..
وصلت طيارة زينة الى كندا .. كانت تناظر ارض المطار من خلال النافذة .. تنهدت بتعب لما حطت الطائرة على الأرض .. شلون بتقابل ريم .. شلون بتناظرها عين بعين وهي خاينتها .. اريح شيء انها ما راح تكون في البيت .. اكيد هي في لندن الحين .. يكون عندي وقت افكر وش اسوي ..
نزلت من الطائرة وتوجهت الى صالة كبار الشخصيات .. كانت تتوقع السايق ينتظرها .. لكنها تفاجات بريم واقفة تناظرها وفي يدها بوكيه زنبق .. نوعها المفضل .. اخنقتها العبرة لكنها تماسكت .. قربت منها ريم وضمتها .. زينة ضمتها بقوة .. ودفنت راسها في رقبة ريم ..
ريم تضمها : اشتقت لي زيون ..
زينة : وانا بعد ..
مسكت ريم يد زينة وعطتها البوكيه .. اخذته زينة وقربته لراسها تشمه .. ابتسمت لريم ..
زينة : مشكورة بيبي ..
ريم رافعة حاجبها : تشكريني كذا ..
ناظرتها زينة مو فاهمة قصدها .. قربت منها ريم ومسكت وجه زينة وباستها .. زينة احمر وجهها .. بعدتها ..
زينة : ريم ما حنا لحالنا ..
ريم تغمز لها : الصالة كلها لنا يا حلو ..
ضربتها زينة بالبوكيه : عوبا ..
ضحكت ريم ومسكت يد زينة وطلعوا .. ركبوا السيارة .. كانت زينة تناظر النافذة .. ما توقعت تكون ريم في استقبالها .. المفترض انها في لندن مع سامي علشان مشروعهم .. تفاجات بيد ريم على يدها .. سحبتها .. ما استغربت ريم منها .. وما تلومها لو جافتها ..
ريم : لسة زعلانة مني ..
زينة تناظر النافذة : لا ..
ريم : اجل ليه بعيدة عني ..
التفتت عليها زينة : ماني بعيدة ..
قربت ريم منها : فيك شيء زينة ..
زينة تهز راسها : ما فيني شيء ..
ريم : بلى فيه .. متغيرة كثير ..
زينة تبتسم : ما فيني شيء .. بس تعب السفر ..
ريم تناظرها باهتمام : اكيد ..
زينة لفت وجهها في اتجاه النافذة : اكيد ..
أسندت ريم ظهرها ولفت بوجهها الى النافذة .. هي عارفة وحاسة ان زينة لسة زعلانة منها .. وما الومها .. بس عطيني وقت .. واعوضك عن اللي راح .. ظلوا ساكتين طول الطريق الى البيت .. وكل وحدة غارقة في دوامة من الأفكار ..
ليلى : طيب نجيب لك العشاء هنا ..
مي : والله ما لي نفس ..
ليلى : ما يصير تنامين على لحم بطنك ..
مي تتنهد : ما لي نفس ليلي ..
ليلى : مي .. لازم تاكلي .. بكرة من الصباح بتروحي المستشفى .. لازم تكونين بقوتك ..
مي بتتكلم .. قاطعتها ليلى : ما راح تنفعينها وانتي ضعيفة ..
سكتت مي وسحبتها ليلى معها .. وهم نازلين استغربت مي ان مشاعل مو معها .. أمها نادتها وراحت معها .. لكنها ما جاتها تتطمن عليها .. ما فارقتها من اول ما طلعوا من الشقة الى المستشفى .. وصلوا الى الصالة وسمعت ضحكات مشاعل مع بنت صغيرة .. كانها شايفتها من قبل .. تشبه مشاعل كثير .. كانت مشاعل حاضنتها وهي تسمعها تحكي مقالبها لزميلة معها في المدرسة دايم تضايقها ..
مشاعل : وبعدين ..
داليا : صارت تخاف .. كل ما تجيب شيء نغير مكانه ..
مشاعل تبوس خدها : ما يمنع انك تاخذين حقك .. لكن لا تتمادين ..
داليا تدافع : هي اللي بدت .. وبعدين لا تحط راسها براسي ....
مشاعل وداليا : تخسر ..
ضحكت مشاعل وبنتها .. وباست خدها بقوة ..
مشاعل تبتسم : بنت امك ..
سهاد : داليا ما بينخاف عليها ..
داليا بحماس : صرت اعرف امسك مسدس وأصيب الهدف ..
ناظرتها مشاعل : مسدس ..
داليا : بابا اشتراه لي .. واشترى لي قوس واسهام بعد ..
مشاعل متفاجأة : قوس وسهم ..
سهاد تشرح لها : عندها هوس بـ the hunger games
مشاعل : شنو هذا ..
عبير تناظر مشاعل : في احد ما يعرف hunger games
مشاعل تناظرها : ايه في .. أنا ..
داليا بفخر : اعرف ارمي بالسهم وأصيب الهدف ..
مشاعل تلتف على داليا : صدق ..
نزلت داليا وصارت تمثل كيف تصوب بالقوس .. وهي تمد ذراعها شافت مشاعل جرح عليها.. وقفت وراحت لعندها .. مسكت ذراعها ..
مشاعل : وش فيك ..
داليا ترفع اكتافها : جرح قديم ..
مشاعل وهي تشوف ذراع داليا .. عضت على اسنانها .. يضربونك ليه ..
داليا تبتسم : ما يعور ..
باستها مشاعل على ذراعها مكان الجرح .. حطت داليا يدها على كتف أمها ..
داليا : انا قوية مثل كاتنس ..
ناظرتها مشاعل مو فاهمة ..
سهاد تشرح لها : بطلة الفيلم اسمها كاتنس ..
ضحكت مشاعل وهي تخبي داخلها غصة مرة ..
مشاعل تقعد : يبغى لي اشوف هالفيلم ..
عبير : بيعجبك .. يغطي على تويلايت ..
