..
كان يراودها شكوك من أول ما شافت الخيوط .. وماجد يحلف ويقسم انه ما رمى شيء .. لكن مشاعل ما تسويها لو بغت تأذيه بتهدده قبلها .. قبل سوتها مع ابوه .. ولولا ستر ربي ولا صفينا في الشارع .. لكن بعد اللي شافته اليوم على الغداء خلاها تحاتي أكثر .. من جات داليا ومشاعل تدلعها وتاكلها بنفسها .. لكن اليوم نافرة منها ومعصبة عليها .. حتى داليا ما اكلت زي الناس .. تغصب نفسها على الاكل .. قررت تكلم بنتها .. مع انه ما ودها تتصادم معها خاصة في هالوقت والمحامي بيجي في أي وقت .. التوقيت خطأ ..
صعدت الى غرفة مشاعل وسمعتهم يتهاوشون وبعدين مشاعل تبكي .. وسمعت اعتراف داليا بنفسها .. معقولة داليا .. هالنتفة يطلع منها كل هذا .. دخلت الغرفة بدون حتى ما تدق الباب ..
سعاد مو مصدقة : انتِ داليا ؟؟
خافت داليا وهي تناظر جدتها .. مشاعل وقفت قدام أمها .. وشافت بيدنها الخيوط .. هي توقعت انها شالتهم كلهم .. من وين طاحت عليهم أمها ..
سعاد تكلم مشاعل : بنتك .. هي اللي سوت كل هذا ..
مشاعل ببرود : أي ..
سعاد تأشر بيدها : ليه ..
مشاعل : كانت تدافع عني ..
حولت سعاد بنظرها على داليا .. وش اللي سووا فيها اللي مخليها كذا .. يطلع منها كل هذا .. ولا حتى اهتمت اذا تأذى أو لا .. لازم تتكلم مع أمها لكن مو في وجودها ..
سعاد : داليا روحي عند خالتك عبير ..
داليا ناظرت أمها .. مشاعل هزت راسها : روحي لعند عبير ..
نزلت داليا راسها وبحركة ذكية أخذت معها الجوال .. كانت مشاعل معطيتها ظهرها .. لكنها لما قربت صوب الباب .. وقفتها مشاعل ومدت يدها ..
مشاعل رافعة حاجبها : الجوال ..
عطتها داليا الجوال وهي تتأفف : اووف ..
مشاعل ابتسمت : غيرك أشطر يا بنت أمك ..
داليا بطفش : وش اسوي الحين ..
مشاعل : اقري كتاب ..
عصبت داليا وطلعت وهي تضرب رجولها على الأرض .. التفتت مشاعل على أمها .. شافتها قاعدة على الكنب وتناظرها بنظرات غريبة .. كانت تفكرها بتعصب على داليا او بتهاوشها .. لكن هدوئها غريب .. تصرفات أمها معها كلها غريبة مؤخراً.. ما كانها أمها اللي ما تطيق تشوفها .. ويضايقها وجودها ..
سعاد بهدوء : داليا ما هي طبيعية ..
مشاعل : بنتي مو مجنونة ..
سعاد تتنهد : ما اقصد هذا .. لكن برودها .. امس شفتها ترسم عصفور ميت ولا خافت منه او حتى قرفت وحوله نمل ..
جلست مشاعل على طرف الكنب ..
سعاد : ماني زعلانة منها .. زعلانة عليها ..
مشاعل : بنتي ما هي بحاجة شفقتك ..
سعاد : مشاعل أنا خايفة أنها ...
قاطعتها مشاعل : لا تخافين ولا تحاتين .. كلها يومين وانا مسافرة .. وبنتي باخذها معاي ..
سعاد : وناصر ..
مشاعل بحدة : ما يخصني بهالتبن .. بنتي قاعدة تقفد برائتها بسببه .. ما كانها طفلة ..
سعاد : ما راح يسكت لا هو ولا أهله ..
مشاعل تاشر بيدها بعصبية : ما يخصني فيه ولا فيهم .. بنتي وباخذها معي ..
سعاد : مشاعل .. الأمور ما تنحل بالعصبية ..
مشاعل : أجل بايش تنحل .. شفتي بعينك لوين وصلت ..
سعاد : شفت .. لكن اخر مرة حاولتِ عمك قوم الدنيا ..
مشاعل تناظر أمها : هالمرة غير .. ما عنده شيء يهددني فيه ..
سعاد : وش يهددك فيه ؟؟
قامت مشاعل : مو مهم شنو يهدد .. المهم انه ما عاد ينفع ..
سعاد مو فاهمة : مشاعل وش ناوية تسوين ..
وقفت مشاعل امام النافذة .. هي تعرف انها ما تقدر تأخذ داليا بدون موافقة ناصر .. لكنها تقدر تطلب مساعدة السفارة البريطانية .. لازم تتحرك بسرعة .. ناصر ما راح يسمح لها تاخذها .. ويمكن يجي في أي وقت ياخذها .. لا .. هو لو يبغى ياخذها كان اخذها من المدرسة .. يبغى يثبت لي حسن نيته الزفت .. انتبهت مشاعل لأمها تناديها ..
مشاعل تلتفت عليها : قلتِ شيء ..
سعاد : وش ناوية تسوين ؟؟
قبل لا تتكلم مشاعل .. رن جوالها وشافت المتصل .. عبست وجهها قبل لا تكلمه .. كان المحامي يبلغها بوصوله السعودية ويبغى يحدد معها موعد يلتقي فيها .. لأنه يبغى يرجع بسرعة.. اتقفت معه مشاعل تلتقي معه المغرب في الفندق اللي هو ساكن فيه .. انهت المكالمة والتفتت على أمها .. استغربت من ملامح أمها .. كانت تناظرها بترقب .. ابتسمت مشاعل بداخلها .. يعني خايفة اعرف .. ما انا عارفة بكل شيء من سنين ..
