اكتفيتُ منكَ عشقًا

الفصل الأخير

اكتفيتُ منكَ عشقًا.
(الجزء الثالث).
بقلمي فاطمة محمد.
الفصل الأخير:

*******

اندفعت "سامية" تجاه إياس وتقى واللهفة تظهر بوضوح على محياها تستفسر منهم عما حدث:
-ها يا إياس طمني، البيبي بخير..

رمق إياس والدته ثم نظر للجميع الذين إلتفوا حولهم..مجيبًا بإيماءة بسيطة من رأسه:
-الحمدلله تقى والبنت بخير.

سعد الجميع بذلك الخبر مباركين لهم بينما صدح صوت مروان بعدما استرق نظرة تجاه علياء مردد بمرح:
-الله بنت..والله ما في أحلى من البنات يارب كلنا نخلف بنات..

علق بسام على كلماته متمتم بنبرة ذات معزي وصلت للجميع:
-آه ما أحنا عارفين انك بتعز البنات أوي..بس تعزهم حاجة وتربيهم حاجة تانية..أنت ذات نفسك عايز تتربى..

اغتاظ مروان من سخريته منه أمام الجميع وصاح:
-لا يا شيخ فكرك يعني هيصعب عليا..طب يارب يارب يارب نجيب بنات عشان تشوفوا الفرق بين تربيتي لبناتي وتربيتكم انتم يا شوية عرر..

كاد سليم أن يعلق هو الآخر ويدخل معه في جدالًا لن ينتهي لولا صوت رحمة الذي دوى مصوبة حديثها تجاه تقى:
-اما انا عملتلك شوية محشي على الكانون انما ايه عنب..وشويتلك فراخ على الفحم يستاهلوا بوقك أنتِ وبنوتك القمر...

سخر مروان منها وقال بأسلوب ساخط:
-لا يا شيخة عملتيه لوحدك أنتِ صح..ده انا بأيديا دول اللي قطعت البصل..والغلابة دول هو اللي ضبطولك الحطب والنار اللي سوتيه عليها..

ردت روفان عليه محركة كتفيها مرددة:
-وايه يعني ما احنا اللي قعدنا حشينا المحشي..مش كدة يا لولو..

-كدة يا رورو...

تجعد وجه مروان اشمئزازًا من ألقابهم تلك متمتم:
-لولو..و رورو اسامي كلاب دي خلي بالكم...

-ما تخرس بقى يا واد أنت محدش مالي عينك ولا إيه..

قال صابر كلماته المحذرة لمروان..ثم نظر لابنته خديجة ونطق بهدوء:
-خديحة يلا عشان نأكل..ونلحق نجهز قبل ما نروح نطلب مريم..

اماءت له خديجة بينما قالت رحمة وهي تنظر لمروان:
-يلا شاطر ورينا جمال خطوتك وافرش برة في الجنينه..

علق سليم بصوت عالي رافضًا تلك الفكرة:
-لا بقى مش هأكل في الجنينة انا ...

أيده مروان متمتم:
-ولا أنا يا السفرة يا بلاش..

رفضت كلا من روفان ورحمة وعلياء وقالوا بذات الوقت معترضين:
-واحنا عايزين الجنينة...

هنا وجاء صوت صابر مؤيدًا الفتيات:
-وانا كمان عايز اكل في الهواء الطلق..انتوا بقى مش عايزين عنكم ما كلتوا يلا يا بنات...هدخل اوضتي واول ما تحضروا نادوني..