..
قبل أيام ...
كانت مشاعل قاعدة في الحديقة .. وفي حضنها الاب تشوف الايميلات وتجري اتصالات .. تعطل شغلها بسبب تأخرها .. المفروض أنها ترجع لكندا من ايام .. لكنها فضلت تقعد كم يوم تشوف وش ممكن يصير .. الوضع متوتر في البيت .. أمها وماجد دايم في هواش .. وامها محملتها الذنب .. حتى اخوانها لاحظوا نظرات أمها لها .. وحوارهم هم الثلاثة مع بعض .. وبمجرد دخول احد عليهم يسكتون .. وما احد فاهم وش السالفة ..
ليلى تقعد على الكرسي : أوف .. شيء يجيب المرض ..
مشاعل عينها على الاب : وش فيك ..
ليلى : مو شايفة الوضع .. صاير البيت مكهرب .. هواش وصراخ ..
سمعوا صوت باب يغلق بصوت عالي ..أشرت ليلى بيدها ..
ليلى : سمعتِ ..
مشاعل تهز راسها : سمعت ..
ليلى : بس أفهم وش بين ماجد وامي ..
مشاعل سكتت ورجعت تشتغل .. هي عارفة سبب الخلاف بين أمها وماجد .. وهي السبب .. كانت تفكر أنها تكلم ماجد وتلغي شرطها .. تسرعت لما طلبت منه يتزوج مي .. وين كان عقلها لما خطرت لها هالفكرة المجنونة .. ( تنهدت ) عقلي معها .. معقولة بهالسرعة حبيتها .. بس أنا ما شفتها غير مرتين .. مستحيل اكون حبيتها .. يمكن مثل ما قالت هنادي .. لأنها رفضتني .. ما هي أول مرة .. لكنها تعور وتألم لأنها منها .. ما أتحمل نظرات الكره والرفض منها .. كلمة منها تذوبني في مكاني .. ما أدري وش صار لي .. ما أظنه حب من أول نظرة ..
انتبهت مشاعل لليلى تكلمها .. التفتت عليها ..
مشاعل تهز راسها : قلت شيء ..
ليلى رافعة حاجبها : صار لي ساعة أتكلم ..
مشاعل : أسفة ما سمعتك .. سرحت شوي ..
ليلى بخبث : اللي ماخذة عقلك تتهنى به ..
مشاعل تناظرها : ما أحد في بالي ..
ليلى تاشر بيدها : ما علينا .. ما جاوبتيني ..
مشاعل : على ايش ..
ليلى تاشر براسها : على هالتوتر .. وش بين ماجد وأمي ..
مشاعل : وش يعرفني ..
ليلى : احساسي يقول أنك تعرفين .. وجلساتك مع أمي كاثرة هالأيام ..
مشاعل تضحك بسخرية : اعفيني منها دخيلك ..
ليلى تناظرها : أفهم بس .. وش سبب العداء بينك وبين أمي ..
مشاعل : أنا وهي خطان متوازيان .. لا يلتقيان أبداَ ..
ليلى تبتسم : يلتقون لو تنازلوا وانحنوا ..
مشاعل تأشر على نفسها : مو انا ..
ليلى : وهي تقول مو هي .. ونهايتها ..
مشاعل تقوم : بلا نهاية وبداية .. أنا عاجبني الوضع ..
أخذت مشاعل اغراضها ودخلت وفي بالها فكرة وحدة .. تسحب شرطها بزواج ماجد من مي .. راح تعطيه المال اللي يحتاجه لمشروعه .. لكن مسألة الزواج هذا ضرب من الجنون .. ما تدري شلون خطرت على بالها هالفكرة .. ولازم تبعد عن هنا .. صار لها ليالي ما تقدر تنام الا لما تركب السيارة وتروح بيت مي .. وتقعد تناظر البيت .. وتتخيل مي داخل وأي غرفة غرفتها .. حاولت تعرف معلومات عنها من سارة .. اللي عرفته أنها عايشة مع أمها وزوج أمها .. ولها أخت من أمها وأبوها .. واخوان من امها .. وما هي مرتاحة في عيشتها معهم .. هذا يفسر لمعة الحزن اللي في عيونها .. لو بيدي أخذك معي واقضي عمري كله ارضيك واسعدك..
