قصة بعنوان:#عروسي بقلم:#ساجدة_سجود (زيني حلا)

🔺الحلقة 18⁦🔺

🔺الحلقة 18⁦🔺
🔻عروسي..........#ساجدة_سجود🔻
فتحت الباب وقفلاتو من وراها...دخلت لصالون وقعدت ثم تبكي ....حاولة تحكم دموعها لكن ما قدرتش... معلبالهاش وعلاه تعامل فيها هكا....ما عندها ما عملت ليها....من نهارها لول وهي تسمع في الهدرة و تفوت لكن شيء لي عملاتو اليوم خلاتها تكره روحها أكثر...حسات بإهانة....كيفاه هذي هي عندها وهي تروح وتخليها وحدها من غير حتى ما تقولها ولا تقييمها....بكات حتى فشت قلبها مسحت دموعها....وناضت نحات خيمارها ودخلت لدوش توضت وخرجت صلاة صلاتها وشعلت tv تتفرج وعقلها ماشي فوقها....وفي الغرفة لداخل راقد داوود ماشي حابة تقلقو...
بقات هكاك طالعة من قناة لقناة حتى سمعت لاذان تاع العصر عاد ناضت صلاة مع كانت حاكمة لضواء....غير كملت نوضاتو باه يصلي ودخلت هي للكوزينة توجد قهوة ليه حفظاتو ....لازم يشرب قهوة وقت يفيق من النوم...وجدتها وهي محسية بالخنقة....حطاتلو فوق طاولة وخرجت من ثم ...رجعت لصالون قعدت في بلاصتها عينيها على تفي وعقلها مسافر بعيد....
كمل صلاتو وخرج من الغرفة وهو يسبح ....طل في الكوزينة لقى القهوة واجدة هزها وراح لصالون واين كانت قاعدة...ما هزتش رأسها فيه...قعد متقابل معها وحط فنجانو جبد ڨارو تاعو شعلو تكيف صحصح وشرب القهوة...وهو عينيه عليها حتى كمل عاد نطق...
داوود:كنتي تبكي اسجى..
سجى:شافت فيه وحركت رأسها بلا تحكي...لا علاه..
داوود:عينيك حمر وحتى وجهك...وماشي نورمال .. واش واقع معاك...
سجى:حتى شيء اداوود...ماشي ديما لازم نكون نضحك مرة مرة لازمني نكون ساكت وقالقة....
داوود:راح نعاود نسألك للمرة لاخيرة ولا راح نتصرف وحدي...علاه كل مرة تهبطي لتحت ترجعي متغيرة... وكنتي تبكي ولالا....
سجى:من غير شعور منها....نطقت بصوت عالي.... افففففف قوتلك حتى حاااجة ما وااقعة حتى حاجة .. حاب تعرف روح سقسي امك لي خلاتني منشورة لتحت وراحت عند بنتها....من غير حتى ما تحشيها ليا ولا تقول خالي حتى نقيم هذيك لكلبة مرت والدي لي من صباح وهي. تسمع وتبلع ....
داوود:صوتك صوتك نزليه قبل كل شيء....والوليدة واين راحت وخلاتك...
سجى:امك راحت عند بنتها وخلاتني أنا وحدي.... وشكون قالي خوك عادل وقت شافني نحوس عليها كيف المهبولة....نزلو دموعها بالوقت...منعرف علاه ما يحملونيش كي هي كي نادية...من نهار لول وانا نسمع ونفوت لكن بزااف ما أذيتهمش بحتى حاجة ....علاه قاعدين يأذو فيا...وزيد مكملينها وقت قالولي على موضوع مفيدة....تعرف وقتها واش حسيت...هذا حطت يديها على قلبها...شعلت فيه النار...ومنوضيني للكوزينة من غير ما يراعو لمشاعري....وحتى واحدة ما كلفت روحها تجي تعاوني....كل هذا وساكت ما قولت والو...
داوود:شيء لي سمعو منها صدمو...مكانش متوقع من امو واختو هذا شيء....وتعصب منها هي أكثر وقت خبات عليه....خزر فيها بوحدة طريقة خلاتها تبلع ريقها....صوتو خرج معصب لاقصى درجة....هذا شيء الكل وانتي مخبية عليا....قداه من مرة سألتك فيها....قدااااه اسجى قداااه....وقبل قعدتك قدامي قوتلك ابنت الناس واش يضرك اروااحي قوليلي ... وانتي واش عملتي خبيتي عليا...
سجى:ما تعيطش عليا أنا...كون قوتلك ما كنتش راح تصدقني وراح نبان قدامك تاع مشاكل...ومن نهاري لول ....سكتت وفوتت على جال ما نبانش في صورة لي انا بديتها بالمشاكل والحنة مزالت مزينة يدي....لكن كل شيء عندو حد....
داوود:مزال راح نتفاهمو على هذي شيء ...هز صبعو في اتجهها بتحذير وكمل....ماشي راح يفوت هذا شيء على خير ....
خرج من صالون مخليها هي ترجع تقعد في بلاصتها تنهج ومعصبة...غمضت عينيها على صوت خبطت الباب ....عرفاتو راح يروح ليهم ندمت لي هي تسرعت وقالت ....دورك واش راح يعمل وهو معصب اكيد راح تخرج هي لي غالطة وهم لي عندهم الحق...يبقاو امو واختو وهي لي غريبة....وكلت أمرها لله وخلاتها في يد ربها...
عندو هو خرج معصب ما يشوف والو قدامو...شيء لي سمعو منها مكانش متوقعو نهائيا....طريق وحدة حكمها لدار أختو مع كانت ماشي بعيدة وهو يزرب في مشيتو فيسع وصل...هز يديه ودق بقوة وحدة من وراء لوخرى حتى تفتح عليه الباب وكانت نادية لي فرحت وقت شفاتو لكن قبل ما تنطق سبقها هو وقال...
داوود:وليتي تهدري عليا قدام مرتي انادية
#يتبع
حلقاتنا خلاصة....نحب نلقى أرااكم وتفاعلكم على الحلقات...#بونوي