المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 234:
فات هذاك اليوم... وسام تدفنت وهي درك بين ايدن مولاها... كل واحد كفاه قدر يفوتها مع انها صعيبة... معتز ثلاث أيام وهو واقف على رجل واقف يكابر على روحو يحب يقوم بواجب الاخوة تاعو كما كان الحال... حتى لولاد وقفو معاه كانو مرة على مرة يطلو عليه... صح ماعندوش علاقة تجمعو بعايلتها اما حطوه ولدهم وكل حاجة فاتت على يديه ماقصرش... ياسمين نفس شيء بين جنازة والخدمة وباباها الي كل مرة يعيط يسقسي عليها مالقاتش وقت تحك فيه راسها وحمزة الي واقف معاها فرح وقت سمع برجعت باباها...درك راح تعيش كما لبنات راح تكون تحت ظل باباها...الي وقت تحكي عليه عينيها تلمع وصوتها يتبدل وكأنها حياة من جديد... كما احترم رأيها في تاخير لخطبة على الاقل حتى تنسى شوي...
**اليوم الاحد نهار لعقود نتع ايمن... راكبة معاه في طموبيل Bouquet de fleurs في يديها ويديها لخرى شابكتها في يديه... تشوف معاه وعينيها تلمع... فرحانة وفي نفس الوقت ما مأمناش خلاص ولات على إسمو... هز ايديها باسها فرحان ويحكي...
أيمن: واخيرا وليتي حلالي...
هبطت راسها حاشمة: الحمدلله والله وقت كنت راح نمضي وليت نرعش وحدي... قلت بالك نحلم وراح نفيق...
أيمن: الحمد الله فاتت على خير... صح غير لقراب جاو معانا... اما جازت روعة...
جميلة: كفاه قنعتي بابا نتغداو برا وحدنا...
أيمن: حبيت نفرح بيك وحدنا... ماحبيتش هذيك لقطات نتع تروحي لدارك ونروح لداري وخلاص من بعد نتلاقو في لعرس...
جميلة: احلى حاجة عملتها والله... اما مانطولوش تعرف نتع عايلة عاملين غداء لعماتي وخالاتي وش راح يقولو عليا هربت من درك بعد...
أيمن: ههههه روعة هذي ياك مانيش نعمل في لحرام... مرتي نحب نحتفل معاها على طريقتي واحد لا يسالني...
جميلة: هههه باهي اسيدي...
ڨار طموبيل وحل سبتة شاف معاها...هز bouquet رجعو لوراء...وحل Livre familial شاف معاه يقرا في اسمو واسمها وهي متبعاتو بعينيها وتتبسم تنهد حط يديه على خدها يحكي...
أيمن: إن شاءلله نقدر نصونك لاخر لعمر... والله لوكان يقلولي قبل بشهرين راح تزوج وتدير عايلة نكذبهم...
حطت يديها على يدو: متأكدة من هذا شيء ديت راجل وسيد رجال... وانا ثاني ماكنتش نتوقع يدخل راجل لحياتي ويسرق قلبي... وقربتلو بساتو على خدو فيسع وهربت... حلت باب نتع طموبيل وهبطت تجري... عملت حاجة الي جات في بالها اما كفاه راح يفهمها...
تبسم على هبالها أيمن: اصبري دقيقة نخلص باركينغ ونجي...(وقفت تستنى فيه حتى جاء شبك يديها في يديها راص على صوابعها هبط لوذنيها يهمس )
ايمن: مابقاش بزاااف كلها 15 يوم وتخلصي لفاتورة (بعد عليه غمزها وهي خدودها حمارو ثوترت هزت يديها تعدل في لخيمار وهو شايخ عليها...)
