💎🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 178:
وقت فقت صباح... تفكرت ميساج الي خلاهولي... قريت اكثر من مئة مرة... كل مرة نفسر بشيء... تكسلت نثاوب مزال مافقتش مليح... هبطت رجليا من سرير حطيتهم على لارض طول هذي عادتي الي نحبها لحمي شوك من لبرود... بعدها لبست في رجلي... بدلت قشي ولبست جبة نتع دار مانحبش ندور بلبيجامة قدام بابا وتوفا... تفكرت ايمن عضيت على شفت هزيت تلفون دخلت لرقمو من غير تردد كتبتلو ميساج «صباح الخير »... حطيتو وخرجت نعمل روتيني كما موالفة وهبطت للكوزينة نوجد لفطور لقيتهم سبقوني وديجا تقهواو وكملو اول ماشافتني مريم تبسمت...
مريم: شمسك طالعة اليوم...
جميلة: والله ماحسيت بلوقت ولا حتى كفاه طلع نهار،...
فضيلة: حتى انت تعبتي بزااف البارح جامي شفت عروسة اليد بليد معانا في كل شيء...
هزت كاس قهوة من غير حليب طول عمرها تكره لحليب...شربت منو وهي تحكي...
جميلة: مهم فاتت على خير...
مريم: درك جايك جري نتع العرس...
جميلة مزال الحال ياك مزال ماحطوش تاريخ...
فضيلة: يا حسرتك ههه باباك قال بعد شهرين هك تفاهدو رجال...
حلت عينيها فيها داهشة جميلة؛: كفاااه وااا مايكفيش الوقت وقتاه راح نوجد قشي... والحوايج الي ندي...
مريم: هههه لعريس زارب اكيد شافك داخ ...
فضيلة: يابنت وش راح تعملي انا وحايرة كفاه #المكتوب جاب ولد فضيلة لبنت...
جميلة: ماما بصح الوقت مايكفيش وانا مزالني ماتعرفت عليه مليح...
فضيلة: دوك تتعرفو عادي...
عند ايمن....
بكرت صباح انا ونوم مش صحاب بزااف... شربت قهوتي معاها وهي كل مرة تشكر في كنتها... مرة في امها توصي فيا لازم نوالف ونحاول كفاه نوالف بطفلة بما انها ولات على اسمي ... حطتلي قائمة نتع قضية... هبطت قضيت للغداء لحليمة ... انا قاعد ندور وصلني ميساج... حليت قريتو تبسمت... ماتعرفش تعبر ههه... خلصت سيد حطيت سشيات في طموبيل ووقفت تكيت عليها حطيت رقمها عيطتلها اكثر من مرة ماهزتش... هذا شيء الي نقلق منو... درك وين بعتت ميساج وهاي ماتهزش... تبدا تعمل روحها ثقيلة وتخلاط نتع نساء الي نكرهو... وليت دخلت لطموبيل طلعت لدار حطيت القضية... وفت للقهوة لقيت ولاد الحومة ڨصرت معاهم وعملت قهوة... حتى دخلني رقمها... كنت مش راح نرد اما وقفت بعدت على الحس و رديت...
أيمن: صباح الخير...
جميلة: صباح الخير...لقيتك معيطلي ماسمعتوش هبطت نفطر...
ايمن: تفطري درك ماتقوليش صبحتي راقدة...
جميلة: اممم طار عليا نعاس مارقدت الا ماطلع نهار...
ايمن: تولهت منك ساهرة...
جميلة: وي كنت نقرا في كتاب pdf...
ايمن: مليح وش كنت راح نقلك... وجدي روحك نعيط لعمي سليمان نخرجو اليوم...
حلت عينيها بعدها رمشتهم بزربة...
جميلة: كيفااااه...
أيمن: كما سمعتي قلت خلي نتعرفو شوي ومنها نحكو في امور تخصنا...
جميلة: لازم نشوف مع بابا ايمن مانقدرش نخرج بلال مانشاورو...
ايمن: نظن ماسمعتينيش وش قلت... قتلك نعيط لباباك ونقلو اكيد مش راح نخرج مع مرتي بتخبية...
جميلة بحشمة: اكيد
ايمن: هيا وجدي روحك ساعة ونجي نهزك من قدام دار... سلام...
قص عليها تلفون خلاها ترعش من خلعة واقفة متسمرة... بعدها هبطت تجري لعندهم....
جميلة: ماما اجري ايمن عيطلي قالي وجدي روحك نعيط لباباك نخرجو...
فضيلة تغسل في لماعن من غير ماتدورلها: من حقو هذا لازم يتعرف عليك... اما من غير مانوصي كل شيء في حدود المعقول... لكان قبل باباك ماتطوليش لبرا معاه...
جميلة: من غير ماتوصي ماما... ودرك وش راح نلبس...
دارت شافت معاها هازة فيها حاجبها: علاه طزينة نتع القش هذاك الكل الي شريتيه ماعجبكش...
جميلة: لا مش هك اوووف هههه تخلطت ... ويني ميمي نشاورها وش نلبس
فضيلة: راهي في البيوت الفوق تنفض فيهم...
جميلة: انا نطلع نشوف معاها غير هي الي تفرزنيى...
