قصة بعنوان:#عروسي بقلم:#ساجدة_سجود (زيني حلا)

🔺الحلقة 36⁦🔺

🔺الحلقة 36⁦🔺
🔻عروسي..........#ساجدة_سجود🔻
تفقد السلعة لي طلبها....لقى كل شيء هو هذاك...وقع على لاستلام....ومد يديه مع الذراري ينزل معاهم... ويدخل لواحد الحانوت جنب السوبيرات تاعو دايرو ستوك....كملو كل شيء ودع الراجل وخلا الذراري ينظمو ورجع هو حكم بلاصتو....لقاء شكون لي يستنى باه يخلص....حكم من عندهم خلاصو حوائجهم وخرجو مخليينو هو يهز تليفونو وغير فتحو خرجت ليه مكالتها استغرب وقلبو بالوقت دق بالخوف.... واحتمال انها تكون واقعة ليها حاجة هي لي جات لبالو مع عندها بزاف ما عيطتش عليه....عاود عيط عليها في البلاصة....
حكمت تليفونها وتشوف فيه ....بعد.جهد فتحت الخط اخيرا ودارتو في وذنها من غير ولا كلمة...حتى هو سكت وقت هزات لكن ادارك لامر ونطق...
داوود:واقعة ليك حاجة كل شيء صفا عندك...
سجى:الحمدلله ما وقعة معيا والو...
داوود:سكت حتى هو ما لقى ما يقول ليها... وكانو يحكي مع وحدة غريبة عليه ماشي مرتو وعن قريب ام ولدو ولا بنتو....ابتسمت بستهزاء على الوضع لي وصلو ليه....وحتى هي مكانتش اقل منو ....ندمت لي هي عيطت عليه...حصلت ما لقات ما تقول....لكن شجعت روحها واش جاء في فمها قالتو....
سجى:داوود انت مليح عندك بزاف ما عيطش عليا تحيرت عليك....
داوود:جبد ڨاروه لي ولا ما يخطاشو باكي يتكيفها في نهار... جبد واحد شعلو وسف منو عاد جاوبها ببرود... يهمك حالي اسجى...
سجى:كون جاء حالك ما يهمنيش ما يتشغلش بالي عليك ونعيط نسأل عليك....
داوود:انا حتى واحد فيكم ما نهمو ....غير ما تكذبي على روحك...جات راح تنطق سبقها ....اشش ولا كلمة ...هزيتي روحك و روحتي ما خممتي فيا ولا واش ممكن يصرأ فيا...شهرين اذا ما نعيطش أنا انتي ما تكلفيش روحك حتى تهزي تليفون تسقسي....راح تقولي دورك شكون عيط.راح نقولك كون ما قطعتيش مني لامل عمرك ما تعيطي....
سجى:ما تحاولش تقلب كل شيء عليا أنا....متنساش شكون لي وصلنا للحالة هذي....أنا كنت قاعدة في داري لا ندور بحد. ولا نجي على حد....لكن مدام وصلنا للاهانة وانا في قلب داري وشعرة لا خسرت والدي... فقعدي ثم ماشي راح يجب نتيجة....ما بعدتش عليك بإراتي وقعادي هنا ماشي حاجة ساهلة بالنسبة ليا لكن القدر حتم علينا هذا شيء.....
داوود:ابقاي اسجى ثم ....وانساي راجلك ومسؤولياتك اتجاهو....فكري في مصلحة والدك ومصلحتك انتي ... وانا الله لا يفكر فيا....نموت ولا نحيا...شكون لي راح يكسر رأسو معيا....
سجى:دورك علاه الهدرة هذي ...
داوود:لازمني نقطع مشغول ...تحتاجي حاجة عيطي عليا بسلامة....
قطع عليا مخليها فاتحة عينيها في الفراغ....تصدمت منو ومن كلامو....معمر من جهتها و بزاااف....كلامو بقى يرن في وذنها....وسؤال لأهم لي سألتو لروحها ....تكون غلطت اذا اختارت صحتها وصحة والدها عليه هو غلطت...زعما وقت والفت هو لي يعيط ويسأل وهي لا ....نزلو دموعها بالوقت قلبها وجعها عليه وكلامو اثر فيها ....عرفاتو ما عندو حتى ذنب ذنبو الوحيد ربي عطاه ام واختو ما يحبوش يشوفوه متهني مع مرتو....
قفل عليها يغلي....معصب من روحو ومن عائلتو ومنها هي....ومن دنيا الكل لي عطاتو بالظهر... يحبها بل يعشقها وبعدها اكدلو هذا شيء... فكرت إنها بعدت عليه وما تكلفش روحها حتى تسأل عليه ...ذبحاتو....بالنسبة ليه هو هي همشاتو حطاتو وكانو ماشي موجود.... خممت كان في روحها هي ....وهو على شكون يحط رأسو ولشكون قاعد يخدم ويتعب....ووقت يروح شكون يلقى في دارو....وشكون يحطلو ياكل....ومع شكون يسهر....ولشكون يشكي همو...اذا مكانش ليها هي.....لكن وايني هي....عطاتو بالظهر وراحت ....ايه من حقها ماقالش لا لكن....على لأقل تخصص ليه وقت حتى في تليفون تسأل عليه تبينو لي هي مهتميا بيه حتى هو.....ماشي العكس....نعل الشيطان وهز عينيه حمر دم في إبراهيم لي بلع ريقو بالوقت وعطاه المفتاح تاع الستوك من غير ولا كلمة وراح من جنبو.... مخليه هو يرجع لدوامة افكارو لي ولا يغرق فيها بساعات ... يخمم في حياتو واين راح توصل وإذا بقى الوضع هكا واش هو الحل لي راح يعملو....نفذ راسو من افكارو ورجع ركز مع خدمتو يحكم من هذا وهذاك يخلص ومرة يخرج يحرك رجليه لبرأ و يعاود يرجع.... بقى هكاك حتى طاح ليل وهو ولا لقمة طاحت في كرشو من غير القهوة والدخان....
#يتبع
حلقاتنا خلاصو البنات خلولي ارائكم #بونوي