صوتو يحكي...
داوود:حوايجك وصلو لبلاصتهم ازينة بقتي كان انتي لي نقصاتهم وتكمل عندي الصورة لحلوة تاعي في وسط داري منوراتها ومنورة ليا حياتي...
سجى:مبقاش بزاف ادودو وهاني معاك و ليك...كلها ساعات...
داوود:بصوتو لخشين الروجولي..وكون جات قدامو راهي لاحظة حواجبو المعقودين من اسم الدلع لي نطقت بيها قال...من نيتك اسجى دودو قداه من مرة نقولك الكلمة هذي ما نسمعهاش ...
سجى:واش راح نعمل تعجبني ونحب نقولها ليك...
داوود:راجلك قالك ما تتقالش هي ما تتقالش كوني تسمعي لكلام ازينة لبنات...
سجى:وقت تكون امرأة في الخلوة مع راجلها حلالها يحق ليها تقولو واش تحب وتعمل فيه لي تحبو .... حلال عليها وحلال عليه...
داوود:لسانك طويل ونشاء الله يبقى طويل حتى لبعد غدوة...
سجى:ضحكت تحكي...بعد غدوة خاليه حتى لين يجي وقتو....متبقاوش في طالعة والنازلة تفكروني فيه....
داوود:حط تليفون من يديه بعد ما فتح مكبر الصوت ...مد يديه لعلبة سجائر فتحها جبد واحد دارو في فمو شعلو وهو يسمع في نكيرها على ليلة الدخلة... عاقد.حواجبو جبد نفس منو وطلق الدخان في الهواء يحكي...شكون هذوم لي جبدو معاك الموضوع هذا...وانتي علاه تحكي معاهم في هذا شيء اصلا ولا تعطيهم مجال يحكو فيه معاك...
سجى:يقولو لازم يفقهو الطفلة ويفهموها واش لازمها تعمل...واي عروسة يشدو فيها باليلة هذي...
داوود:ليلة شرعها الله وحللها...خلوة شرعية بين راجل ومرتو ...ومدام تفتح الموضوع اسمعي شيء لي راح نقولو ليك و أحفظيه ...لكلام على شيء لي يوقع بينا ممنوع ...اي حاجة توقع تبقى بينا لا عادات ولا أعراف ما نعترف بوالو....يكفي نكون أنا نعرف واش نعمل ماشي لازم العالم الكل يعرف واش عملت مع مرتي...هي لي حلالي وحقها تعرف عليا وتشوفني في اي حالة والعكس...
سجى:حشمت وفي سع ما بدلت الموضوع تحكي...لازمني نقفل اداوود ...
داوود:سف من الكارو في يديه وهو يسمع في كلامها فهم انها قاعدة تهرب منو ..ابتسم يحكي...تبعاتك تبعاتك احلوة لكن مدام ماشي بين يدي أهربي دورك وقت توقعي بين يدي راح تخلصي...
قطع الخط مخليها فاتحة عينيها في الفراغ وقلبها راح يخرج من بلاصتو...
#يتبع