المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 161:
سفيان: جوجو وين المنشفة...
واقفة في لكوزينة ماسمعاتوش... قاعدة تدندن وتعصر في فاكهة تعمل في كوكتال... ويديها مع بان كيك... ولا علبالها... زاد عود عيطلها اكثر من مرة ولا حياة لمن تنادي... حتى حل الباب وخرج راسو عيط بصوتو لخشين خلاها تتنفض... قفلت على نار وراحت تجري...
جوجيتا: وشبيك بإسم الله تقول سكنوك...
سفيان: انا سكنوني ولاإنت الي من صباح نعيط .. عاملتلي فيها كوكتال شرين على اليسا على نانسي... يالنت راني سفيت من برد والمنشفة مكانش...
جوجيتا: هاني علقتهالك لداخل...
سفيان: ماشفتهاش تسمى اعمى...
جوجيتا: ادخل ادخل على يدك ليمين تلقاها من غير ما تعمل روحك بهلول راني عارفة وين حاب توصل... ودرك خليني نكمل شغلي... وخف روحك موجدتلك سهريا على كيف كيفك اراجل...
كمش عينيه فيها: امممم انت نشوف فيك وليتي ثعلوبة كبيرة...
جوجيتا: كما عدت ثعلوبة نتع سوفي مش مشكل البس والحقيني...
سفيان: دقيقة نكون عندك (قفل الباب يصفر خلاها تضحك عليه رجعت للكوزينة نظمت كل شيء هزاتو لصالة...مسحت رخامة بالجافال رجعتها تشعل... وحطت كل حاجة في بلاصتها حطت يديها على خصرها تتبسم... بعدها زربت خلت لبيتها جبدت وش راح تلبس... بدلت وحطت برفانها طلقت شعرها ..شافت مع روحها في لمرايافرحانة ...وخرجت تجري قعدت في لفوتاي وقت سمعت الباب قاعد يتحل... وخطاواتو قاعدة تقرب جاء وقف عند راسها يحكي )
سوفبان: وش هذا الكل امرأة... مرتي صنافة وانا لاخبر...
جوجيتا: عجبك؟
سفيان: كاين حاجة تعملها لعسل نتاعي وما تعجبنيش اممم...
طبطبت على لبلاصة الي بحذاها باه يجي يقعد... وهو ماصدق ترمى بحداها...
سفيان: اممم وش هذا؟ ماعرفتوش...
جوجيتا: تحكي صح؟ شوف هذا بان كيك... وهذي كوكاوية وهذا معسل وهذاك عصير نظن تعرفو اممم...
قرب خطف بوسة وهز وحدة معسل حطها فم واحد يتبنن فيها...
سوفيان: تعرفي انت احلى من لعسل الي ناكل فيه...
جوجيتا:امممم باينة... عيطت سقسيت على امك؟
سفيان: لا درك وين خرجت من دوش وزيد طاح الليل غدوة صباح نعيطلها...
جوجيتا: تحب نروح معاك كشما تحتاجني...
عقد حواجبو فيها: من بعد تقولي هاي عملت ولا ماتلومي غير روحك...
جوجيتا: عيب والله غير حابة نوقف معاها مانظنش عندها الوقت تهاجمني... يارب تلها في مصيبتها...
تنهد يحكي: ربي يكون في عونها انا راجل وماتقبلتهاش يا هي مسكينة...
جوجيتا: إن شاءلله ربي يفرج عليها...
سفيان: امين... ارواحي لهنا عندي (فتحلها دراعو متبسم وهي ترمات عليها حت رجع لوراء ) وش موجدتلي روح لسهرية...
جوجيتا: اممم قلي انت نتفرجو ولا نلعبو كاش لعبة نفوتو الوقت خير ...
سفيان: والله الي تقرر عليه روح هذاك هو اما نحب نبقى هك مانتحركش وانت لاصقة فيا...
جوجيتا: كما عاد هك نتفرجو خير... خلي نحطو مدرسة مشاغبين مليحة...
سفيان: #### تتمسخري بيا وقت مدرسة مشاغبين مكانش حاجة ت### على لعبد...
ضرباتو على صدرو بدلال: والله لا تحشم هههه....
سفيان: هههه وشكون قالك نحشم....
*********
فاتت هذيك الليلة...كاين الي ساهر فرحان ووكاين الي دموعها على خدها كما نار وكاين الي يخطط لمستقبلو كفاه يكون... والي قاعد مع راسو يخمم في المجهول...و واحد قاعد يتبسم لتلفون كل مرة تخرج ضحكة من قلب الي مغموم ... والي حاطة سجادة تدعي تمشي لامور بخير... والي راقدين في لعسل من غير هموم... كل واحد وقسمو ومكتوبو... وهكذا تفوت الايام تجري كما بعضها نهار كما الليل والليل كما نهار نفس روتين ونفس لحياتة زعما وش مخبيتلنا الايام....
