رواية بعنوان ..
#ذئاب_بشرية ...
.
الحلقة { 19 } ..
..
فشلت قعدت في مكاني لين سمعت نيروز تعيط عليا...
نيروز - ميساء بتموت بسرعة طلعها
..
لما سمعت كلمة بتموت فطنت لى روحي.. لا مستحيل نخليها تموت.... ورميت روحي فلبيسين وصلت عندها رفعتها بين يديا...
طلعتلها راسها ونقرب بيها لطرف البيسين... قيس ونيروز يستنو فيا...
شدها منى قيس وحطها علي الارض طلعت بسرعة وقعدت على ركابي قدامها.... وجها ابيض ناشف منه الدم وفمها ازرق...
مبلولة كلها شعرات طايحين على وجها.
.. قدمت يدي ترجف بعدتلها شعرها ... وجها مصقع خلا الدم يجمد في عروقي..
. ملكني الخوف... الخوف من ان نخسرها... الخوف ان يجي يوم ونعيش من غيرها.... نسمع في قيس يتكلم...
قيس- ليث ديرلها شي ولا بعد خليني اني ندير
..
رفعت راسي شفتله فهمني بعد وخلاني... حطيت يدي تحت راسها رفعته شوي وبديت نضرب بيدي على خدها... نضرب ونضرب وهي شي متحركتش....
رجعت حطيتلها راسها قربت وذني نسمع تنفسها ضعييييف هلبا....
حطيت صبعي في رقبتها نبضها ضعيف.... حطيت يديا على صدرها وبديت نضغط ونرخف نديرلها فالاسعافات الاولية...
. نرجع نحط فمي على فمها نديرلها فتنفس اصطناعي.....
عاودت وعاودت مرة واثنين وثلاثة لين يأست.... اخر مرة شهقت ترد فنفس وبدت تكح....
قلبتها على جنبها بسرعة وهي تكح وترجع في لميا لي شربتها..
.كملت رجعتها لعندي ضميتها لصدري وضغطت عليها... وهي ترجف بين يديا....
ليث - متخافيش حبيي خلاص كابوس وتم...متخافيش اهو معاك اني....
..
نشوف في نيروز مشت تجري جابت منشفة لفيتها بيها ورفعتها نبوس في جبينها وخدها مش مصدق الي صار.... طلعتها للغرفة ونيروز وقيس مسيبوناش ولا لحظة .. حطيتها علي السرير
..
نيروز - خليني نغيرلها ليث.. وانت امشي غير حتى انت مبلول ..
ليث - لا اني لي نغيرلها.... وانتي جهزيلها حاجه سخونه تشربها ..
نيروز - باهي تو نجهزلها ..لكن بسرعة لا تمرض ..
قيس- هيا نمشو خليهم براحتهم ..
..
طلعو وسكرو لباب... شفتلها باين عليها تاعبة مشيت للدولاب جبتلها بيجامة اكمامها طوال علي خاطر بتصقع اكيد...
قربت منها نحيت المنشفة وهي قاعدة ترجف وشفافها زرق... بديت نحيلها في دبشها بسرعة ولبستلها لببجاما....
جبت منشفة وحطيتها على شعرها نجفف فيه وبعدها خديت سيشوار باش يجف بسرعة .. كملت وعدلتلها مكانها وغطيتها قربت بست راسها...
جيت ماشي شدتلي يدي... رجعت قربت منها...
ليث - قاعد معاك... بنغير دبشي بسرعة ونرجع
ميساء - م ..متعطل..ش ..
ليث - حاضر ..
..
كملت لبست ودخلت فسرير بحدها حضنتها حطت راسها على صدري...
ليث - ياروحي انتي.. كيف حاسة روحك تو ..
..
"رفعت راسها تشوفلي ...نظرتها فيها خوف كبير.... "
ميساء - لما كنت في الميه ..حسيت روحي بنموت ..
ليث - اسسس ..متقوليش هكي .. ميساء تعرفي اني نموت من غيرك... سمحيني حبييي وراسك مدرتها بلعاني لما دفيتك... مش قصدي ..💔
..
"" رفعت يدها تمسحلي على لحيتي... ""
ميساء - متلومش روحك يا قلبي... نعرف مش قصدك... الي صار كله كان حادث
..
.
عند نيروز .....
بعد الي صار ...زدت تأكدت من حب ليث لميساء...خوفه عليها باين في عيونه تصرفااته وكل شي فيه ... اني كنت في حلمة معاه و هو استغل ضعفي...لكن مش بنفوتهاله بساهل...اني لتوا نشوف لقيس...كان هدا راهو درت الي في راسي ليا هلبا...لكن تو عندي حاجة شاغلة بالي وتفكيري كله... نبي نتأكد...زعما هو...نبي نقابله و نقلوله علاش خليتني...علاش سلمت فيا...علاش لوحتنا في شارع....
..
قص على تفكري صوته من وراي...
قيس - صغيرونتي ...
تلفتت لعنده ...ملامح وجهه ماتعبر على شي...كانه مش هو الي كان يبكي وخايف من ناار.. حطيت طاسة من يدي و قربت لعنده...حضنته..
..
نيروز - نبي نمشي من هني هيا نمشو قيس وراسك...
..
"" مسح على شعري...باسني من جبيني .. ""
قيس- نيروز احني جينا بنغيرو جو...و نبيك تتأقلمي وتتعودي بوجودهم...
هيا نطلعو لي غرفتنا ...نرتاحو شويه وننزلو بعدين نتعشو ...
نيروز - اي اي لكن مش تو...
قيس - مالا امتي مثلا...😂
انا - بصراحة نبي ناكل لحم مشوي... مبكري ريحته دوختني.. و بعد الي صار مافي حد كلاه...و اني جعت و نبي لحم مشوي تو...
قيس - صغيرونتي جااعت...باهي لكن مش لازم لحم مشوي يعني ..تعالي تو نجهزلك حاجة تانية..
نيروز - مهأه... نبي لحم مشوي اني ..
قيس- باهي هياا..
""....شدني من يدي و مشينا...تلفتت بصدفة للصالة نشوف في كواترو كبير في صورة لعيلة كلها...جبدت يدي من يده و قربت لصورة ... عيوني وساعت ..تلفتت نتكلم معاه و صبعي على صورة ...
نيروز - مش هدا غسان.. !!
.
هزلي براسه ...رجعت نشوف في راجل بجنبه ...
نيروز - هدا بوك..
قيس - لا عمي..
..
قعدت نركز في ملامح وجهه..
نيروز - و الي بجنبه منى ..
قيس - مرته ...
"" قعدت سارحة نشوف فيهم ...""
قيس- هيا تو مش قلتي جعانة...
..
تلفتت لعنده .نتبسم بسيف هزيتله براسي...
قيس- صغيرونتي خيرا وجهك تقلب في حاجه !
.
فوتت يدي على وجهي..خديت نفس...
نيروز - ااه لا لا ..تمام.. يا روحي هيا نطلعو لجنينة...
..
تبسملي و طلعنا...قعدت عالكرسي...نشوف فيه كيف متردد يولع الكانون..عرفته خايف من نار..نضت قربت لعنده ...شديته من يده رجعته لتالي ..
نيروز - يا روحي اقعد تو اني نشوي اللحم ...
..
هزلي براسه...و يديه ترعش...بسته من خشمه💋 .. و قربت للكانون ولعته و بديت نشوي و نتكلم نفس الوقت ...
..
نيروز - قيس...قولي شن قصتك.. مع نار علاش الخوف هدا كله منها ... لدرجة خوك كيف خايف عليك ...
درت نشوف فيه..يشوف للبيسين وسارح ...تبسم على جنب ...نزلت دمعة على خده...مسحها بسرعة.. جا بيتكلم قص عليناا صوتها...
..
نشوف في ميساء ماشية و تقرب...تشوفلي نظرا كلها حقد ...قربت لقيس حطت يديها على كتفه . وقعدت جنبه ...رفعت اللحم وقعدت تاكل وتتكلم ...
ميساء - قيس تتفكر لما جينا هني و معانا رسيل
قيس - اييييه يا حسرة ...
..
كبست على سكينة لي في يدي منى هادي الي يتحسر عليها....نسمع في صوته من تالي وتتكلم ...
قيس - ميساء صاحبتك امت جايه...
ميساء - في ليل تكون هني...
..
"" كبست على سكينة اكثر في يدي. ...حطيتها و رفعت صحن ناكل بي كل غل ...معرفتش كيف كملته و اني حاسة بوجع مرة يقوى مرة يخف في بطني ...رفعت راسي شفتلها جت عيني في عينها ..""
نيروز - مش على اساس احني بس هني شن مجيب صحبتها... !!
قيس - مانعرفش قالي ليث بي تلفون امس..قتله عادي.. عايشة في كندا و ماعندها حد هني قالت تجي بحدا ميساء ايامات...
نيروز - اممم باهي اني اهو طالعة للغرفة ...
..
تلفتت نشوف فيها...مربعة يديها و تشوفلي بخبث... تبسمت على جنب ..
ميساء - تعرف يا قيس نسرين بنت تهبل مافيش كيفها دير جو علاخير و ماتملش من القعدة معاها...
قيس - هههه باهي المهم مرحبتين بيها ...
...
عطيتها نظرت موت ...و مشيت طلعت للغرفه طربقت لباب قريب تكسر... نمشي و نجي في الغرفة...حسيتها تلعب معايا في لعبة امسخة ...
و اني في الوقت الحالي مش ناقصتها بكل... فتحت دولاب...ندور على حاجة نلبسها و نرقد نريح عصابي...تفكرت الصورة ..جبدت دبش كله من الاعصاب فرته في الارض ... ورفعت راسي نلقى كواترو صغير مقلوب على وجهه ..رفعته...عيوني وسااعو...هو نفسه الي شفته لوطة...عمه عم قيس..
.ضغطت عالكواترو في يدي..
.قعدت نركز في غسان و لبنت لي بجنبه...حسيت في حاجة ... احساس تملكني في لحظة...احساس الغضب و الوجع و نار الانتقاام ..🚫
..
حسيت بي قيس خش...رجعت الكواترو في مكانه...قعد يشوف للدبش المفرت...طبست نلم فيه و نتكلم..
نيروز - كنت ندور على حاجه متااعي مالقيتهاش...خيرك ركبت كملت سهر و استنيت نسرين ...
..
جيت خاشه للحمام...شدني من يدي يتكلم ..
قيس - غايرة..
نيروز - هه لا علاش بنغار ... سيبني نبي ندخل نبدل دبشي و نرقد...
..
جبدني لعنده اكثر...
قيس- الغيرة باينة في عيونك...علاش تكدبي..نبي نقولك حاجة ... اني عمري مانشوف لغيرك..و مستحيل ياخد منك حد في قلبي كوني مطمنه.... انتي تربعتي على عرش قلب قيس..
...
"" طبع بوسة خفيفة على خدي.. و جبد روحه... ""
قيس - بري بدلي دبشك و تعالي نرقدو مع بعضنا مخاطريش نسهر معاهم نبي نكون معاك..
..
هزيتله براسي ودخلت للحمام بدلت..وقعدت نشوف لروحي في المراية...
لميت شعري الفوق...فوتت يدي على رقبتي حسيت بخنقة و غصة....
كل مانفكر كيف بنواجهه قلبي نحسه بيطلع من مكانه ...
لكن لازم ساد ماضيعت سنين..عايشة في كدبة كبيرة...تبسمت على جنب...
عمري 19 سنة بس و صاير فيا هكي ...علاش ..علاش...ضربت بيدي على رخامة...طربقت بكاا ...بكيت لين تعبت...غسلت وجهي خديت نفس... نحس في روحي دايخه ....... عاودت بردت روحي و طلعت ... لقيت قيس ..💔
..
..
#يتابع ..
رايكم وتوقعاتكم ..
زعما شن قصت نيروز ...!!☠🚫
