نحكي لمكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 201:
قاعدين يهبطو في سلعة مع بعضاهم... هذا 3 سبيطار فاتو عليه... بعيد شوي على لمدينة... وقف يمسح في جبينو من لعرق...
ايمن: والله غلبة صح...
حمزة: وش راح نعملو هذي لخبزة...
أيمن: ياولدي راني مع جري نتع العرس والخدمة قريب نهبل...
حمزة: حتى انت زربتي روحك...
ايمن: هذاك هو خير ما نظل طالع هابط معاها وناس تحكي...
حمزة: عندك الحق...
ايمن: وانت وش عملتي في حكايتك...
حمزة: وانا حكاية...
ايمن: ماتلعبهاش عليا... من أيام وانا نحوس نسقسيك...
حمزة: على وش تسقسيني اولدي... حكاية ماكان منها والو...
ايمن: ايا مليح لانو الي يشوفك على عصابك مايقولش هك...
حمزة: عيطلها اكثر من مرة ماهزتش وفي لفيس مادخلتش من هذاك النهار...
ايمن: تسمى حوستي عليها... انا نقلك استعرف على الاقل بينك وبين روحك...
هز لورق في يدو: ماعندي علاه نستعرف... هي خيىت تبعد نظن احسن ليا وليها... لانو وقت هذا مانقدر نوعدها بحتى حاجة... انا اصلا روحي كارهة...
ايمن: ربي يهديك برك تلقى وحدة كما ياسمين وتشرك فمك... كون جات وحدة خلاف راهي طيحتلك وبلوكاتك طول مش غير...
حمزة: هو عندك الحق اما ثاني شوف من جيهتي...
ايمن: وش نشوف هذا عجبك دري الي كنت طايح معاها خماج في خماج...
حمزة: اني داخل يكاشيولي درك نرجع...
حركلو راسو من غير مايحكي معاه خرج تلفونو حط رقمها... ثواني وهزت...
جميلة: هلا ايموني...
ايمن: وش قتلك على حكاية ايموني...
جميلة: خلاص هاه ماعدتش نقولها...
ايمن: روحتي ولا مزال...
جميلة: لا مزالني راني في طريق... طالعة عند حورية لخياطة...
ايمن: تسمى انت عدت نهار كامل تفوتيه برا اااه...
جميلة: الله غالب وش راح نعمل انت الي حصرتنا بلوقت... والله ماعدت نلحق نحك راسي...
ايمن: على هذيك رقدتي لبارح تشخري وخليتيني نحكي وحدي...
جميلة: اها ياك تتمسخر مانشخرش انا...
ايمن: موالفة نكذب عليك انا...
جميلة: لا...
ايمن: خرجتي لورق لقتلك عليهم... هذاك هو باه نحط دوسي في البلدية...
جميلة: ايه خلاص خرجت...
ايمن: هيا نخليك جاء حمزة... ماتطوليش برا وكما تدخلي عيطيلي اوكي...
جميلة اوكي رد البال على روحك...
ايمن: حتى انت تهلاي...
حمزة:راك طايح في حبك درباني...
ايمن: نعمل في جهدي إن شاءلله نكون في المستوى...
حمزة: صاحبي راجل قدها وقدود... بيناتنا برك رجلة بديت تطيح فيها صح؟
ايمن: وحد زي... ايا نتغداو من بعد نكملو...
حمزة: ايه علاه لا خلاص عليك...
ايمن: هيا برك والله ماتحشم ماتقولش راح يزوج نعاونو مش نزيد عليه...
طلعو في كاميون وصلو بحدا مطعم نتع العادة... هبط ايمن الاول حكم طابلة... لحق عليهم حمزة بعدما لقالها بلاصة في باركيينغ... دور راسو يحوس عليه... وقت هز يدو ايمن يشاورلو شافو اما جات عينو عليها قاعدة مع وحدة ما يعرفهاش... قلبو ضرب مسح على رقبتو مسمر في بلاصتو...
