قصة بعنوان:#عروسي بقلم:#ساجدة_سجود (زيني حلا)

🔺الحلقة 10⁦🔺

🔺الحلقة 10⁦🔺
🔻عروسي..........#ساجدة_سجود🔻
بعد ما كملت تصوار نوضتها الماشطة وخرجتها من ثم باه تلبس البسة الثانية....بعدها تحط لعشاء وبداو بأهل لعريس هم لولين...عشوهم ....عاد كملو ضيوفهم... لعشاء كان عبارة على جاري(شربة فريك)...دولمة شخشوخة...سلاطة حميص ديسار والڨزوز....كمل لعشاء وتعشات الناس الكل صغير ولكبير وحتى رجال لبرأ...
رجعت نزلت عروستنا بالبسة الثانية والمرة هذي دخلت ويديها في يد باباها قعدها في بلاصتها وباسها فوق جبينها وهي بستلو يديه...صور معها وخلاها ليهم...تصورو معها خواتها ....ويحاولو يضحكوها ويخففو عليها التوتر....والماشطة جنبها....وكل لانظار مسلطة عليها...لي يضحك معها تبتسم معاه....نوضتها نادية شطحت شوي دارو ليها حلقة وهي في الوسط ...خلوها تشطح تبرد قلبها....مع خففت ليها في لبسة لقات راحتها ....وقدرت تتحرك كيف ما تحب ...جهد نص ساعة وهم يشطحو فيها ويشطحو معها...خلقو ليها وحدة الجو عجيب خلا كل الناس تبتسم ويحركو كتافهم معاهم....حتى عيات عاد رجعت خرجتها الماشطة طلعتها لغرفتها واين قعدة ترتاح وبدأت هي خدمتها تنحيلها في لاكسسوارات...هزات تليفونها تتفقد فيه مع جاء الوقت لي يلبسها فيه الخاتم....ولازم يجي باه يدخل معها المرة هذي...لقاتو ماشي معيط ...عيطت عليه هي...صون لمرة لولى ثانية ثالثة قطع عليها وعاود هزات عليه ومن غير مقدمات نطقت...
سجى:واينك جيتي عندك تقولي غيرت رايي...
داوود:ما عندكمش السلام في بلادكم...
سجى:خايفة اداوود ...ما نتهنى حتى نشوفك قدامي...
داوود:كلمة وحدة وقولتها ليك...من وقتاه نقولك حاجة ونجبد بيك أنا...راني قدام الدار ...مزالتي مطولة انتي .
سجى:تنفست براحة وابتسمت تحكي...لا نبدل برك وهاني واجدة...
داوود:ما طوليش...يلاه روحي...
قطع عليها مخليها تنوض من بلاصتها و الماشطة معها تعاون فيها تبدل في حوايجها لبسة غوب في لاحمر كاريتها...لبستها وخففت ليها المكياج دارت ليها تاج صغير فوق شعرها....جات تحفة خرج فيها لون لاحمر مع كانت بيضاء ....دخلت عندها اختها خبرتها لي داوود وصل ويستنى فيها لتحت ...عاونها نزالت لتحت لقاتو واقف مع خواتها في زوج...لي غير شافوها قربو منها وباسوها وباركو ليها مخليينو هو راح.ياكلها بعينيه مرتو لكن ما يقدر يدير والو قدامهم...حكمها خوها لكبير وعطها ليه يحكي...
سمير:تهلا اصاحبي عطيناك نوارة الدار...
داوود:في عينيا وكيف مكانت نوارة داركم راح تكون نوارة داري....
دخلو للخيمة تحت زغاريد....وقفو قدام البياس مونتي لكانت محطوطة متكون من زوج طوابق...مكتوب عليها اسمهم....وجنبها زوج كيسان فيهم جي....وجنب لوخر صحن فيه موس كبير وزوج فراشت....هز الموس وحكمت معها قعطو بياس مونتي تحت أنظار الحضور الكل وكلها وكلاتو وشربها العصير...وهذا شيء الكل يعمل فيه فوق خاطرو ماشي حامل نظرات النساء ليه ...جبد الخاتم من جابو لابسو ليها ....ولبساتو حتى هي الخاتم تاعو...شطحو شوي بسيف عاد خرج مخليها معاهم....ماشي بزاف وناضو أهلو حتى هم ودعوهم وخرجو...وحتى الضيوف بداو ينسحبو واحد وراء واحد حتى بقاو كان لقراب....عاد طلعت سجى نحات حوايجها ولبست حوايج موريحة ودعت الماشطة وخلاصتها وتمدت في بلاصتها كتب ليه ميساج لي هي تعبانة وراح ترقد....وغير حطت رأسها فوق لمخدة رقدت....مخليا لتحت داخل بعضو لمو لي قدرو عليه والباقي خلوه حتى لغدوة ويتعاونو عليه....
اهل داوود حتى هم وصلو لدار لي راح يبات هاهو بقى ولي مروح ويرجع غدوة روحو بيه حتى لباب الدار... بدلو حوايجهم ورقدو باه غدوة ينوضو للخدمة... وداوود كيف العادة طلع لغرفتو بدل حتى هو حوايجو....وقرأ مساجها من غير ما يجاوبها حتى هو كان تعبان غير حط راسو عفى...

#تتمة_البارت
نهار.جديد...
المرة هذي العكس ....صبحو أهل لعريس هم لي يجرو على التحضيرات ....كيف ما وجدو دار سجى حتى هم عملو نفس الشيء....هذا هو العرس الجزائري سواء كان للمرأة ولا للراجل الفرق واين....في الكمية الراجل ديما عرسو يكون كبير.....
في دار سجى ناضو لمو الدنيا الكل ....وزيقوها تعاونو عليها مخليين سجى تدخل لدوش تتدوش...من تعب على خاطر تابعتها ليلة طويلة....غير كملو قعدو يرتاحو عاد حطو لغداء من واش فضل لبارح ... تغدو عاد راحت سجى للحفافة لي كانت نفس الماشطة تعدل ليها المكياج...مخليتهم هم يعدلو رواحهم لي راح يروح معها...ولي رفض حكم الطريق لدارو....
وهكا فات نهار الفرح اوخر بعد العصر كان كرتاج كبير واقف قدام دارها ودخل هو خرج عروستو ركبها في طموبيل لخاصة بيهم...وباقي عائلتها وزعوها على طموبيلات لفارغة....وانطلقو في إتجاه الدار واين كان العرس واقف وصوت لغناء مسموع ولداخل كل واحد يجري في جهة...حتى سمعو صوت التزمير ... إستقبلوهم احسن إستقبال قعدوهم في جهة لي كانت ليهم ..فات الوقت وتحط لعشاء نفوسو مع اختلاف بسيط في بلاصة الشخوشخة كان كسكسي....تعشات الناس الكل وفرحت الناس الكل...بعدها جاء وقت حنة لعريس واين كان دايرين ليه عرسو مع فرقة ...وهو قاعد في النص حنات ليه امو مع عمتو وخالتو لكبار تصورو معاه...وخلوه مع صحابو وخواتو لفرحين ليه...بعد ما كملت السهرة وجاء الوقت لي تنوض فيه لعروسة....لابسوها برنوسها وخرجت معها امها وخواتها في زوج عطواه لفاليز تاعها عملها في لكوڤر...عاونها ركبت وركب حتى هو وديمار في اتجاه لاوطيل... مسافة الطريق وكانو واقفين قدامو...عاونها نزلت وهزو حوايجهم...ودخلو هزو المفتاح وطلعو الغرفة المخصصة ليهم...وقت ريزرفا فيه عمل لإجراءات الكل....فتح الباب ودخلو فوتت عينيها الغرفة تحت لافوال....غمضت عينيها بتوتر وقت سمعت صوتو..
داوود:واخيرا الالة حصلتي بين يدي...
سجى:ما جوباتوش مدات يديها تلف في الوقت تحل في خيط البرنوس حتى حكمهم ليها...شافت فيه وقت سمعتو رجع حكى...
داوود:خالي عليك أنا نحيلك كل شيء ما تعبيش ليا روحك ....بعدت يديها لحساتها عرقت من الحشمة والخوف...فك ليها البرنوس ونحها بقات كان بغوب رفع ليها رأسها وباسها فوق جبينها كمحاولة انو يهديها...
داوود:ما تخافيش مسألة وقت وكل شيء راح يفوت حرارت وقت برك...وهانتي تفكيني....واش مستعدة ولالا...
سجى:وقتها تمنات لارض تنشق وتبلعها كل شيء مخلط عليها...حشمة ...خوف... توتر...رهبة... ما لقات كان تحرك راسها ومسلمة روحها ليه....وفكرة وحدة تخمم فيها ....هو راجلها حلالها يعني من حقو وحقها...علاه راح تمنعو ولا تعترض....وحتى هو ما حشمهاش بزاف ووفيسع ما دمج شفايفو مع شفايفها منسيها هي واين ولا شكون ولا حتى واش قاعدة تعمل...من قبل هادئة لقبلة شرسة ومن كلمة حلوة لغزل لآهات تجردو من حوايجهم...وتوجو ليلة عرسها بختم هو صكوك ملكيتو على جسمها...وهي سلماتو ليه وحافظة عليه ليه هو لي خذا عذريتها بالحلال.....باسها بوسة شكر وافتخار على جبينها ... وتمد.جنبها حاضنها عندو يستعيدو في أنفاسهم ....مد يديه وهز تليفونو خبرهم بلي لأمور بخير...بعد تعالات الزغاريد في دار لعريس من قبل اهلو وأهلها ...باركو لبعضاهم وتهنات لام على بنتها وعاد قعدت مرتاحة وهنات حتى باباها...
#يتبع