قصة بعنوان:#عروسي بقلم:#ساجدة_سجود (زيني حلا)

🔺الحلقة 22⁦🔺

🔺الحلقة 22⁦🔺
🔻عروسي..........#ساجدة_سجود🔻
في دار أهل سجى واين كانت كلثوم تجري وتجاري.... فرحتها ما تعطيها لحتى واحد...بنتها راح تجي عندها مخلات ما وجدت ليها....كل شيء تحبو طيباتو ليها...باباها وخواتها ما خلاو ما جابو حتى هم فرحانين بزيارتها.....نهى ومروة حتى هم كيفهم....
فات اسبوع من حياتهم كيفو كيف باقي لايام....روتيني سجى ما بقاتش نزلت لتحت خاصتا انها ولات غير فاشلة واي حاجة تتحسس منها....هي مرة وحدة نزلت بسيف غير على جال داوود طلت على عزيزة بعد ما دخت ورجعت حكمت دارها....علاقتها هي وداوود كل ماهي تقوى اكثر...عامل كل جهدو باه ما يخليهاش مخصوصة حتى حاجة....برغم يومو الكل يفوتو في سوبيرات لكن مخصص ليها حتى هي وقت....تلهات هي مع دارها كل مرة تعمل فيها حاجة....ولا تجرب أكلة ...ناسية كل شيء ممكن يفسد فرحتها....لاتصالات مع اهلها ما ينقاطعوش نهائيا....كل اتصال تبقى كلثوم توصي وتعاود فيها على دارها وراجلها ....
اليوم ناضت فيه سجى وجهها اصفر والحركة تعمل فيها بسيف....لكن مع ذالك لمت الدنيا الكل ووجدت ليه لغداء....لمات ساك صغير راح تديه معاها لدارهم وبقات في صالون تستنى فيه وقتاه يدخل ....غير ضربة 12 سمعت صوت لمفاتح وصوتو يعطت عليها ....
سجى:هاني هنا اداوود...
داوود:دخل عندها عقد حواحبو بالوقت غير شافها كيفاه... قرب منها بخوف كور وجهها بين يديه يحكي... سجى واش بيك مريضة علاه وجهك اصفر....علاه ما عيطيش عليا نديك لسبيطار....
سجى:ضحكت بسيف وهزات يديها حطتها على يديه لي محطوطة على وجهها تحكي...شويا تعب ويروح ما يحتاجش سبيطار....نوض اغسل نحطلك لغداء...
داوود:واش من غداء الله يرضا عليك...انتي راح تموتي و تقوليلي غداء ....نوضي نلبسك نهزك لسبيطار وضعك ماشي عجبني من لايماات لي فاتو....
سجى: والله بخير نوض تغداء وسيدي بعد لغداء نفوتو على سبيطار وبعدها نروح لدارنا...
داوود:مكانش روحة اليوم حالتك ماشي تاع طريق... أجليها...ما تتحركيش من بلاصتك هاني راجع عندك...
ناض هو غسل روحو و توضى ...خرج صلاة وعقلو معها حالتها خوفاتو....غير كمل جمع سجادة ورجع عندها في يديه جلابتها مع خيمارها لبسها بسيف عليها وهز مفاتحو وخرجو من دار نزلها الدروج بسيف .... حتى الطموبيل عاونها حتى ركبت وركب هو في بلاصتو ديمار لسبيطار وهو كل مرة يسقسي فيها وهي تجاوبو كان بكلمة وقص....حتى وصلو عاونها نزلت ودخلو للاستعجلات دخلها وبقى يستنى فيها لبرأ....قاعد على أعصابو يحرك في رجليه ويحسب ليها في الوقت حتى خرجت عندو الفرملية خبراتو لي طبيبة تستنى فيه لداخل...حرك ليها رأسو باه ودخل القى سلام وشاف فيها هي لي وقال..
داوود:صفا دورك..
سجى:حركت ليه كان رأسها مبتسمت....
طبيبة:ما تخافش هي بخير لبيبي هو لمتعبها شوي...
داوود:شاف فيها من غير فهم وقال...كيفاه واش من بيبي...
طبيبة:ضحكت عليه تحكي...المدام تاعك حاملة عندها سمانة ....راح نكتب ليها على فيتامينات برك غير تحكم شهر لازمك تديها لطبيبة مختصة هي لي راح.تزيد تفهمكم أكثر....
داوود:ضحك وشاف في سجى و رجع شاف في طبيبة الهدرة تلفت ليه ما لقى ما يقول ...الفرحة اللجماتو ... تمالك روحو بسيف ...حكم من عندها الوصفة سلم عليها و عاون سجى ناضت وخرجو من عندها....
غير ركبو في طموبيل شاف فيها والفرحة راح تخرج من عينيه وحتى هي مكانتش اقل منو....
داوود:حاملة اسجى مبروك علينا ...
سجى:مزالت مشني مصدقة والله...حطات يديها على كرشها...أحلى حاجة وقعت في حياتي.....
داوود:الله يكمل علينا .... كون ماشي لبرأ كون راني كليتلك هذومك شفايف ...
سجى:ضحكت عليه من غير ما تجاوبو....
خلاها براحتها وديمار هو طموبيل ....وكل مرة يدو يشوف في كرشها ...ماشي مصدق لي هي حاملة والدو في كرشها....ومسألة وقت راح يكون أب...طول طريق وهو يخمم في هذا شيء وقلبو راح ينقز من الفرحة.... حتى هي مكانتش أقل منو فرحتها كبيرة احساسها في شكل...قطعة داخلك قاعدة تكبر وتتغذاء منك....شيء عظيم وإحساس رائع....تنهدت وتمتمت بينها وبين روحها..."الله لا يحرم حتى مرأة"....
غير وصلو....ونزلو طول لدارهم الدروج طلعتهم بسيف هو يوصي فيها ويعاود...وكون تبعاتو راهو هزها حتى لباب الدار....فتح الباب ودخلو قعدت في صالون بأمر منو...وهو سخن لغداء وجابو حتى لعندها تغداو مع بعض غير كملو لمة هي الدنيا وبقات تحاول فيه غير يديها لدارهم..بسيف باه خلاها ....من غير ما تنحي هزات غير ساكها وخرجو..
#يتبع