💎🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 173:
بعدما تفرزت الحالة تعشاو كل في رحبة... نظفو وسيقو دار رجعو كل حاجة لبلاصتها... سهى كانت مونستها حتى هي روحت ورجعت فرغت عليها دار... بعدما سكتت ولد خوها ورقداتو... داتو لماماه تحطو في بلاصتو...حكمتها مريم شوي معاها تسقسي فيها...
مريم: جوجو وش حوالها لعروسة حساتك مقلقة شوي...
جميلة: لا غير من تعب برك تعرفي كل شيء درناه في سمانة حتى انت وخليتي دارك وجيتي تعاوني...
مريم: من غير مزيتي راك كما اختي ولا اعز... ان ساء الله ربي يكملك ويفرحك بيه باين راجل وسيد رجال...
هبطت راسها تلعب بصوابع يديها من غير ماتجاوبها وكانو حاجة حاصلة وحابة تحكيها... جرتها مريم من يديها دخلو لبيتها...
مريم: جوجو ياك اختك... احكي وش جاء في خاطرك...
جميلة: غير خايفة من لجاي... ايمن من هدرتو يبان واعر... وقت يحكي نتخلع...
تبسمت معاها: عادي راجل صح هو الي يكون متحكم في زمام الامور... الي يغير على حاجتو هذاك تفرحيلو... مش يغير عليك احسن ولا يشوفك تحكي مع رجال عادي تقول في دمو يمشي ماء مش دم يلعبلك على المورال اممم وينها خير...
جميلة: من حقو يغير اما ثاني خايفة يخنقني... ووانا كما تعرفي معنديش تجربة في امور هذي... انت وقت شاف شعري وعقد حواجبو تخلعت قريب لا عملتها تحتي...
مريم: هههه طبيعي هذا شيء دوك تتعرفو على بعض وتعرفو عقليات بعض... وتولي تدللي عليه... راح تشوفي كفاه تتبدل نظرتك للحياة معاه... تولي تستني غير وقتاه تكوني معاه...
جميلة: زعمة نقدر اميمي تبانلي صعيبة...
مريم: نن مش صعيبة حاولي تعرفي نقاط ضعفو وإجدبيه بيهم... راجل بحب لحنانة... مش مرأة كلمة بالكلمة معاه... هو يقلها بيضاء تقلو لا كحلة... ومن بعد تولي تبكي تقول تبدل عليا... كوني انثى لعوب مرة تجبديه ليك مرة تخلي مسافة يتوحشك يعود هو يحوس عليك...
جميلة: إن شاءلله نقدر...
مريم: راح تقدري اكيد... نعرف قلبك وطيبتك راح تخليه يحبك...
تنهدت من قلبها طلعت عينيها تشوف معاها: إن شاءلله ميمي... سامحيني قلقتك معايا في نص الليل...
مريم: علاه مابيناتناش شيء هذا... انا نخليك ادم كون يفيق يعمل حالة بالبكاء... بقات متبعة مرت خوها حتى خرجت وقفلت الباب وراها... ناضت حتى هي طفات ضوء وهزت تلفون من فوق طابل دونوي تشوف معاه... قلها نعيطلك ولدرك ما عيط... بقات قاعدة مدة تايهة مزال خايفة... بعدها
حاكمت فراشها راقدة على جنبها الايمن تلفون حطت تلفون فوق لمخدة مقابلها تعس فيه... حتى ملت وعينيها بداو يتقفلو... هزاتو حطاتو تحت لمخدة حتى وصلها اشعار نتع ميساج... عينيها تفتحت وقلبها ضرب... زربت قعدت وحلاتو قراتو ترسمت تبسيمة على خدها... حكت شعرها من بعد لماتو لفوق حساتو سخنها وقلقها... حكمت تلفون بين يديها تخمم وش ترجعلو... فضلت تكتبلو (مزلت فايقة ) حطت تلفون على قلبها مغمضة عينيها عاصرة عليهم نفسها بسيف يخرج...
عند أيمن....
بعدما بعتلها ميساج حط تلفون فوق كرشو مغمض عينيها... لكان طولت يرقد وغدوة يعطلها...حتى دخلو ميساج قراه... عدل رقدتو مكالي راسو على حرف نتع سرير.... وتلفون في وذنو...
أيمن: سلام عليكم...
جميلة بصوت قريب مايتسمعش: وعليكم سلام...
أيمن: لباس؟
جميلة لباس الحمدلله وانت؟
ايمن: الحمدلله دايما انشاء الله...
بعدها سكتو لزوج مالقاش وش يقلها... حك شعرو...
أيمن: تكوني تعبتي اليوم...
جميلة: اممم شوي خوف اكثر منها...
أيمن: هههه علاه تخافي... مني ولا من حليمة...
جميلة: منك (شهقت مافاقتش على روحها كما هدرتها ولا تبلع في ريقها...)
عقد حواجبو: هههه ماتقوليش خفتي مني صح...
جميلة: لاغير انا... هو مش...
أيمن: جميلة نعرف ممكن حكيت معاك بجدية فوق لازم... اما حبيت نفهمك عقليتي من لول مش باه تخافي لا باه نتفاهمو لا اكثر ولا اقل...
سكتت جميلة ماعرفتش وش تحكي...
ايمن: احكي شبيك سكتي...
جميلة: مالقيت وش نقول... نخلوها للوقت هو الي يخلينا نعرفو بعض...
أيمن: إنشاءلله انا راح نرقد تعبت من جري اليوم...غدوة نعيطلك ونڨصرو مليح اوكي... تصبحي بخير...
جميلة: تمام وانت من اهل لخير...
قطعو لزوج كل واحد وين راح تخمامو...
أيمن الي جاتو صعيبة ماعرفش كفاه يتعامل معاها وهو اصلا مش موالف لحوايج هذي... وزاد عليه قلبو لمحنون... زاد غرق في تخمامو اكثر... يدعي في ربي يثبتو في العلاقة هذي لانها درك راهي مرتو ومن مسؤوليتو...
اما جميلة الي بقات تشوف مع لفراغ... بعدها هزت كاس ماء شرباتو فرد مرة تحس في حلقها نشف... زاد عليها بمكالمتو هذي...
