🥀 المكتـــوب 💎🥀
⭐على عشقـــــك لامـــــــوني ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 188:
كل مرة تتقلب على جيهة... هدرتو عاودتها الف مرة... كل مرة تتاكد إنو الي قلبها اختارو مستحيل يكون ليها... عوامل بزاااف تمنع تكون معاه... تشوف فيه رجل المثالي جاها في وقت الي هي محتاجة شكون يوقف معاها فيه... صح مكانش علاقة مرسومة من غير اصدقاء ويعاون فيها لوجه الله... اما القلب واحد مايقدر يتحكم فيه... في عمرو 27 اما تخمامو في واحد عمرو ربعين وقت توقف معاه تحس روحها صغير تحب تحكم في يديه يقطعها طريق... مدت يديها هزت تلفون شافت ساعة لقاتها 3:24 نتع صباح وقت فات ولدىك جفن لاتحط على جفن... تقللت على جيهة لخرى... حتى خلعتها سلمى وقت حكات
سلمى: وشبيك تقول حوتة وقاعدين يشويو فيها... علاه مارقدتيش...
تنهدت ودارت على ظهرها عدلت لغطاء...
ياسمين: والو غير قهوة الي شربتها ماخلاتنيش نرقد...
سلمى: اممم هذي لحكاية فوتها على واحد غيري... من روحتي وانت تايهة... نحكي معاك عشرة مرات وانت في بير غارقة... وشبيها اختي تخبي عليا...
ياسمين: ماخبيتش عليك اما صح مكان والو...
سلمى: ياسمييييين من غير ماتحاولي تكذبي عليا راني حفظاتك... احكي وش صاير معاك...
طاحت دمعتها من غير ماتحس وتنهدت
سلمى: اواه هذي نشعللها ضوء...(شعلت ضوء تخلعت وقت شافت دموعها على خدها )
ياسمين: سلمى طفي ضوء ربي يسترك...
سلمى: ماتخوفينيش عليك ياسمين وش كاين...
ياسمين: نحبو اسلمى اختك طاحت على راسها...
سلمى: ماتقوليش حمزة (حركتلها ياسمين راسها ) علاه اياسمين هبلتي طفل اقل منك مزال دراري حنا لكبار ومامنعناش منهم... ياواحد صغير كفاه ماخممتتلهاش هذي...
ياسمين: وانا وين علبالي نظن هذي مشاعر مانقدرش نتحكم فيها... كل مرة نقنع روحي العكس... اما كل حاجة فيه تجدبني... ماعرفتش كفاه ولا وعلاه اما حبيتو... وقت حكالي على صاحبتو الي فضها معاها فرحت اما وقتقالي مستحيل يدخل علاقة لانو غلط وماعادش يزيد يعاودها لانو كرعاتو في نساء... حسيت روحي تخنقت ماقدرتش نتخيل انو في يوم من الايام راح يبعد عليا... خلاص والفتو من روحت وانا نستنى في مساج من عندو اما مابعتش... كون مانبعتش انا مايبعتش
سلمى: يكون منك لعقل... طفل مزال صغير ماهواش نتع مسؤولية... كفاه تحطي روحك في موقف كما هذا... يعني مالقيت وقتاه تطيحي غير درك ومع هذا... وزيد يمكن يشوف فيك كما اختو لكبيرة... علاه ماخممتيش فيها هذي...
ياسمين: معلباليش انا وين علبالي الله غالب حاجة فوق طاقتي...
تنهدت سلمى: وش راح نقلك... يعني ماكفاكش مشاكل خوك زتي على روحك بحمزة...
ياسمين: حمزة ماهواش مشكل... بلعكس حمزة فرحتي وقوتي حاليا... عدت نتمى مشكل نتع الياس مايفضش حتى نبقى تحت حمايتو... رجوليتو معايا تخليني فرحانة...
سلمى: اوااه بانتلي هبلتي ورجعتي مراهقة بعدما شبتي... فك عليك اطفلة وخرجيه من بالك لا تتصدمي مرة خلاف وقت يجي يقلك راح نزوج...
مسحت دموعها ودارت على جنبها عاطيتها بظهر... تخمم في هدرتها من جيهة عندها الحق ومن جيهة اخرى قلبها يقلها ممكن يكون كاين حل... طفات سلمى ضوء ودارت حتى هي على جنبها تخمم في صحبتها... وفي الايام الجاية كل وحدة حكايتها اصعب من اختها... تقول تكتبت عليهم العيشة صعيبة لازم دايما يحاربو باه يقدرو يبقاو واقفين... لكن لكل بداية نهاية...
فات هذاك اليوم ومن وراه ايام مكان حتى جديد غير ياسمبن الي تحاول تتهرب من حمزة كل مايعطيلها ولا يبعت ميساج ماتردش عليه... تحاول انها تبعد على قد ماتقدر المهم تنسى...تعلقها بيه راح يدمرها اختارت تبعد وتعمل حدود من الاول على إنها تغرق اكتر... اما كل مرة هي تبعد بجاست منو يفكرها فيه... كل ما يتحير عليها يبعتلها جوجيتا الي ولات ونيستهم درك كل عشية مع بعضاهم... سلمى الي رفعت قضية خلع وماهمهاش في دنيا الكل لا دارهم ولا باباها ولا حتى واحد وقف ضدها... جميلة وايمن الي بدات تحكي وتنسجم معاه مرة يفوتوها عسل مرة بصل مزال ماوالفوش بطبايع بعض اما الوقت هو الحل...معتز الي خلاص حكم الخدمة وبدأ يخدم وهو ووسام عاملين راس حربا في هذاك سبيطار...
