ငါမင်းကိုတာဝန်မယူစေချင်ဘူး! //IDWYTBR!// [ဘာသာပြန်]

ချိုမြိန်ကာ တဖြည်းဖြည်းအဆင့်တက်လာသောကာလ။

[ Uncode ]

အခန်း-၆၉။ ချိုမြိန်ကာ တဖြည်းဖြည်းအဆင့်တက်လာသောကာလ။
___________________________________________

လင်ကျန်းရီတစ်ယောက် စုကျစ်ယန်အကြောင်းကိုစုံစမ်းခဲ့ချိန်က သူ့ရဲ့နောက်ခံကိုပါသိခဲ့ရသည်။ ယခုမူ သူကိုယ်တိုင်ကိုယ်ကျ ထိုအကြောင်းထုတ်ဖော်ပြောကြားတာကိုကြားရချိန်မှာတော့ နှလုံးထဲ၀ယ် ပူဆွေးသောကရောက်မှုကို ခံစားလိုက်ရသည်။

စုကျစ်ယန်ကို သူ့လက်မောင်းထဲသို့ဆွဲယူကာ လေသံတိုးတိုးလေးဖြင့် နှစ်သိမ့်လိုက်သည်။

"၀မ်းမနည်းပါနဲ့... မင်းရဲ့လစ်လပ်နေတဲ့မေတ္တာတရားတွေအတွက် ကိုယ်ကမင်းကိုပိုပြီးတော့ ချစ်မြတ်နိုးပေးမှာပါ"

စုကျစ်ယန်ကသုန်မှုန်နေသောအမူအရာဖြင့်ခေါင်းညိတ်ကာ လင်ကျန်းရီ၏ လက်မောင်းများကြားမှထွက်ရန် ငြင်းဆန်လိုက်သည်။ သူ့လက်ကိုမူ ၀မ်းဗိုက်ပေါ်သို့ ညင်သာစွာတင်ထားရင်း သူ့ဘာသာတွေးနေလိုက်သည်။

ဒါက 'စိုင့်ဝိန်းကသူ့မြင်းကိုဆုံးရှုံးတယ်'လို့ခေါ်တာမျိုး ဖြစ်မလားလို့ပေါ့။ ဖုံးကွယ်မှုတွေထဲက ချီးမြှောက်မှုတစ်ခုလေ။

[*လေပြည် - စိုင့်ဝိန်းရှီးမာဆိုတာက ဒေသိယစကားတစ်ခုဖြစ်ပါတယ်။ အဓိပ္ပာယ်က လူအိုကြီးဟာသူ့မြင်းကိုဆုံးရှုံးလိုက်ရပေမဲ့ အဲဒါကပဲသူ့အတွက်အကောင်းဆုံးအလှည့်အပြောင်းဖြစ်သွားခဲ့ပါတယ်တဲ့။ ဆိုလိုချင်တာကတော့ လိုရင်းတိုရှင်းမြန်မာမှုပြုရရင် 'အဆိုးထဲကအကောင်း'ပေါ့ရှင်။]

ပထမတုန်းကတော့ သူရဲ့ထူးခြားသောဖွဲ့စည်းပုံကြောင့် သူ့မိဘတွေရဲ့ချစ်ခြင်းမေတ္တာကိုဆုံးရှုံးခဲ့ရသည်။ ဒါပေမဲ့လည်းအခုတော့ အဲဒီ့ထူးခြားသောဖွဲ့စည်းပုံကြောင့်ပဲ လင်ကျန်းရီ၏ချစ်ခြင်းမေတ္တာကိုရခဲ့သည်။

သူ့ဗိုက်ထဲမှာ ရှင်သန်နေသောအသက်လေးနှစ်သက်ကိုတောင်မှ ပိုင်ဆိုင်နေသည်။ သူတို့လေးတွေဟာ အနာဂတ်မှာပျော်ရွှင်ဖွယ်ရာ မိသားစုဘဝလေးကို သေချာပေါက်ရရှိလိမ့်မည်ဆိုတာ သူယုံကြည်ပါသည်။

သည်လိုဆိုတော့လည်း ကောင်းကင်ဘုံဟာ အမြဲတမ်းသမာသမတ်ကျနေသည်ပဲ။ ထိုအရာ တံခါးပိတ်သွားစဉ် တစ်ချိန်တည်းမှာပဲ မင်းအတွက်တံခါးတစ်ချပ်က အလိုလိုပွင့်လာလိမ့်မည်။ စိတ်အားငယ်မှုတွေနှင့် မင်းကိုယ်မင်းမစွန့်ခွာသရွေ့ မင်းဟာပျော်ရွှင်မှုကိုရရှိပါလိမ့်မည်။ (အခွင့်အလမ်းတွေပျောက်ဆုံးသွားရင်တောင် အခွင့်အရေးတစ်ခုကတော့ ကျန်စမြဲပါပဲ။)