رواية بعنوان
#ذئاب_بشرية
..
.
{الحلقة 12 }
.
.مانحس غير بنيروز جبدتني من يدي و طلعتني بسرعة......
قيس - نار لا نار. لا..نبي نمشي من من هني منبيش نار...
..
اني نعيط ونيروز بدت تعيط وتنادي في ناس ..شويه ونشوف في ناس دخلت للحوش يطفو ف نار .. ونيروز رجعتلي تجري وتكلم فيا وتبكي ...
نيروز - قيس قيس خلاص فيق ....
قيس- نبي نمشي...
..
بنركب في سيارة نيروز شدتني من يدي...
نيروز - وين بتمشي ... مش حتقدر تسوق في لحالة هادي ... تعاله امشي معاي لي عند امي ....
..
قيس- بعقلك انتي لدرجة هدي مش حاسة بي بوك ... اكيد مات ..
نيروز - و انت لدرجة هدي خفت من نااار...ع مااعتقد كل واحد فينا عنده اسبابه مش هكي ..
...
عند ليث.... داخل للشركة قابلني فهد عند الباب شاد وراقي في يده ويتبسم...
باين عليه نضم جو والصفقة بدت في يدينا.
.. ماشي لل مكتب ولي نخطم من جنبه يوقفلي ويرحب اصلا مافي حد منهم يقدر يتجهلني ولا يجرب نحرقه وهو حي...
دخلت للمكتب دخلت وراي سكريتيرة متاعي في يدها كدس وراق تبيني نوقعهم كلهم ....
..
ليا مدة غايب شاورتله بيدي تحطهم وتطلع... معنديش نيه نتكلم نحس في روحي تاعب...
طلعت وسكرت الباب رجعت نشوف لي فهد نستنى فيه يتكلم ...
فهد - سيد ليث المشروع بدا في يدينا وبناخدو نسبة 80%
...
نشوف في فرحة النصر في عيونه...
ليث - صحيت كان مربحناش راهو مسحتهم .. المشروع هدا مافي حد يقدر ياخده مني
فهد - في حاجة تانيه ..
ليث -تكلم شن فيه . ؟
فهد -قيس
..
سمعت اسمه تنطرت من مكاني شديته من صدره
ليث .. - تكلم خيرا صارله شي ...
فهد -لا ..لا ماصارله شي ..
..
حسيت روحي هديت لما سمعت انه اكويس ..بعدت عليه ورجعت لمكاني ..
ليث - خيرا مالا
فهد -رجع للبلاد اليوم
ليث -ونيروز !!
فهد - رجعت معاه اكيد لكن مشو لمكان مانعرفش وين بضبط
ليث - مش شغلك هدا وشن يخفى عليك !!
فهد -باهي تو نتصرف
ليث -سكر لباب وراك
..
فهد طلع لكن حسيته تنرفز لكن ميهمنيش اصلا مزال مانوثقش فيه.... شديت تيلفون بنكلم لحوش ونطمن على ميساء بالي مشغول عليها وحالتها مش عاجبتني... ماشية وتتدهور... مرات نحنلها ونحس روحي قسيت عليها.. لكن لما نذكر الي صار يرجع قلبي يقسى من جديد... اتصلت .....
ليث -الو
شغالة - اهلين سيد ليث ..
ليث -ميساء كيف حالها تو
شغالة - مزال تاعبة ناضت رجعت لين تعبت ومبتش تاكل شي ورجعت رقدت
ليث -شربت دوا!
شغالة -لا مابتش تشرب شي تبي ترقد وبس
ليث -حاولي معاها وكان مبتش ارجعي كلميني ..
شغالة - حاضر اهو ماشية نحاول معاها ..
ليث -وكان صار شي كلمني ..
شغالة - اطمن ...
...
صكرت لخط ..وتنهدت من قلبي... بتهبلني هادي طول عمرها تكره دوا... نتفكر لما كنا صغار وتمرض متبيش تشربه ... امها تناديلي نشدلها يديها وهي تفتحلها فمها وتشربها بسيف....
..
بعدها ترجع تبكي وتقول منبيش منحباش نحضنها نسكتها.... عنيدة ومتخلي حد يقربلها غيري وما تهدا الا لما تكون بين يديا وفي حضني...
تبسمت نتفكر يوم كنا نجرو وطاحت... تجرحت ركبتها شافت الدم ناضت تبكي... امها تحطلها فدوا وهي حضنتني وضاغطه عليا...
ولما حرقها دوا عضتني من كتفي قريب قطعتلي تشرت.... ههه
محلاها هديكه الايام ... قداش حبيتها لبنت هادي ساحرتني...
نبي يجي يوم ونسامحها ونرجعو زي قبل...
لكن الزعل والوجع عمولي قلبي .. كل منحاول نقرب نشوف لي صار بين عيوني ... نتوجع كيف قبل واكتر... نبي ننسى.. نبي نرتاح ونفرح... اه يا ميساء ليش درتي فيا هكي .... علاش درتي فينا هكي ....
..
رجعت نشوف في الوراق قدامي ونحاول نركز لازم نرجع نوقف لي خدمتي ولا تضيع مني....
نخدم وعقلي عندها..
...
..
عند ميساء.... نلقى روحي فلسرير... مانعرفش روحي كيف رقدت حطيت يدي على بطني وجع قوي .. دخلت لشغالة جايبتلي لماكلة ودوا معاها...
نضت ومزل نحس في روحي دايخة نمشي ونتمايل... دخلت للحمام نستفرغ لين حسيت معدتي بتطلع ....
..
غسلت وطلعت نشوف في وجهي فلمراية اصفر وذابل...
نحاول نتفكر شن كليت ...اني طول حياتي نختار ماكلتي ونتأكد منها...
المرة هادي معرفتش كيف شن صار شي ...
جيت طلعت من الغرفة نمشي وشادة فلحيط..
نسمع فلشغالة تتكلم عرفته هو لي كلمها...
نعرف على قد ما يكسح قلبه يقعد يخاف عليا...
نعرف مزال مجروح وموجوع من لي صار...
لكن حت اني موجوعة ووجعي وجعين..
. الي صار فوق جهدي وعدبني من جيهة وهو قاعد يعدب فيا من جيهة تانيه...
اني حاسة بيه لكن من يحس بيا اني ...
مني يخفف عليا ويفهمني..
. طول عمري نمشيله هو لي يستحملني يخفف عليا يواسيني وينسيني.. وتو بديت بروحي ماعندي حد نمشيله ولا من نشكيله ... رجعت للسرير موجوعة وتاعبة.. ماخاطريش نشرب دوا ولا خاطري ناكل.. نبي نرقد ننسى ونرتاح... 💔
.
عند قيس.. النار...اكثر كلمة نكرها...نار مجرد نشوفها ...نخااف منها...اي نخااف...مانحبهاااش...صح ناس كلها تخااف من الناار...لكن مش زيني ....على خاطر مش كل حد عنده قصة مع ناار ... ناار هي سبب في حالتي دمااري ...و جبروتي.. و قوتي تو... وفي نفس لوقت سبب خوفي...
..
نشوف في نيروز قربتلي اكثر.... حطت يدها على جبهتي ...
نيروز - قيس عندك حراره ...هيا نوض نمشو للمصحة تو....
نتكلم بالسيف جرح مزال يوجع فيا مش قادر نتحرك...
ليث - لا لا اكويس ..
نيروز - ستنى نكلم امي و نجيك...
...
طلعت ..منعرفش شن بدير ..
.تقلبت تكيت على بطني. ظهري نحس فيه بينقسم من الوجع ...
تيلفوني يرن بجنبي...خديته وفتحت لخط من غير مانشوف منى ... سمعت صوته ...ماكنتش نتوقع انه بيتصل بيا اصلا... سؤاله عليا لخبطني ...
ليث تواضع و سأل عليا غريبة...ايه و علاش غريبه بين الاخوة ..
.
ليث - قيس كيف حالك تو ..
قيس - الحمدالله.. شني استاحشت نيروز ..
ليث - علاش دخلت لبنت بيناتنا شن دنبها دخلها في لعبتنا... نبي نقولك ان عرفتكم وين ربع ساعة واحد من رجالي يجي يرفعها من غير مادير مشاكل ...
...
تبسمت على جنب..نعرف ان نيروز ماتهماش .. غروره عاميه و يبي يقهر مرته ...و لما ياخد حاجته يمشي لغيرها من وهو صغير هكي ...
..
قيس- من غير ماتعب روحك اني جايك اصلآ ...
..
صكرت لخط...صح قلتلها...معاش تشوفي حد فينا...لكن كل شي تغير تو...نعرفه مش بيخليها في حالهاا ....
قويت روحي... نضت...وقفت ...نشوف فيها جاية بي سفرة... وتتبسم...
كانه مش بوها الي مات محروق...
قيس - حطي سفرة وطلعي شنطك لازم نمشو...
..
حسيتها فرحت...استغربت...شفت الفرحة في عيونها...مانكدبش على روحي..حت اني فرحاان انها بتقعد معاي .. هزتلي براسها ...ومشت تجري لامها و اختها مش عارف شن قالتلهم ..
..
واني.جبدت فلوس من جيبي...قربت لعندهم...
تبسمت لامها ...حطيت فلوس في يدها ...
..
قيس - ماتفهميش غلط ... ونبي نقولك ماتخفيش على بنتك..لما تم لمشاكل كلها تو ترجعلك.. وطمنى عليها هي بتقعد مع امي.. و كل شهر يوصلك قد لمبلغ هدا..ونبيك ماتفكري في شي...
...
امها تبكي وتشكر فيا...نشوف في نيروز عيونها تعبو دموع...رفعت شنطة وطلعت من غير ولا كلمة...
...
لحقت عليها ... جيت بنطلع في سيارة ...
سيارة شدة فرينو قوي قدامي شويه لا طيرني... عرفته تابع ليث ...
نزل من السيارة ... قرب عندي...ويتبسم.
فهد - قيس...
قيس - فهد !!
فهد - لا عاد مانبيكش تستغرب... نخدم في خدمتي وبس...مديري طلب مني نيروز و اني بنرفعها ليه وبس ..
.
قيس- مديرك ! ليث " ههههههههههه اه يادنيا ... شني فهد على شن ناوي...
فهد - شي هات لبنت وبس ...
قيس - مديرك كلمني قتله اهو جاي برا على حالك...
تبسم قرب عندي اكثر...
فهد - كان جيت منعرفكش راهو مصدقتكش... يا برنس.. برنس هكي وله ...
..
نحاول نهدي روحي ...اصلا تو ماعنديش قوة لا نتكلم اكثر ولا حتى نضرب...
قيس- برنس ...و بنقعد ديما في القمة .. 😏
..
فتحت باب سيارة ...شاورتلها بيدي باش تركب.. ولعت سيارة و طرت...
نشوف فيهاا سارحة مع طريق...عرفتها تفكر في ليث..
..
قيس - تبي ترجعي تعيشي عنده ....
تلفتت شافتلي ...
نيروز - مني ...
قيس- ااه صار نسيتي ..
..
حطت شعرها ورا ودنها...
نيروز - لا ماعمري مانسيت لكن مانبيش ... اني بنكون معاك وبس ...
..
قلبي حسيته بيطلع من مكانه....متوقعتش تقولي هكي...شني سبب ليش قالت هكي... طلعت الكلمة بسيف...
..
قيس - متأكدة...
نيروز - اي... لكن من غير ماتسألني علاش ...
...
سكتت معرفتش شن نجاوبها برسمي صدمتني...شني اللي تبدل ...شني الي في راسها ....هالفرخة حيرتني...
منعرفش قداش فات وقت...نلقى روحي قدام حوشه ..... نيروز تلفتتلي مستغربة...
..
نيروز - علاش جينا هني ...
قيس - نبيك تنزلي و تقولي ان انتي معاش تبي تقعدي عنده..بعدها ليث تو يسيبك في حالك...ولا خايفه منه !!...
..
حسيت نظرتها بااردة...
نيروز - ماعندي علاش بنخاف ..
..
فتحت لباب و نزلت.. فتحتلنا شغالة...دخلنا لصالة ... نشوف فيه نازل من دروج... نظرت الانتصاار في عيونه...قرب لعندها...شدها من يدهاا جا بيتكلم... نطرتله يديه...
..
نيروز - حول يدك ...وعتقني...عندك مرتك اصحا على روحك..مش لعبة بين يديك...رديتني عبدة عندك ..
...
سكتت شويه...فوتت يديها على وجها بشويه...شافتلي و رجعت تشوفله وتتكلم بي صوت ثابت وقوي ...
..
نيروز - اني بنعيش مع قيس ... ومعندكش حق تدخل في حياتي...
..
قربت لي عندي شدتني من يدي... و كملت كلامها...
..
نيروز -انت عندك مرتك و حياتك و اني بصفتي شني بتخليني عندك...انت واحد اناني ليث..ومش فاهم راسك من رجليك.. نطلب منك تبعد عليا وبس... قيس هيا نمشو...
.....
ليث صفق بيده👏 يضحك بصوت عالي...نعرفه ماتحملش كلامها و نزل عليه زي صاعقة خوي و نعرفه مليبييح..
...
ليث - شني حفضك كلمتين و هددك باش تقولهملي...
...
اني منعرفش شن صارلي...حسبت بدوخة غريبة...يمكن لان جرح نزف هلبا وتعبت ... حاولت نمسك روحي لين نطلعو ...وقاعد نسمع فيه يتكلم و هي شده في يدي ...معاش سمعت شي...طحت تمديت على طولي...
..
.. نضت ..فتحت عيوني ..نلقى روحي في غرفة...مش حوشي هدا...عرفت روحي عند ليث ... تقعدت شويه...نلقى روحي عريان من فوق ولصقت جرح متغيره وملفوفه على كفتي لي حد ظهري.... .
وشويه ونشوف في نيروز داخلة.... دوب ماشافتني قربت بسرعة عندي...
...
نيروز - ارتاح ماتنوضش ...
قيس- لا هيا نمشو علاش قعدين هني ...
نيروز - ماهو انت مازل تاعب...
قيس- هاتي سورية متاعي ...
..
هزتلي براسها ....رفعت سوريه في يديها..ولبستني ... رفعت جكيت باش تكمل تلبسني... واني من غير مانشعر دورت يدي ليمين عليها و جبدتها لي عندي...يدها على صدري و يدها تانيه ورا رقبتي... انفااسناا تخلطت... نحس في دقات قلبي تقوى... قربت ليها اكثر
.....
قيس- علاش ديري في هدا كله...علاش اخترتي تكوني معاي... علاش اخترتي تكوني مع راجل ماتعرفيشي و يمكن في نظر الناس اني نجي بوك ولا حتى عمك هكي وله ... علاش يانيروز شني لي يدور في رسك ...
..
..
نتكلم و شفايفي قراب على شفيفها ..متحملتش اكثر...قربت اكثر بنطبع بوسة ...
في اخر لحظة تراجعت لما شفت ليث واقف وراها بضبط ...
.
..
.
#يتابع 🔇
#ميمي..❤
رايكم وتوقعاتكم ..🎤
.
