قصة بعنوان:#عروسي بقلم:#ساجدة_سجود (زيني حلا)

الحلقة 35⁦🔺

🔺الحلقة 35⁦🔺
🔻عروسي..........#ساجدة_سجود🔻
لن يصيبنا الا ما كتب الله لنا...
على هذي الجملة لي تعودت تنطقها تحركت من بلاصتها كرشها بدأت تبان ....حطات يديها عليها وهي تتفكر في آخر زيارة لطبيبتها هي نفسها الطبيبة لي راحو ليها هي وداوود....
طبيبة:الحمدلله تجاوزنا مرحلة لإجهاض والبيبي ركح ...تقدري ترجعي تتحركي...عندو ثلاث شهر دخلا في الرابع....
جات صورتو لبالها ....عمرها لا غابت عليها ولا ثانية حياتهم فسدت ما تهناو حتى بعدوها على راجلها.... طول الشهرين لي فاتو عيط عليها ربع مرات ....فكل مرة يقولها ارجعي لدارك و تقابلو هي بالرفض.... وكلت أمرها لله وخلات كل شيء يمشي كيف ما هو ....
ناضت من بلاصتها لبست كلاكيتها وخرجت دخلت لدوش دارت روتينها الصباحي كملت وخرجت طول للكوزينة واين تلقى امها لي وقفت معها وهزات بهبلها تحملت تقلوبات مزاجها....من وقت ما خرج داوود من سبيطار دخلو عليها وخبرتهم بقرارها من وقتها روحت معاهم....وداوود في لعشية جاب ليها حوايجها حتى لعندها عطاهم لمروة من الباب ورجع ادراجو هارب من مشاعرو ومن ضعفو اذا رجع شافها....
كيف العادة واقفة على الغداء بيديها وموجدة ليها فطورها هي الصحي ....قربت منها وعنقاتها من لوراء حتى قفزتها تحكي...
سجى:صباح النور على احلى كلثوم في دنيا...
كلثوم:دارت عندها تحكي...أنا عندي لأهم نشوف ضحكتك ابنتي ....الحمدلله رجعتي تضحكي ونسيتي شيء لي وقع....
سجى:مدام والدي بخير وصحتو مليحة هذيك هي الدنيا وما فيها ....الماضي يبقى ماضي اماما أنا كلمة وحدة قولتها حسبي الله ونعمة الوكيل فيهم ....
كلثوم:أقعدي تفطري....
حركت ليها رأسها بأه ...وقعدت تفطر وتشرب في لحليب و بالها مع داوود لي عندو 15يوم ما عيطش عليها....حتى والو لحديث بياناتهم بارد ويكتفو كان بسؤال على احوالهم....وأكثر هو لي يسقسي عليهم وعلى صحتهم....الا انو عندها هي تسمع صوتو بالدنيا وما فيها حتى والو المكالمة إذا فاتت توصل لعشر دقائق.....تنهدت من أعمااااق قلبها خلات كلثوم دور تشوف فيها....خلات واش في يديها وقعد جنبها تحكي..
كلثوم:اذا ما عيطش عليك عيطي انتي عليه.... حتى هو تعب ابنتي كيفك ويمكن اكثر منك....ما فيها والو اذا سقسيتي عليه انتي....
سجى:خايفة اماما خايفة نضعف....داوود هو حياتي الكل والبعد اكدلي هذا شيء....صحيح ارتحت وبعدت على وجع الراس...لكن في مقابل كسبت وجع القلب و عذابو....
كلثوم:راجلك متمسك بيك وباغيك حتى هي ...ما عندو حتى ذنب فشيء لوقع معاكم....عيطي عليه ...
ناضت مخليتها تخمم في واش قالت ليها...قلبها يقولها عيطي وعقلها يقولها خليك بعيدة ومرتاحة ما ترجعيش تفتحي الباب ويرجع ليك لعذاب من جديد....ودائما بين صراع القلب والعقل ينتصر القلب....ناضت من بلاصتها حتى هي متخذا قرارها هزات لحوايج لي كلات فيهم غسلاتهم....حطاتو في بلايصهم وخرجت ....
عند داوود كان قاعد في السوبيرات تاعو...سارح بأفكارو في حياتو لي تقلبت في يوم ليل....لا رهو متزوج ولا راهو مطلق....ضعاف بزاف من كثرت التخمام و مكلتو لقليلة...دارو ولا يكره يروح ليها يخدم نهار الكل من غير توقف....وقت يطيح الليل يروح يرقد....اصلا ما بقات حلات.ليه من غيرها....قطع كلامو نهائيا مع امو واختو....دارهم ما عتبش ليها نهائيا....
هز رأسو في إبراهيم لي واقف قدامو يحكي...خويا داوود مولا السلعة وصل...
داوود:تعاونو انت وذراري هبطوها ...ناض من بلاصتو وخرج يتفقد اذا كان الشيء لي طلبو هو نفسو لي وصلو ليه ولالا....تلهى معاهم ونسى تليفونو لداخل واين كان يصوتو برقم مرتو....
عند سجى قاعدة وتحرك في رجليها بتوتر وتليفون في وذنها تسمع فيه يصوني لكن مكانش رد....عقدت حواجبها بخوف من احتمال ممكن تكون واقعة ليه حاجة....لكن في سع ما تردت لأفكار من رأسها ونحات التليفون من وذنها وقت مردش عليها....نزلت راسها لرقمو حابت تعاود تعيط لكن حشمت لا يكون هو لي ماشي حاب يهز عليها... حطاتو من يديها ووتمدد تشوف في السقف وتخمم في حياتها كيفاه ولات بعد ماكانت راسمة سناريواات اوخرى على الزوج....تصدمت وقت لقات ناس تكره ليها الخير لدرجة هذي....كانت محطيا عائلتو عائلتها الثانية....لكن.هم كانو يشوفو فيها دخيلا....تبسمت بستهزاء على روحها وقت قعدت ورجعت حسبت حسباتها الكل....عرفت لي هم رافضينها على خاطر كانو محطيين عينيهم مفيدة...ما تقبلوهاش هي حتى ما عطوهاش فرصة تعرفهم ولا يعرفوها عاد يحكمو عليها.... من لحكاية الكل خرجت هي لي خاسرة دارها تقفلت ...بعدت على راجلها ....شعرة ولا خسرت والدها ولا بنتها....وهاهي دورك في دار أهلها ماشي معروف مصيرها واش هو....خرجت من دوامات أفكارها على صوت تليفونها من رنتو عرفاتو هو لي معيط عليها توترت وعرقاتو وهي تشوف في تليفون...
#يتبع