..
كانت متكية على الكنب وتناظر النافذة .. والحزن مالي وجهها .. المحت اختها تدخل الصالة وبيدها كوبين موكا بارد .. ناولتها واحد .. وجلست جنبها ..
ليلي : وش فيك ..
عبير بحزن : اشتقت لداليا ..
ليلى : اشتقتِ وانتِ مناقر وياها ..
عبير تبتسم : يا حلو مناقرها .. احسها كبيرة وسابقة سنها ..
ليلى : ما شاء الله عليها .. الله يحفظها لأمها ..
عبير : توقعين وصلوا الحين ..
ليلى تناظر الساعة : أتوقع الحين دخلوا البحرين ..
عبير : ما لي خص ترى .. في الاجازة نروح عندهم ..
ليلى تأشر بيدها : لا تطالعيني .. كلمي أمك ..
عبير : امي من راحت مشاعل وهي في غرفتها ما طلعت ..
ليلى : دقيت عليها الباب وما رضت تفتح ..
عبير : ليلى .. وش صار بينهم ..
ليلى : مين ؟؟
عبير : امي ومشاعل .. قبل ما يظلون في مكان واحد الا تسمعين هواشهم .. والحين هدوء غريب بينهم .. في شيء صاير بينهم .. ماني فاهمته ..
ليلى : ولا أنا .. ملاحظة أن أمي تحاول تتقرب من مشاعل ..
عبير : من شافت داليا في الكوفي هذاك اليوم ..
ليلى تهز راسها : لا .. قبل .. اكثر من مرة اشوفها في غرفة مشاعل ..
عبير : وش تسوي يعني .. يمكن ترتبها او شيء ..
ليلى : وليه عيونها حمراء كل ما طلعت من الغرفة ..
التفتت عبير على النافذة : مشاعل ..
ليلى : تحاول تصلح علاقتها معها .. مع اني ما ادري ليه هي تنفر منها وتتضايق بوجودها ..
عبير تقوم : لا .. لا .. مشاعل هنا ..
ليلى باستغراب : شنو ..
راحت عبير في اتجاه الباب .. فتحته وشافت مشاعل منهارة وساندها السايق .. مسكوها ليلى وعبير .. دخلوها الصالة .. وهي منهارة تصيح وترجف ..
ليلى : مشاعل وش فيك ..
مشاعل تصيح : أخذها النذل .. اخذها ..
عبير : شلون ..
نزلت مشاعل راسها تبكي .. وليلى تحاول تهديها .. أما عبير التفتت على السايق وطلبت منه تعرف وش صار .. حكى لها عن الكمين اللي نصبوه لهم في الطريق .. كانوا ينتظرونهم ..
عبير : الله يلعنه الكلب ..
ليلى : شلون عرف .. اذا انت ما قلتِ لأحد الا يوم السفر ..
رفعت مشاعل راسها الى فوق : في واحد يعرف وأكيد خبره ..
قامت مشاعل وركضت تصعد الدرج .. ليلى وعبير وراها .. شافهم ياسر وهو بينزل واستغرب وجود مشاعل .. شاف مشاعل تتوجه الى غرفة ماجد .. ووجهها مخطوف وعيونها حمراء.. لحقهم وهو يحاول يفهم السالفة من عبير ..
دخلت الغرفة بدون ما تطق الباب .. شافته يعدل ملابسه ويتعطر .. التفت عليها وناظرها بازدراء ..
ماجد : الناس تستأذن بالأول ..
مشاعل بغضب : انت اللي قلت له ..
ماجد يأخذ مفاتحيه : قلت لمين .. وبعدين مو كأنك مسافرة وش اللي رجعك ..
تقدمت مشاعل نحوه بعصبية ومسكت قميصه من قدام ..
مشاعل بحدة : اعرف انك انت اللي علمته ..
ماجد يبعدها بقوة : علمت مين يا مجنونة ..
مشاعل تصارخ : لا تتلاعب معي ماجد ..
ماجد يناظرها وهو يعدل ملابسه : احسن لبنتك مع ابوها ..
مشاعل : ومن انت علشان تقرر ..
ماجد : لا تصارخين .. انتِ اللي بديتِ ..
مشاعل بتروح له لكن ليلى مسكتها : بديت في ايش يا مدلل امك ..
ماجد بحنق : اخذتِ شيء مو لك ..
مشاعل : هذا اللي يكذب ويصدق كذبته ..
ماجد : اقدر اخذها هي بعد لو بغيت ..
مشاعل ضربته بوقس على وجهه .. تفاجأ ماجد من قوتها .. لكنه ما عمل حساب هجومها الشرس عليه .. كانت تضرب بكل قوتها .. ليلى تحاول تبعدها وما هي قادرة .. حاول يصد ماجد ضرباتها ويوجه لها بالمثل .. لكنها تعيدها له اضعاف .. تدخل ياسر بينها وسحب مشاعل منه .. وطلعها من الغرفة .. وماجد بعصبية كان يبغى يضربها .. لكن مشاعل رفسته على ساقه وصرخ بالم وصار يناقز من الألم ..
