🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 189:
هابطة في دروج هازة كاس شكولاطة سخونة... لابسة طبليتها دوسي نتع مريض في اليد لخرى... عاقدة حواجبها تقراى في المعطيات الي كاتبينهم... وقفت في اخر درجة كملت تقرى... حتى يوقف مقابلها مربع يديه... وقت حكى طلعت راسها...
اسامة: واخيرا شفناك...
هبطت هذيك درجة رشفت من كاسها وكملت عادي وكانها لا سمعاتو... تحاول تتعامل بعدم اهتمام اما سبقاها حكمها من دراعها محبسها...خلاها تشوف معاه ومع يديه الي حطها هبطتهالو بكل برودة اعصاب...
اسامة: علاه هاربة مش راح ناكلك بانتلي صح...
سلمى: ماتكلني ماناكلك... من عرفتك ماشفتش الخير صدمة وراء اختها... ياك وصلت وين حاب درك اخطيني واخطي جرتي بكل... نظن هك مش صعيب تفهمها لا...
اسامة: علاه تخشني في راسك ياك قتلك حاب نكون معاك ودرك مكان حتى حاجة تمنعك...
ضحكت مدورة وجها عضت على شفتها تحتانية: تعرف صنفك وصنف محمد وصنف رجال بزاااف كيفكم تعيفو... عدت انا مرأة نحشم نشوف في وجوهكم... تحساب بعدما شفت هذاك الفديو هذاك خلاص نكمل مع محمد نرجع معاك... علااااه اااه تحسابوني لعبة وكل واحد فيكم يجبد فيا من طرف... ههه نحب نبشرك سي اسامة من نهار قررت نتخلى على اب ولدي من غير مايرفلي جفن... تاكد انو سلمى الي بحداك مستحيل تشوف لا معاك ولا مع غيرك... حبك الوهمي وحبك انك تتملكني بنسبة ليا زايد وفي نفس الوقت ناقص يعني يساوي صفر... ومن اليوم روح شوف حياتك احسنلك لانو القطة كما كنت مسميني طلعولها ظفار تخبش بيهم... من شان ولدي نحرق الاخضر واليابس... فعافيني يرحم والديك ياولد الناس... ماتخلينيش نتصرف تصرف اخر معاك تندم عليه...
اسامة: احكي الي حبيتي نعرف وقت غش ويفوت... ماصيرك تكوني ليا... واحدمايقدر يديك المرة هذي يطول زمان ولا يقصر راح تكوني على اسمي... وولدك راح يكون ولدي... من غير ماتعبي مخك صغير ولا تطيبي هذوك العينين...
سلمى: هههه نسقسيك (وقربتلو خطوة ) حكاية هذي وين مسلسل شفتيه إممم... روح يابابا شوف حياتك وفوتني احسنلك واحسنلي...(ودارت ماشيا ماعطاتوش فرصة تزيد تسمع تفاهة الي راح يحكيهاخلاتو واقف مسمر...)
وقف مدة يشوف مع خيالها... بعدها حط يدو في جيب طالع... حتى حبساتو وسام اول ماشافها واقفة على درجات الاولى من دروج... تبسملها طالع
اسامة: مشاغبة تاعي علاه ناضت من بلاصتها وهي كانت تعمل في لاكسيجين...
وسام: لا وليت مليحة قلت نهبط شوي نشم هوى...
اسامة:قصدك تشمي البرد... اطلعي قدامي بارد الحال عليك وانت درك كنت قريب تعدي...
تبسمت معاه طلعت درجة وعاودت حبست سقساتو...
وسام: لدرجة هذي تحبها؟
اسامة: شكون؟
وسام: حكيمة الي كانت معاك... سمعت وش قاتلك مكانش قصدي...
اسامة: اممم نحبها...
وسام: بصح هي ماتحبكش علاه تحتم عليها...
اسامة مزالك صغيرة على لحوايج هذي ماتقدريش تفهميها... ارجعي لبلاصتك من بعد نجي نشوفك اوكي...
حركتلو راسها... وهو سبقها طلع ... مشات بخطوات رزان تحس بقهر العالم الكل فيها... دقات قلبها زادو وصلت لشمبر الي كانت فيها وقفت مدة بعدها كملت ماشيا حتى وصلت للبيرو تاعو طبطبت مرتين ودخلت... هز راسو على دخلتها...
معتز: اهلا اهلا بجعفر زارتنا براكة صحبة... بقات واقفة تشوف معاه وكانها حابة تبكي عقد حواجبو مافاهم والو طفلة الي لسانها مايسكتش واقفة وساكتة صدرها يطلع ويهبط... قربلها حكمها من يديها قعدها على لكرسي وجبد كرسي ليه مقابلها...
معتز: وسام وشبيك وش صرالك...
حركتلو راسها من غير ماتجاوب دموعها طاحو... خلاتو مافهم شيء... بصوبعو طلعلها دقنها خلاها تشوف معاه...
معتز: وسومتي مش وعدتيني دايما تضحكي اممم... علاه درك تبكي وش الي صرا...
وسام وهي تبكي: يحب وحد اخرى معتز... سمعتو بوذني يحب وحدة اخرى... انا يشوف فيا صغيرة...
معتز: وانت علاه تبكي اااه... مريضة راكي شوفي قلبك نسمع فيه لهنا...
وسام: خلي نموت نتهنى وعلاه عايشة اصلا حاجة ماتصلح فيا...المرض نمشي خطوة ندوخ... ولا قلبي الي خاني وحب عبد غالط...
معتز: مش فهمتك من قبل لازم تحطي الاحتمالات الكل في بالك اااه... علاه تحبي تقتلي روحك على جال واحد ماخممش يحبك... يلعن بوه الحب الي يخليك تموتي ولا تقهري روحك...
وسام: راهي حاجة مش بيدي والله
تنهد يمسح على لحيتو: وسااام فيقي مع روحك نحب يرجع جعفر صاحبي مش طفلة الي ساحت بمجرد ماعرفت الي يعجبها بحب مرأة اخرى...
ضحكت تمسح في خشمها: اما نجيبو لشبكة نجيبو وانت تعاوني...
معتز: ههههه مي مريضة صح... هذا وين كنت تبكي عجب فيكم انتم نساء... ايا طيري عليا خلي نخدم تحبي نبداها من الاول بعدا...
وقفت تضحك: هاني رحت هي حلت الباب... تلقى وحدة داخلة هازة اوراق في يديها خلاتلها طريق تدخل وكملت طريقها... حكمهم عليها معتز يحكي...
معتز: كون قلتيلي جيت هزيتهم عليك تقال هك...
ملاك: عادي موالفة بيهم... تحب نبداو برك...
معتز: يالا...
