المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 239:
بعدما تاكدت مكان حتى واحد خرجت من بيتها... هابطة في دروج بسيف... دخلت للكوزينة شافت امها واقفة مع لعشاء... جبدت لكرسي قعدت شيء خلى وردة تدور تشوف معاها تحكي...
وردة: صحا نوم... خمرتي بلاصتك كرهت منك...
سولا: إممم خمرت وش عندي نعمل كما نوض... يكفي الي راني فيه... النوم هو الحل
دارت تكات على رخامة وطوات يديها وردة: نظن الي راكي فيه بسبتك وحدك وبسبب طيشك صح ولا راح تنكري كما كل مرة...
سولا: اكيد وش راح نتوقع راح تقولي بنتي مسكينة ضربت... بنتي مسكينة صار فيها...هاني خلصت غلطة نتع واحد غيري...(هزت حبة تفاح عضت منها ) هذا طبيعي وش راح نتوقع يعني ...
وردة: بانتلي غلطتك وحدك... وقت كنت تطاوعي في اميمة... كنت تخمي في خاوتك رجال وموقفهم... احمدي ربي طحتي في يدين حمزة... كون جاء معتز كون راه ذبح*ك وماخممش مرتين...
سولا: خليني منها لحكاية ماما ياك فاتت ياك خلصتها علاه تبقي كل مرة تجبدي فيها...
دارت عطاتها بظهر: انت حطي عقلك في راسك...مش كل مرة نقلك انسي عليا هذاك انت تعمل لعكس... اصلا راجل زوج ونساك انسايه انت ثاني...
دورت وجهة حاكمة دمعتها: هههه نعرف نسان واليوم عقد ودار مرأة اخرى نعرف كل شيء حتى انا ماعدتش سامعة بيه... تهناي منا وجاي حتى نشوفو نبدل طريق يكفي تبهديل الي تبهدلتو معاه...
داقت شوي من جلبانة وحطة مغرفة وغطات طنجرة: احسن...(رن تليفون سولا «أميمة » دوراتو لامها )
سولا: بنتك أميمة...
وردة: اممم هز عليها وش تستني...
طلعت عينيها لفوق كارهة وهزت...
سولا: اهلا ميمو لباس؟
أميمة: مانيش لباس طاطا بحداك؟
سولا: ااا طاطاك (حركتلها وردة راسها بمعنى قلها لا...) ايه اي هنا بحداايا اصبري نفوتهالك...
حطت وردة يديها على تلفون (معليه نحاسبك عليها من بعد وردت على اميمة )
وردة: اهلا بنتي...
أميمة: اهلا بيك طاطا... وش حوالك لباس؟
وردة: لباس الحمدلله وانت...
اميمة: والله اطاطا راني قاعدة على جمر... مش قتيلي راح تلقاي حل... اما نشوف فيك ماعملتي والو...
غمضت وردة عينيها: يابنت راني فهمتك لحكاية قتلك اصبري لكان حمزة من مكتوبك مايكون غير ليك...
اميمة: انا حرت فيك كيفاه قبلتي بلبايرة هذيك... وانت وعدتيني ماتقبليش بيها...
وردة: وش تحبيني نعرف بنتي كون ماقبلتش راح يزوجها بسيف علينا الكل... ياك لدرك مزال مكان والو.. اصبري وخلاص...
اميمة: مانصبرش مانقدرش نبقى حاكمة بلاصة نستنى فيه يحن عليا... ولا نستناه حتى نشوفو يزوج بيها... ياتتصرفي انت ياخليني نتصرف...
تنهدت وردة: يابنت وش راح تعملي ماتتهوريش تخسري علاقتك بيه...
أميمة: ماتخميش كونك مهنية نعرف كفاه ندخلو...
وردة: وش راح نقلك... اعملي الي يظهرلك من بعد ماتجيش وتلومي عليا اوكي...
اميمة: اوكي وصل الميساج طاطا... انا نخليك بسلامة...
قطعت الاتصال ومدت تلفون لسولا الي كانت حاطة مرفقها على طاولة مكالية خدها تشوف مع امها الي وجها حمار من سخانة الي طلعتلها... حكمتو عليها تتبسم...
سولا: حتى حمزة ومامنعش منكم...
وردة: اقفلي فمك انت احسنلك لعشية هذي...
سولا: هههههه اكيد نقفل فمي... اما ماما مرة هذي راك تلعبي بنار... حمزة مش سولا ضعيفة الي تعرف تبكي وخلاص... خليه يعيش حياتو كما يحب... وياسمين طفلة مليحة خصك انت تشوفي من زاوية الي يشوف منها ولدك والي مخلياتو فرحان... (وقفت تكات بيديها زوج على طاولة)... ماما خمي مع روحك مليح ماتخسريش ولادك بلواحد كما خسرتي سولا (تبسمت معاها ودارت طالعة لبيتها خلاتها واقفة تشوف معاها )
دخلت لبيتها غلقت الباب وتكات عليه... حطت يديها على فمها تكتم في شهقاتها... دموعها تسيح وحدها مش قادرة تتحكم فيهم... اليوم هي الخاسرة لكبيرة... خسرت راجل احلامها وحب صغرها الي راح زوج وخلاها... خسرت محبة خوها الي كانت حطاتو كما باباها... تتحصر على حنانة الام الي تتمنى انها تدخل وسط صدرها وتبكي عندها تمسحلها على شعرها... توقف معاها مش ضددها... مسحت دموعها وجبدت نفس كبييير... هزت تلفونها تشوف معاه... بعدها رماتو على طول يديها حتى تكسر... بقات تشوف معاه قعدتعلى حافة سرير تشوف مع الفراغ...تخمم في حياتها كفاها راح تقدر تصلح الي كسراتو ...
