قصة بعنوان:#عروسي بقلم:#ساجدة_سجود (زيني حلا)

🔺الحلقة 16⁦🔺

🔺الحلقة 16⁦🔺
🔻عروسي..........#ساجدة_سجود🔻
حطات التليفون من يدها وناضت من بلاصتها مستغربة من شكون يدق عليها...ما جاء على بالها كان داوود لي ممكن يكون نسى مفاتحو...قربت من الباب وفتحاتو لكن لقات عجوزتها لي واقفة قدامها ...ابتسمت معها وقربت منها سلمت عليها تحكي...
سجى:عمتي صباح الخير....
عزيزة:صباح النور ابنيتي....ادروج تهد بسيف باه قدرت نطلع...
سجى:ادخلي ارتاحي ...
عزيزة:دخلت تفوت في عينيها على الدار حساتها تبدلت ... داخلتها سجى حتى للصالون وقعدت معها ...تشوف فيها وعزيزة تشوف في التغيير لي وقع عاد شافت فيها وقالت...
عزيزة:لقيت داوود هابط يجيب لغداء ...
سجى:حشمت لكن جاوبتها...كنت راح نطبيو لكن دار فارغة ما فيها حتى حاجة ....على هذي خرج يجيبو..
عزيزة:بنتي نعرف لي انتي عروسة جديدة....لكن مدام خرجتي بدارك.لازمك.تقومي بيها...ماشي من عاداتنا الراجل يروح يشري غداه ومرتو في دارو.... لي تحتاجيها هاهي دار لتحت هبطي ادي واش تحبي واطلعي لعيب لا قوتلك ما تديش....أنا المهم عندي والدي يأكل ماكلة نظيفة و دارو نظيفة...
سجى:تقرصت من كلامها لكن مع ذالك بقات محافظة على ضحكتها وقالت...ما جاتش لبالي برك اعمتي كون هكا راني قوتلو ....لكن تعرفي داوود وقت يقول كلمة كلمة....ومدام.قالي ما طيبيش.ما طيبتش...مسألة وقت برك حتى نخرجو نقضو واش نحتاجو وما يبقاش ياكل غير في دارو....
عزيزة:هكاك نحبك تكوني فحلة...ناضت من بلاصتها ... أنا نروح عمك يكون جاء أنا ابنتي كيف امك اذا نبهتك على حاجة ما تقلقيش مني...راحتكم هي راحتي...قوتلو جيبها وتغدو عندي لكن ما حبش...قالك خواتو يكون في دار...دورك نبعثلك لغداء معاه ....
سجى:تعبتي روحك اعمتي سامحينا...
عزيزة:مكاين حتى تعب ما تنسيش واش قوتلك ...
حركت ليها سجى رأسها باه...وصلتها حتى للباب ودعتها ودخلت وقفلت باب دارها من وراها ....رجعت لصالون وقعدة فيه طلع وتهبط في كلامها...لي كلو معاني ...ندمت لي هي قبلت يجبلها لغداء كون غير كلاو الحلوة ولا تبهديلة هذي....
لتحت في دار العائلة لفرغت كل الضيوف روحو الصباح بقات كان نادية وامها في دار ....وحتى هي راح تروح لعشية....دخلت عزيزة لداخل وغير سمعت خطوات امها خرجت من الكوزينة تحكي....
نادية:طلعتي عندها اماما....
عزيزة:ايه طلعت عندها ....
نادية:علاه طالعة خليها بينها بين راجلها ...لي خارج يجيب غداه من لبرأ ومرتو في دار قاعدة...
عزيزة:الطفلة عروسة ابنتي خليها تفوت سمانتها وقتها راجلها وحدو راح يعرف كيفاه يتصرف معها...أنا طلعت غير نصحتها وهبطت....
نادية:أنا وقت روحت عروسة من غدوة دخلت للكوزينة لا عروسة لا والو ....المهم لغداء واجد وحتى لبلاطو لي راح.يديه هاهوك ...أنا ندخل نلم حوايجي ....
ما ستنتهاش تجاوبها ....دخلت لغرفتها مخليا عزيزة قاعدة قدام الباب ترتاح من دروج.....حتى دخل داوود مهزي ساشي فيها لڨازوز وديسار ...عطاهم وحدة وحكم لوخر ....هز عليها لباطو...وطلع لدارو ما لقى كيفاش يحل الباب ..دق عليها ومن دقتو قلبها ضرب ...ناضت من بلاصتها وفتحت الباب لقاتو هو محمل حكمت من عندو فوق قلبها ....دخلت لبلاطو للكوزينة ودخل هو من وراها حط ساشي وخرج غسل يديه ووجهو ورجع عندها لقها...عاودت سخنت الماكلة و حطتها مبتسمت وداخلها ما يعلم بيه كان ربي....بداو ياكل في صمت...تسرط في الماكلة فوق من قلبها بسيف غير باه ما تحسسوش ...كلت على واش قدرت وبعدت مخلياتو هو يكمل ياكل براحتو حتى كمل ... وشاف فيها يحكي...
داوود:بصحة...
سجى:الله يسلمك ...داوود لازمنا نخرجو نقضو دار فارغة....
داوود:بعد العصر نشاء الله نخرجو...ناض من بلاصتو... نروح نتمد شوي كملي وألحقي عليا...
حركت رأسها باه وخرج هو مخليها هي لمت دنيا و غسلت لماعن ...دارتهم يقطرو مسحت يديها وتبعاتو لشمبرة لقاتو راقد...تمدت حتى هي جنبو تخمم حتى غفات بيها عينيها حتى هي....
#يتبع