مشاعل رافعة حاجبها : خير وش تفضلتِ ..
الجازي بتقوم : اللي سمعتيه ..
علت أصواتهم وحست مي أن الكل صار يناظرهم .. لعنت مشاعل على الموقف البايخ اللي حطتها فيه ..
مي بين أسنانها : خلاص انتوا الثنتين .. الكل يطالعنا ..
التفتت الجازي حواليها .. حست بالاحراج وقعدت مرة ثانية .. مشاعل كانت تبتسم على الموقف..
مي بهمس : مشاعل ما له داعي هالحركات قدام الناس ..
مشاعل رافعة أكتافها : وانا وش سويت ..
مي تترجى : اعتقيني بس هالليلة .. ما ابغى يجيني كلام ..
ناظرت مشاعل في عيون مي .. وما فهمت قصدها لكنها المحت نظرة الحزن اللي ما تفارقها .. رحمتها لسبب ما .. لم تدركه بعد .. فنظرة من عيون مي كفيلة بإذابة الجليد اللي مغلف قلبها وكسر الحاجز المحيط بها .. هزت مشاعل راسها ..
مشاعل : أسفة اذا ضايقتك .. I didn't mean it
مي مومصدقتها : أنت تتعمدين تضايقني ..
مشاعل تاشر بيدها : لأنك مو معطتني فرصـ ...
قاطعتها مي وبتنهد : نتكلم بعدين ..
مشاعل بابتسامة وعيونها تلمع : وعد ..
مي رافعة حاجبها : وعد .. " كأنها طفل ووعدوه يودونه الملاهي " ..
كملت مشاعل العشاء بحماس وصارت تسولف مع باقي البنات .. الجازي تتجنب تدخل في سوالف مشاعل .. ومعصبة من موقف مي تجاهها .. لكنها المحت أم مي من بعيد كانت عيونها عليهم .. وتناظر مشاعل ومي بشزر .. فهمت ليه مي لمت الموضوع ولا في العادة هي ما تسمح لأحد يقرب منها .. يا ما حاولت معها وصدتني .. رضيت بصداقتها لكني أعشقها وأموت فيها ..
ناهد بشويش : لمى ..
لمى : ايش أمي ..
ناهد تاشر بعيونها : من هذيك اللي مع أختك ..
لمى التفتت وشافت مشاعل : هذه مشاعل ..
ناهد بقرف : ومن تكون هذه ..
لمى : بنت خالة سارة .. امها سعاد أم ماجد ..
ناهد تهز راسها : بنات سعاد أعرفهم .. وحدة تشتغل في بنك والثانية كبرك ..
لمى : هذه الكبيرة مشاعل ..
ناهد : ايوه .. استغربت الشبه اللي بينهم .. فكرتها من اهلهم ..
لمى : هذه من زوجها الاول ..
ناهد :اللي اعرفه أن زوجها الأول كان ثري جداً وبعد وفاته تزوجت شريكه .. لكن ما كنت أعرف أن عندها بنت منه ..
لمى : لأنها ما تجي السعودية .. عايشة طول حياتها برى .. وما تجي إلا نادراً في المناسبات ..
ناهد : ما تنلام أمها اذا ما جابت طاريها .. شوفي شكلها كأنها ولد ..
أم طلال تبتسم : هذه اللي موعاجبتك .. تحت يدها شركات بملايين الدولارات ..
ناهد بتعجب : هذه ..
أم طلال : مشاعل تدير شركات ابوها ..
ناهد : تعرفينها ..
أم طلال : التقي فيها في المناسبات ..
ناهد رافعة حاجبها : مو باين عليها ..
أم طلال تضحك : لأن وجهها بيبي فيس ما يبان عليها العمر .. لكنها كبيرة في الثلاثين أو توها داخلتها ..
التفتت ناهد تناظر مشاعل .. بنت طويلة وبيضاء ملامحها طفولية .. شعرها قصير مرة وصابغته بلاتينيوم .. اللي يشوفها يقول توها في بداية العشرينات .. لكن لبسها ومشتيها كانها ولد .. لابسة بنطلون جينز وبلوزة كت ..
ناهد : مشاعل عايشة لحالها هناك ولا معها أحد ..
أم طلال : لحالها .. لكن أهلها دايم يرحون كندا لهم حلال هناك ..
ناهد : أقصد انها متزوجة ولا لأ .. باين أنها مو متزوجة ..
أم طلال : حاليا لا ..
ناهد مو فاهمة : حاليا ..
أم طلال : اللي أعرفه انها كانت مخطوبة لولد عمها .. لكن هل تزوجوا أو لا .. ما عندي علم..
ناهد بسخرية : ما ينلام اذا انحاش منها ..
أم طلال : لا تغرك المظاهر .. هذه اللي موعاجبتك لها نفوذ فوق ما تتوقعين .. والكل يطلب رضاها ..
ناهد : الى هالدرجة ..
أم طلال : نهى أخت زوجة حماي تعرفها .. وكانت عندها مشكلة تراخيص في وزارة التجارة .. وعجزت تدور احد يمشي لها موضوعها .. كلمت مشاعل وفي ظرف ساعات الموضوع انحل..
ناهد متفاجأة : ما أصدق ..
