.رواية بعنوان
#ذئاب_بشرية..
كتابة ..
#ميمي
الحلقة ..{ 36 } ..
...
قيس - شافت الشيطان... 😈
.....
ضغطت على يدي...اخر شي توقعته يكون هو هني بالسرعة هادي...بكل خفة جبدت السلاح من ورا ظهري و تلفتت لعنده...وجهته ليه ......
.....
ادم - شن ادير هني ...
( تبسم مش عارف كيف يلعب بالفرد في يده زوز رجال وراه رافعين سلاح كبير ...)
...
قيس - شنى حضرة العميل خيرك تخلعت ... جيت بنرفع مرتي..
( ميل راسه على جنب يشوفلهاا... )
قيس - صغيرونتي ماستاحشتيش راجلك...
نيروز - مريض...
قيس :نيرررروز ..
..
( ضغطت عالفرد بيدي قربت لعنده خطوة نتكلم و نرص على سنوني... )
ادم - ردبالك تعيط عليهاا ...ولا حتى تمس شعرة منها...
قيس - ادم مادخلش روحك ...اصلا انت السبب في هدا كله انت اللي حرضتها عليا من الأول...
ادم - أني ! ههههه باهي...
قيس - باهي من الأخير بنطلع من هني و مرتي معايا...
ادم - مستحيل..
...
( تبسم على جنب فات من جنبي قرب لعندها...وخرت هي خطوة لتالي...)
نيروز - ماتقربليش قيس...
ادم -قيس واجهني كانك راجل علاش متحامي برجالك..و مستقوي على بنت صغيرة...
...
( تلفت لعندي شافلى ...رمى سلاحه عالارض نحى الجاكيت و رمااها ... )
قيس - بااهي هيااا ومانطلعوش من هني ..يا قاتل ياا مقتول...
( نشوف في نيروز اديرلي براسها لا...رميت سلاحي نحيت الجاكيت ... )
ادم - اكيد بنكون قاتلك بيدي يا سفاح...
( ضربني بونيه دخت شوي مسحت دم من خشمي...رجعت ضربته .. كسرنا بعضناا...يضرب و يتكلم في نفس الوقت... )
قيس - حضرت العميل شهد ع روحك ...
...
(عيوني تفتحو على وسعهم و ماحسيت غير بعيطت نيروز و سكينة مغروسة في جنبي....)
ادم - نيروز ما تمشيش...
( نتقوى على روحي نفتح في عيوني مانبيش نفقد الوعي..)
..
قيس -انت تجرأت وخديت حاجه ملك الشيطان ....خلص يا ادم حق اللي درته نتقابلو في دنيا تانيه ...
....
(ضاغط بيدي على جنبي ينزف...نشوف فيها قربت مني...حطتلي راسي على حجرها تبكي و تتكلم...)
....
نيروز - ادم سامحني اني السبب .. ماتخلينيش... 💔
( رفعت يدي بالسيف حطيتها على خدها نمسحلها في دمعتها...)
ادم - اششت نيروز ماتبكيش...نطلب منك حاجه بس ماتنسينيش نيروز ..اني نحبك هلبا انتي احلى صديقه و اعز من الناس كلها ماحبيتش تكون نهايتي معاك هكي...نيروز نحبك...❤
...
(تبكي اديرلي براسها لا...)
نيروز - عمري مااننساك ادم افتح عيونك ااااادمم ...
( نفتح و نسكر في عيوني شاد روحي بالسيف...تبسمتلهااا )
ادم - نيروز ردي بالك على روحك خليك قويه...بعدي عليهم عيشي حياة نظيفة...
...
(ناخد في نفس بالسيف نحس في روحي خلاص بنفقد الوعي على طول..حسيت بيه رفعها من يدها ..)
...
قيس- هيا نيروز امشي قدامي...
نيروز - سيبني مستحيل نخلي ادم...
نشوف فيها تفاارع فيه ....ماقدرتش نتحرك و لا نقاوم اكثر...عيوني تسكرو و فقدت الوعي .....💔
...
_________________________✔
....
عند نيروز ..
نفتح فى عيوني ونعيط بأعلى صوتي بإسم ادم تمنيت لو كان جي كابوس...ندور في عيوني في الغرفة ...حولت الغطا ونضت...حطيت يدي على راسي حاسه روحي دايخه...تركزت عالحيط نمشي بالسيف...جسمي كله مدقدق كإني ماكلة طريحة...فتحت الباب وقعدت نادي بإسم ادم...حوش مانعرفاش...شفت دروج نزلت درجة درجة...و اناادي عليه...ندعي في داخلي نكون نحلم مش حقيقة اللي صار...نشم في ريحة ماكلة ...قعدت نتبع لين وصلت للكوجينة عيوني وسااعو و اني نشوف فيه يطيب و مداير جو..يعني اللي صار ماكانش حلم يعني ادم مات 💔 ...
..
لكن شن اندير اني هني و شن صار في ادم خلاه ملوح في الغابه ! ...نطرت الكرسي قدامي ...تلفت لعندي رافع حواجبه مستغرب ..
....
قيس:صباح النور صغيرونتي ..
نيروز - وينه ادم و شن صاارلي شن اندير عندك هني...
(تبسم مش عارف كيف يمسح في يده في المنديل)...
قيس- الله يرحمه هدا مصير اللي يتجرأ يقرب ملك الشيطان
نيروز - لا برسمي طلعت مريض انت...تو ترفعنى لادم...
قيس- دفنوه الصبح تبي نرفعك لجبانة !
...
(قربت لعنده نتكلم و نضرب فيه ع صدره...)
نيروز - علاش ادير هكي قيس علاش هكي للدرجة هادي ارواح الناس زي الدبانة عندك تقتل وتمشي كأنه لا صار ولا كان...اني مستحيل نكون حبيت واحد زيك انت حيوان ناطق... انت ...
..
( قص على كلامي صوته من تالي تلفتت مصدومة...نشوف فيه على كرسي المتحرك...)
غسان - نيروز خلاااص...
نيروز - غسان !
..
(رفعت راسي شويه نشوف فيها تشوفلي من الفوق تبسمتلي و نزلت تجري...حضنتني...)
..
شهد - نيروز و اخير تلاقيت معاك...
...
من ااصدمة ماعرفتش نحضنها ولا حتى نقول كلمة...ماعرفتش كيف نتصرف...اعصابي موترة و كل شي خاش بعضه جبدت روحي منها و ركبت الدروج خشيت لغرفتي
...نمشي و نجي ...غسان و شهد شن ايديرو هني ومن جابهم بالسرعة هادي...اني هكى و نسمع في التلفون يرن تدكرت ان وقتها ادم رما الجاكيت تلفونه طاح رفعته دسيته عندي...قربت للسرير نشوف في اسم دجو خديت نفس نسمع فيه يتكلم
...
دجو -نيروز
نيروز - ايه كيف عرفت..
دجو - مش مهم...ضيوفك وصلولك بخير المهم ادم وصاني عليهم ...لكن قيس في لحظه بعث رجاله ورفعهم
نيروز - ادم وينه قولي بالله عليك...
دجو - ادم مات
( حسيت بدوخة قعدت عالسرير...ناخد في النفس بالسيف ونتكلم...)
نيروز - مستحيل هو وعدني مش حيخليني ..
دجو - الله يرحمه سامحيني لازم نصكر ...
....
صكر الخط ....ادم .لي اخر لحظة حققلي الطلب متااعي...ضغطت بيدي عالغطا ...
نيروز - قييييييس
...
نضت زي الثور الهايج...نزلت الدروج نعيط ...قربت لعنده دفيته بكل قوتي ونتكلم...
نيروز - بنقتلك قيس انت حرمتني من كل شي في حياتي صغااري ادم كل شي...
( تركز بيده على الرخامة ...)
نيروز - قتلته بيدك ضربتني من غير رحمة و شفقة...اني خلاص معاش نجيب صغار خلاص ...
قيس - كيف ..!!
( ضحكت بإستهزاء فوتت يدي على وجهي...)
نيروز - كيف... تعرف الشي اللي درته فيك شويه فضيحة هديكا ماتجي شي لازم اتموت انت مريض انت مجرم و سفااح...قداش نكرهك و معااش نطيقك...
..
( شدني من مرفقي ضغط علياا ... )
قيس - اسكتي اسكتي تبي تعرفي علاش اني هكي بااهي تو نحكيلك كل شي...
...
شدني من ايدي يكر فيا وراه ....دخلني لغرفته ..فتح الدولاب جبد صور مراه حلوه هلبا رمااهم عالسرير
.....
قيس- امي لا خسارة فيها الكلمة اصلا ...
( قعدت عالسرير رفعت صوره في يدي نشوف فيها ونتكلم..)
نيروز - علاش شن علاقة امك بلي درته كله...انت قتلت
هلبا بنااات و وصلت حتى اتاجر بالاعضاء و وصلت تشرب في دواء و تقرير طبي متاعك يقول عندك اعاقة عقليه من الدرجة الثالثة ... مافي ولا سبب مقنع يخليك ادير هكي قيس..
...
( نزلت دمعته على خده يطلع في الكلام بالسيف صوته مخنوق...)
قيس - لا في سبب يمكن ماايقنع حد لكن كافي لياا اني على خاطر اني اللي عشتهاا التجربه من لأول للاخير...
تنهد و قرب قعد جنبي تكى لتاالي حط يده تحت راسه و بدا يحكيلي...طريقة كلامه و نبرة صوته قسمتلي قلبي و زعزعت كيااني...رجع بيا لسنين لتاالي و عيشني تجربته بكل تفااصيلها....
....
_________________________ ✔
...
عند قيس ...
عمري 10 سنين في عطلت الصيف مشينااا بنفوتو اسبوع في الفيلا في*** .. بابا بالصدفة جااته خدمة بعد يومين اني و ليث خوي زعلنا هلبا كيف بيخلينا بروحنا بالرغم امي معانا لكن احني متعلقين بي بابا اكثر....ليلتهااا بابا مشى و طلعناا احني بنرقدو...في ليل اموخر طلعت للكوجينة نسمع في صوت غريب وقتها صغير مانفهمش لكن لما كبرت فهمت...💔
..
.قربت لباب غرفة نومهاا كان الباب يدوب مردود شفت من ورا الباب ...شهقت من المنظر اللي شفته...وخرت خطوة لتالي مرعوب...
و رجعت لغرفتي نجري فاتو ايام...و سنين و كبرت و واستوعبت و فهمت اللب قاعد ايصير ماقدرتش نقول حتي كلمة..كنت كنت شاهد على خيانة امي سنين ونفس المشهد تكرر اكثر من مره ... وفي نفس الوقت كنت شاهد على حب بابا ليها...يوم من الايام كنت اني وهيا في الفيلا ليث ساافر مع بابا و راسيل مع امي هدية في الجنينة...خشيت عليها غرفة النوم و سكرت الباب بالمفتاح..
.تلفتتلي مستغربة جت بتتكلم ضربتها كف..
قيي - ششش ولا كلمة ...شنى تجهزي في روحك لعشيقك ...مش عشيقك بس هماا هلبا ..
امي - هبلت انت تضربني شن تقول انت اه...
قيس - نعرف كل شي و سااكت سنين في الظلام و نسمع فيك...و نبكي بالعبره على بوي ....انتي وحدة خاينة تستااهلي الموت...هو حبك و عشقك و طلعك من الفقر لكن انتي بي شن كفيتيه اه كان يسمع و يعرف شن يصير فيه ...تخوني فيه مع اصحاابه مسختيله عرضه و شرفه وشن تاني مادرتيشي...و زياده تتسااومي انتي و صاحبه على خراب شركاته ..
..
امي - قيس سلم ولدي اسمعني...
( نطرتلها يدها دفيتها لصقتها عالحيط... )
قيس- غدوا تجي للاستراحة في*** باش نصفي حساااب بوي معاك...و كان ماجيتيش اني نفضحك عنده و عند ناس كلها....
...
طلعت و طربقت الباب...فاتت الليلة و طلع الصبح ولعت السيارة و سبقتها للاستراحة..ساعه هكي و لحقت عليا...رفعت راسي نشوف فيها ترعش كلهاا اشرتلهاا باش تقعد...قعدت مقاابلتني حطيتلها قدامهاا ورقة و وبيرو...
...
قيس - اكتبي اللي بنمله عليك...
امي - علاش شن بدير..
(تبسمت على جنب..)
قيس- اكتبي ...
...
( شدت البيرو بديت نمل عليها و هي تكتب... )
امي - علاش قلت الكلام هدا على شن ناوي...
قيس - على موتك ياا خاينة...
