..
كانت تصيح بحرقة .. ما كانت تتوقع شخص بمثل قوتها ينهار بهالشكل .. يا ترى وش سبب دموعك مشاعل .. من اللي يقدر يكسرك .. غفت بحضنها بدون ما تحس .. عدلت وضعيتها وغطتها باللحاف .. كانت نايمة بهدوء .. الا من هزات خفيفة كانت تتنهد فيها .. قعدت جنبها تدقق في ملامحها .. لأول مرة تنتبه أنها بيبي فيس .. ابتسمت مي وهي تبعد غرة مشاعل عن وجهها .. وتشوف اثار جرح قديم في مقدمة راسها وتحت الغرة .. مررت أصابعها عليه بشويش .. اسمعت صوت خلفها ..التفتت وما لقت أحد .. حست أن موقفها كان حرج .. لو دخل أحد وشافها .. كان فكر أنها تبوس مشاعل بوضعيتها هذه .. قامت وألقت نظرة أخيرة على مشاعل تتاكد أنها بخير .. وطلعت ..
ماجد بحنق : وش عندك هنا ..
مي تسكر الباب بشويش : ايش ..
ماجد : اللي سمعتيه .. وش تسوين عندها ..
مي ترفع اكتافها : ما كنت اسوي شيء ..
قرب ماجد أكثر ناظرها بنظرات ما فهمتها مي .. " وش كنت أفكر .. أكيد أن بينكم شيء ولا وش يخليك تنفرين مني .. بس أنت أمس .. كنت ... أخ .. بأجن ..." ..
مي : كنت نازلة وسمعت صوت في الغرفة .. دخلت وشفت مشاعل ..
ماجد يناظرها : دخلتِ وشفتِ مشاعل ..
مي : أيه .. وش فيها ماجد ..
ماجد هز راسه : ولا شيء .. تعالي ننزل ..
دخلوا الصالة سوى .. قعدت مي جنب ماجد على الكنبة الطويلة .. ابتسمت سعاد لما شافتهم داخلين سوى .. يا ليت مشاعل تكون عند كلمتها وما تقرب من مي .. وتكون مي لماجد .. باين من عيونه أنها عاجبته.. وشكلهم لايقين على بعض .. لكن يا خوفي مشاعل تغير رايها .. ونكون في مصيبة ما نقدر نطلع منها ..
نورة تكلم ماجد : متى بتسافرون ..
ماجد يبتسم : ان شاء الله بعد بكرة ..
نورة : وبتروحون كندا مباشرة ..
ماجد يهز راسه : بنقعد اسبوع في سويسرا وبعدين على كندا ..
نورة : اسبوع بس ..
ماجد يبتسم : وراي شغل كثير هناك ..
نورة : وش هالشغل اللي ما يخليك تقضي شهر عسل مع زوجتك ..
ماجد : وأنا باتركها بتكون معي ..
نورة : حتى لو .. أحلى الايام ايام شهر العسل ..
احمر وجه مي ونزلت راسها .. ماجد استغل الوضع ومسك يدها ..
ماجد يبتسم : كل أيامنا بتكون شهر عسل ..
نورة تضحك : ان شاء الله .. الله يتمم لكم ويرزقكم ..
كان ماجد في حيرة من أمره .. تصرفات مي وتعاملها يقول عروس خجلى .. لكن اللي شافه مساع في غرفة مشاعل .. كانت تبوسها .. كانوا متفقين سوى أكيد .. ( يضحك بتهكم ) وأنا كنت اظن مي قطة مغمضة .. لكن تعاملها معي يقول شيء ثاني .. يمكن أني فاهم غلط .. معارضة أمي لزواجي من مي .. أكد لي أن ما بينها وبين مشاعل شيء .. لكن نفور مي مني بس هي كانت مستحية او خايفة .. لمحت في عيونها قرف .. وانا ليه اتعب نفسي .. ما هي لي .. حتى لو بغيتها .. مشاعل مستحيل تتنازل عن شيء تبغاه .. واكبر دليل اللي صار لها مع بنتها ..
كانت مي قاعدة ومرتبكة .. تصرف ماجد معها وتحقيقه وياها .. عيونه مولعة من الغيرة .. معقولة يعرف عن أخته .. يا خوفي بس هو اللي كان في الغرفة وشافني قريبة منها .. لكني ما سويت شيء .. كنت اطمن عليها بس .. أوف .. وانا وش علي منها .. أحسن شيء أننا بنسافر بعد بكرة وما راح أشوفها .. لكنها بتكون في كندا .. يعني الا ما نلتقي مع بعض .. لكن من ناديا اللي ظلت تناديها .. كانت تكلمني وتناديني بناديا ..
