" فارس "
بعد ماشفتها مشغوله بأتصالها قمت و أنا افكر بكلام نادر لي و أنا أحط إيديني بجيبي
" لازم تكسر عينهم و ترزف عشان تقدر تتخطاها عشان تبين انك مو مهتم و ترد على موقفك " طلعت تلفوني و أنا أفتح باب سيارتي و أتصل لنادر...
: الووو نادر
نادر: حي هالصوت
فارس: وييين دارك؟
نادر: ابوي دق لي يبانا نروح الملكه عاد رحت البيت اتجهز و الحين طالع لهم
فارس: لا تروح انتظرني بروح معاك
نادر وهو مو مستوعب: وين تروح؟ معاي؟ صادق؟ ولا تمزح معاي
فارس: طبعا صادق بس بمر على الشقه ببدل و اذا ما عليك أمر ارجع و هات لي غتره ماعندي
نادر: انت مسخن شي؟
فارس: نوووويدر مو كأنك انت لي اقنعتني
نادر: مادري ليش احسك تمزح
فارس بجديه: والله أني صادق مافي شي بيخليني اتخطى غير هذا الشي فكرت بكلامك.. لمهم يلا هات لي غتره و مرني
نادر: تم ماطلبت شي
وصلت شقتي و انا أحس أني مقتنع بالشي لي بسويه صح بيكون صعب علي لكن الشعور لي أحس فيه الحين و الحرقه لي بقلبي لازم أتخطاها لازم أتخطى كل شعور مر خلتني أحس فيه! لازم أرد على موقفي لازم أبين لهم قوتي و أنه فراقها ماهزني حتى لو كان العكس حتى لو كان هذا كله عكس لي بداخلي رفعت رأسي و انا احس الدموع تجمعت بعيني .. نزلت دمعه حارة على خدي ومسحتها بقوه و دخلت أتروش و طلعت و أنا أجهز نفسي سمعت فتحت الباب
: نويييدر هذا انت
نادر: طبعا انا نشبة حياتك الحلوه.. وهذا الاكل ليش ماخذته من عند الباب
شفته و هو يحط الاكل على طاوله الطعام
فارس: عشان انت تشيله و أدخله.. ها مندي بعد اليوم؟
نادر: واضح عجبتك السالفه لمهم يلا ترا أبوي حرق تلفوني
فارس: شفيه ابوي متحمس أكثر منهم؟ لهدرجه مستانس انه بنت أخوه ماصارت لي
نادر: والله ولا أدري من العصر و هو يقول لتتاخر اليوم
فارس: زين عطني الغتره ترا جاهز بس بتغتر
نادر: مافي تتغتر جبت لك عقال هات اضبطه لك
مسكني نادر وهو يوقفني مقابل له حط الغتره وفوقه العقال و ضبطها لي و أنتبه للعطر لي كان بالصاله و راح و أخذه و هو يرش العطر و من بعدها بدأ يرش ملابسه كنت مركز على حركاته و أنا بالي بعيد.. لمفروض تكون ملكتي لمفروض تكون نصيبي وحلالي لمفروض كشختي هذي تكون لها.. أنتبهت على نادر وهو يطلع دهن العود من جيبه
نادر: بس ناقص دهن العود
بدا يحط لي دهن العود ورا اذني و على خشمي و انا ماعارضته على ولاشي
نادر: شفيك متصنم ماقلت شي
فارس: خلصت؟
نادر وهو يضحك: لوهله حسيت أنك ولدي مو اخوي يلا ياولدي مشينا
. .
وصلنا لبيت عمي التفت نادر لي و هو كأنه يتفحصني بعيونه
: أنزل انا معاك ماراح يصير الا كل خير
فارس: احس انه توني استوعب لي أسويه صدقني بتصير مشاكل
نادر: خل يصير لي يصير شعليك محد يقدر يسوي شي
نزلت من السيارة و أنتبهت لاخوي راشد كأنه يركض بخطواته متجه لنا
ضحكت باستهزاء: شوف راشد الحين بيصك ضغطه مليون
نادر: سو نفسك ماتشوفه و أمشي
سويت لي قاله و تقدمنا انا و نادر لباب المجلس بندخل الا حسيت بقبضة راشد و هو يسحبني له قرب مني وهو راص على أسنانه بقوه
: شووووو لي تسويه هنيه يا فارس؟ على شو ناوي
فارس: ببارك لعمي فيها شي؟
راشد: فويرس لاتخلي حد يشوفك و اطلع بالباب لي دخلت منه
فارس: واذا قلتلك ماراح اطلع؟
راشد وهو يضغط على إيدي اكثر : فارس لاتسوووووي مشاكل ما كفاك كل لي سويته ماكفاك انه ابوي طردك
فارس: لا ماكفاني و فك إيدي
نادر : راشد ترا ماندور للمشاكل فكه لاتصير صدق مشكله
راشد: انا عارف انه كل من تحت راسك
: عميييي فارس
نزلت عيوني لذياب ولد راشد و هو متمسك برجولي أبتعد عني راشد و هو يشوف ولده.. أبتسمت له
: ياعيون عمي
ذياب: عمي انت وين انا كل يوم اسال باباه ولا يرد علي انا وايد اشتقت لك
فارس: عمي فارس عنده شغل بيخلصه وبيرجع لكم و بيلعب معاك بلايستيشن زين؟
ذياب وهو مبسوط: زييين
تقدم راشد و هو بيدخل المجلس صد علينا
و دخل ودخلنا وراه
