المكتـوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 235:
البيت مظلمها مايبان منها شيء... اصلا جو لبرا مغيم وقطرات لمطر طشطش... راقد على كرشو حاط لمخدة على راسو... حتى لخدمة ومراحش ماعندوش قدرة لا للخدمة ولا لحتى حاجة... هذاك سبيطار يفكرو فيها ... وكل زاوية فيه تنطق بإسمها... خلات في قلبو غصة كبييييييرة... تلفون يشعل ويطفىء محطوط على سامط... ملاك من صباح تعيط عندها من ماتت وسام ما حكاش معاها ولا حتى عيط سقسى عليها... الباب يدقدق ماسمع مافتح... حتى حلاتو من غير حس ودخلت قابلها تلفون شاعل... قربت قعدت على حرف سرير... هزت لمخدة من فوق راسو وحطت يديها على شعرو تمسح عليه ...
وردة: معتز نوض ولدي صبحت راقد... حتى لخدمة ومارحتش...
طلع راسو شوي فاتح عين ومغمض عين معتز: صباح الخير (عاود رجع لنفس الوضعية )
وردة: صباح النور... نوض اغسل حالتك ونقص من لحيتك الي هاجت ... وسام ربي يرحمها ودنيا ماتحبس عند حتى واحد... هي درك في قلوبنا حية...
معتز: ماما خليني نرقد مش حاب نوض ومش حاب نحكي في حتى حاجة...
وردة: لازم تفيق على روحك ماتبقاش غافل نوض شوف امورك تلفونك تحرق برتقالتك تطلب فيك وتعاود وانت مخمود...
قعد معوج راسو يشوف معاها: حتى تلفون مامنعش وقريتي شكون يطلب... مقواك يما مايخفى عليك شيء...
وقفت راح لريدو بعداتو وفتحت شباك دخلت هذيك نسمة لحلو جبدت نفس منها... قابلتها حليمة واقفة فيبالكون تنشر في لحوايج... شاورتلها من بعيد وعاودت دارت ليه تحكي...
وردة:يالا شوي ونلقاك لتحت...
معتز: اووووف تحرمو على لعبد يرقد براحتو...
وردة: نوض برك خمرتي حتى بيتك تغمت منك...(خرجت وقفلت الباب )
هز تلفون يشوف معاه لقى الف مكالمة... نفخ كاره وبعدها رماه فوق سرير... ولبس في رجليها... خرج عمل روتينو وهبط فطر بعدما بقى يحكي مدة مع وردة... طلع لبيتو بدل حوايجو هز تلفون تاعو وخرج... هبط للقهوة طلب وحدة دوبلي حكم بلاصة مقابلة طريق وحط رقمها هزت بلوقت...
ملاك: صباح الخير
معتز: صباح النور برتقالة ... وش الاحوال؟
ملاك: لباس الحمدلله سوال عليك؟ وينك علاه ماجيتش اليوم ستنيتك...
معتز: ماقدرتش نجي تعرفي سبيطار هذاك يفكرني بيها...
ملاك: اما راح تجي اليوم ولا غدوة...
معتز: نعرف راح نجي اما فترة هذي مانعرف...
ملاك: بصح هك تطول فيها على روحك... وممكن تخسر خدمتك ثاني....
معتز: #مكتوب وانت علاه متحيرة عليا؟
ملاك: تحكي صح معتز؟
عقد حواجبو يترشف من قهوة تاعو معتز: نحكي صح ايه مش كنت مانهمكش...
ملاك: شكون قالك ماتهمنيش... ماشفتيش قداه من مرة طلبتك وانت ماهزيتش... ماشفتيش كل مرة نعاودلك ومكرهتش... كون جاء واحد ما يهمنيش ... راح نبقى نطلب ونعاود ومانملش اممم...
معتز: وش معناها؟ نحب نفهم وش نعنيلك انا؟ ياك طموحك اكبر من إنك تحبي...
ملاك:ماتحكيش هك معتز... كزن جيت ماتهمنيش راني مش قاعدة نحكي معاك... انت نص نهار خدمة بلا بيك حسيت روحي يتيمة....
يشوف مع رايح والي جاي معتز: المعنى...
ملاك: المعنى توحشتك معتز توحشتك... مكانش متوله مع هدرتها حتى تفتحو عينيه مع كلمة لخرى... تنهد مسح على شفاتو تحتانية يحكي...
معتز: محلاها كلمة توحشتك من فمك... حتى انا توحشتك ياروح معتز...
ملاك: هههه بصحتك طيحتني على راسي...
معتز: انت الي بصحتك خليتيني نجري وراك هذا الكل... يأمو راس يابس
ملاك: ههههه مش كنت برتقالتك اممم ولا تبدلت لحكاية درك...
بدل تلفون لجيهة لخرى معتز: نن جامي تتبدل انت برتقالتي وحدي...
ملاك: اممم وكون نطلب منك طلب تعملو؟
معتز: ايواااه راح نبداو...
ملاك: اوووف سامط بطلت اسيدي...
معتز: هههههه احكي برك ادللي حبي اليوم يومك...
ملاك: نحب نشوفك درك... (شرق في لقهوة ولا يكح)
ملاك: بإسم الله... مكانش ماء بحداك؟
مسح على صدرو وقف جاب قرعة ماء صغيرة شرب منها ورجع هز تلفون معتز: تحكي صح ولا انا سمعت غالط...
ملاك: اوووف خلعتني... علاه وش فيها كون نشوفك...
معتز: بصح راك تخدمي درك وقتاه نشوفك...
ملاك: ساهلة نطلب نص نهار ونخرج عادي...
معتز: مشات معاك نفكر طموبيل ونجيك...
ملاك: اوكي نستناك باي...
معتز: وين باي شايحة من غير حتى حاجة تحت لحساب...
ملاك: وش تحب نقلك هههههه...
معتز: بانتلي عندك جفاف في لمشاعر...مكانش حبي ولا حبيبي ولا حاجة كيفهم تصبرني حتى نشوفك
ملاك: هههههههه مع الوقت نتعلمو مزالني جديدة...
معتز: ههههههه باهي نفوتوها اليوم...
ملاك: خليني درك نفرز اموري راك عد تعطل فيا...
معتز: راح نتوحشك اطفلة حتى نشوفك...
ملاك: ازرب روحك هههه...
قطع تلفون خلص القهوة وقف قدام باب القهوة يشوف مع لمطر الي تطيح بلخفيف..حط chapeau على راسو وهبط لعند سفيان... يفرز من عندو طموبيل...
