قصة بعنوان:#عروسي بقلم:#ساجدة_سجود (زيني حلا)

الحلقة 28⁦🔺

الحلقة 28⁦🔺
🔻عروسي..........#ساجدة_سجود🔻
فاقت على اشعت الشمس لداخلة من طاقة....دورت وجها جهة خواتها لقاتهم مزالهم راقدين....ناضت من بلاصتها عدلت الريدو ظلمت عليهم الشمبرة وخرجت هي طول لدوش....قضات حاجتها وغسلات وجهها نشفاتو ورجعت خرجت ودخلت للكوزينة لقات كلثوم كيف عادتها موجدة لفطور....وقاعدة توجد في لغداء صبحت عليها وقعدت فوق الطاولة هزات لبرس تاع القهوة وصبات ليها فنجان هزات المغرفة تصب في السكر وتحرك وهذا شيء تحت نظرات امها....كملت واش في يديها وقربت قعدت متقابلة معها تحكي...
كلثوم:بنتي وضعك من لبارح ماشي عجبتي راجلك حتى هو ما عيطش عليك...ولا شوفتك انتي عيطي عليه...حتى وقت خرجنا ما قولتيش ليه...واقعة معاكم حاجة تعركتو...
سجى:نزلو دموعها بالوقت غطات ووجها بيديها وبقات تبكي حتى خلعت امها عليها....ناضت من بلاصتها وقفت عليها....تنحياها في يديها من على وجهها وتحكي....
كلثوم:بسم الله عليك ابتني ...اشوو علاه لبكاء...
سجى:مرانيش حابة نروح اماما كرهت العائلة هذيك وكرهت الدار وكرهتو حتى هو....
كلثوم:اسكتي من البكاء وقولي واش صرأ....نهار جيتي وحكيت معاك قولتي كلام ودورك كلام....
سجى:ليلة لي جيت فيها ....جيت نضحك معاه مخلا ما قالي وقفل في وجهي....هذا الكل على جال امو...ما تتهنى كان ما طلقني وتخربلي داري...
كلثوم:استغفر الله ولا حولا ولا قوة الا بالله العلي العظيم....استهدي بالله ابنتي واش قولتيلو انتي حتى زعف هو منك....
سجى:قوتلو امك تكون قاتلك راهي ربطاتك بالولاد من ذرك....على الكلمة هذي شعل فيا....وحتى أنا من وقتها قفلت تليفوني ما شعلتوش....
كلثوم:مرانيش راح نعطيك لا ليك الحق ولا ليه ....راح نعطيك نصيحة ابنتي عمرك ما تشدي الضد مع الراجل راح تخسري انتي....دورك هاكي قفلتي تليفونك واش صرأ هدأ بالك لا...إرتحتي حتى هي لا....الصبر ابنتي إصبر هو مفتاح الفرج....أمو قولتها ليك قبل انسيها ما تبقيش تجبديها لا بالخير ولا بالشر....
سجى:والله نضحك برك مكانش في نيتي حتى حاجة تصدمت منو...
كلثوم:مزال عندك ما تتصدمي العشرة تعري على بزااف حوائج ماشي هم لي كنتي تعرفيهم قبل....لكن انتي لازمك تكوني فحلة وتعرفي كيفاه تتأقلمي وتكسبي راجلك ليك ..اذا انتي طرتي وتفرعنتي واش خليتي ليه هو....وقت تشوفيه قالق بعدي عليه....علميه لغة الحوار والمناقشة...تناقشو مع بعض حطو كل شيء فوق طاولة لي تغيضك قوليها ليه وحتى هو نفس الشي... ماشي وقت هو يبعد انتي تبعدي وديري فيها زعفانة منو ...ايه ازعفي لكن وقت لي لازم باه تكون بحلوتها وهو وحدو يجي يرضيك...ماشي ديما باه ما يمل هو ما تملي أنتي...لحياة طويلة وزواج صعيب ...وهذا هو ماشي كلو حلو وماشي كلو مر...
سجى:حركت ليها رأسها باه وناضت باستها تحكي...الله لا يخطيك عليا اماما...كون ماشي انتي راني هبلت والله ....
كلثوم:ناضت تتفقد في غداها وتحكي معها في نفس الوقت...أفطري أبنتي راكي بروحين ....ونوضي شعلي تليفونك ....
حركت ليها رأسها باه فطرت وناضت غسلات لماعن لي كلات فيهم ...عاد خرجت لشمبرة جبدت تليفونها شعلاتو وحطاتو وبدأت تجمع في حوايجها الكل....لمت حتى بلاصتها نوضت خواتها وتعاونو على خدمة الدار هي عطوها حاجة خفيفة برك....كملو مع وقت لغداء قدقد لقاو كلثوم حطاتو وباباهم دخل ....بقى قاعد ما سجى يسال على حالها وأحوالها يتفقد فيها حتى
دخلو محمد و سمير عاد تغدو.... وكيف العادة تكلفو لبنات بالدنيا وسجى وكلثوم راحو لشمبرة وبقات تحكي معها وتوقع فيها حتى دخلو لبنات وبقاو كلهم مجموعين حتى صونا تليفونها قلبها دق بالوقت ... هزاتو لقاتو هو لي عيط عملت ليها امها إشارة باه تهز هزات و دارتو في وذنها هو كلمة وحدة قالها ببرود قاتل..
داوود:راني قدام الباب...وقفل الخط ...مخليها هي تتنهد وتعاود ناضت لابسة جلابتها وكلثوم خرجت عندو دخلاتو بسيف عليه ....لكن قبل وقفت معاه شوي وتحاورو نزل داوود رأسو على كلامها...
كلثوم:يكون منك لعقل اولدي صغيرة ومسؤولية صعيبة اذا غلطت نعت ليها...وإذ طلعت هي انت اهبط تحاور معها وافهمو بعضاكم راهي لحياة طويلة اذا كتبها الله..
#يتبع