كانت عيونها تراقبها وين ما تروح .. حست باشمئزاز أكثر .. وكل ما تلاقت عيونهم ابتسمت لها .. ودي اعطيها بوقس على فمها .. مع هالابتسامة المستفزة .. لو ما كانت سارة صديقتها المقربة وهي اللي مجهزة الحفلة كانت طلعت من المكان .. لكن وش تسوي البنت بنت خالتها .. ما تقدر تقول لها طردي بنت خالتك .. اوف بس ..
جات أغنية kaoma lambada .. سارة طلبت من مشاعل ترقص معها .. هي شاطرة في الرقص خاصة هالأغنية .. ولما بدوا يرقصون بدا التصفير والتشجيع .. حتى مي انبهرت بمهارة مشاعل .. والبنات ينادونها انهم يبغون يرقصون معها بعد هالاغنية .. لكن مشاعل عينها على وحدة .. وحدة بس ..
سارة ترقص معها : خفي على البنت شوي ..
مشاعل : وانا وش سويت ..
سارة : بتاكلينها بعيونك ..
مشاعل : مو بيدي حلوة موت ..
سارة تضحك : يا بنت خالتي حالتك صعبة ..
مشاعل رافعة حاجبها : ما في احد صعب علي ..
سارة تدور : الا مي .. ما لها في هالامور ..
مشاعل بتحدي : ما احد ما له .. قربي منها علشان ترقص معنا ..
سارة : البنت تتجنبك من اول الحفلة ..
مشاعل : مو شغلك .. سحبي يدها لما الفك جهتها ..
سارة تضحك : شكلك متعودة ..
مشاعل تبتسم : جب وسحبي يدها ..
قربوا من مي وسحبت سارة يدها .. وصاروا يرقصون هم الثلاثة .. والتشجيع والتصفير يزيد حولهم .. وبعض البنات علقوا انهم يبون يرقصون مع مشاعل .. مشاعل غمزت لسارة اللي فهمت قصدها وتركتهم .. مي خافت لما سارة اشرت بيدها انها تعبت .. قربتها مشاعل اكثر ..
مشاعل بهمس : لا تخافين .. ما اعض ..
مي بثقة متصنعة : ماني خايفة ..
مشاعل : أجل ليه ترجفين ..
مي ترقع : المكان بارد ..
كانت مي على اعصابها وتبغى الاغنية تنتهي بسرعة .. مشاعل تتعمد تقرب منها وتمرر يدها على جسمها .. حست بقرف وغثيان .. بمجرد ما خلصت الاغنية تركتها مي وركضت الى الحمام .. وقفت مشاعل مستغربة منها .. تجمعوا عليها البنات يبغون يرقصون معها .. ومشاعل بالها مع مي ..
دخلت مي الى الحمام .. استفرغت .. ما تدري وش جاها .. لكن لما المستها مشاعل تذكرت زوج امها لما حكرها في المطبخ مرة .. كان لاصق فيها .. ولولا اخوها مازن تعمد يعمل صوت .. وبعد ابوه عنها .. كان ممكن يصير الوضع اسوء .. والحين هالزفت مشاعل .. حاسة أني باختنق ..
...... : أنت بخير ..
التفتت مي على مصدر الصوت .. شافت مشاعل واقفة عند باب الحمام .. كانت مشاعل تناظرها باهتمام وقلق .. تقدمت نحوها بخطوات ..
مشاعل باهتمام : أنت بخير ..
مي تمسح يدينها : أنا بخير ..
مشاعل : متأكدة .. عيونك حمراء ..
مي ترمي المنديل : متأكدة .. وما لك شغل بعيوني ..
مشت مي خطوات جنب مشاعل .. مشاعل مسكت ذراعها علشان توقفها .. حاولت مي تفلت نفسها منها لكن مشاعل مساكتها بقوة ..
مي : تركي يدي ..
مشاعل : وش قصتك ..
مي تسحب ذراعها بالغصب : أي قصة ..
مشاعل : ممكن اعرف قصتك معي ..
مي رافعة حاجبها : ما فهمت ..
مشاعل : ليه هالعداء تجاهي ..
مي : ومن أنت علشان أعاديك .. أنا ما اعرفك علشان اتخذ منك موقف ..
مشاعل تبتسم : تعرفي علي .. عطيني فرصة ..
مي تناظرها : ماني من نوعك ..
مشاعل : وش قصدك ..
مي : أنتِ فاهمة قصدي زين ..
مي بتطلع من الحمام .. مسكتها مشاعل وسحبتها غصب لعندها ..
مشاعل بجمود : ما تعودت أحد يرفض لي طلب ..
مي تسحب يدها : وأنا ما تعودت أحد يجبرني على شيء ما أبغاه ..
قربت مشاعل أكثر من مي .. ومي تتراجع الى ورى الى ان اصطدمت بالجدار ..
مي رافعة يدها : لا تقربي ..
لاحظت مشاعل توتر مي .. كانت ترجف قدامها .. ودها تضمها وتهديها .. وعيونها اغرقت بالدموع .. بعدت مشاعل خطوات الى ورى .. مي استغلت الوضع وطلعت بسرعة من الحمام.. وقفت مشاعل تناظر الباب .. " فيها شيء هالبنت .. كانت ترجف لما قربت منها .. وادمعت عينها .. كانت خايفة منها أكيد .. لكن اللي شافته في عيونها ذعر ورعب " ..
