ركبت السياره و أنا أنتظر نادر لي ماوصل للحين الاغاني مازالت مستمرة ومع كل أغنيه تتغير أضيق أكثر غمضت عيوني بحرقه و أنا مو متحمل تأخير نادر أكثر حولت على الكرسي الثاني و أنا أشغل سيارته و قمت أفرفر بالسيارة و انا مو عارف وين أروح بالاخير رجعت للشقة
مر يومين و أنا ماخذ أجازة ما كنت أحس نفسي تساعدني أني أروح للكوفي أو أني اسوي شي و قتها عطيت أحمد خبر و ماردني.. سمعت فتحت الباب و شفت نادر داخل ومعه كيسه بأيده
: يوووووه يافارس جبت لك مندي تأكل أصابعك وراه و حتى الشطه لي تحبها معاه ولو سمعت أنك مابتاكل ياويلك
فارس: الريحه دخلت بخشمي عاد الا المندي مابقدر أقاومه
نادر وهو يغمز لي: تعلمني فيك .. يلا تعال أقرب
نزلت و أنا أكل معه و خذتنا السوالف..
فجاه قال: فاااارس ترا الاكل لي برا بيخيس ليش ماتشله
فارس: مليت خله ينقلع
نادر: انا ضاربني فضول و انت بااارد ماودك تعرف منو يحطه؟
فارس: لا حركات انا المجهول و ارسل رسايل ماحبها يا يواجهني يا ينقلع عني
نادر: الله يرزقني برودك
فارس: اليوم يمكن أداوم بيكون دوام عصر لين بالليل
نادر: والله احمدوه فيه الخير زين خلاك تريح هاليومين..
" شهد "
في ذاك اليوم لي رجعت فيه من البحر راحت للعنود و هي تحس بالها عند فارس تحاتيه و تفكر شو ممكن يصيرله بهذا اليوم ، و كيف بيمر يومه هل بيكون بخير؟ ليش تركها و راح فجأه و عشان ما يأكل قلبها التفكير توجهت لبيت العنود طلعت لها العنود و هي أدخلها
و راحو للغرفه أنسدحت شهد على سرير العنود و هي تفل شعرها
: عنوده شو فيج هاديه مب من عوايدج
العنود : شو تبين أقولج
شهد: شو هالنظرات لي تشوفيني فيها؟
العنود بهدوء: شهد انتي مستوعبه الغلط لي قاعده تسوينه؟ شهد ترا كل لي يصير غلط بغلط انتي ماتعرفين شو نهايه هذا الشي انتي ضامنه مابيرجع لخطيبته؟ انتي قاعده تعلقين نفسج بشخص قلبه عند غيرج انتي ماتحسين كيف انا أحاتيج شهد وجودج معاه للوقت هذا أكبر غلط انا من اول ماسكه نفسي بس لاني احبج لازم أنبهج وقت الغلط يمكن انتي مو حاسه بنفسج
عدلت جلستها و هي تتأمل ملامح العنود الهاديه
: عنوده انتي الحين من قالج أني أحبه؟ و على طاري خطيبته ترا ملكتها اليوم قدها ملكت اصلا بس هذا مب معناته أني بشوف حياتي معه.. انا من بدايه الموضوع وحاطه شي واحد فبالي و انتي عارفته انا مابي لا حب ولا أبي شي منه غير أنه يكون مبسوط و أكون أثر حلو بحياته عمري مافكرت باللي تفكرينه
العنود: انتي متى بتستوعبيييين ان الحب مايدق الباب؟ انتي يمكن مب مستوعبه ولا حاسه بنفسج لانج رسختي هالفكره فبالج
شهد: تكفين عنوده خلاص بس من الطاري هذا ..تعشيتي؟
العنود: ليش انتي ماتعشيتي مع حبيب القلب؟
شهد بنرفزه: العنود خلاص
العنود: خلاص بسكت تبين عشاء انتي
شهد: لا
قامت العنود و هي تسوي قهوه لها و لشهد.. ورجعت شهد انسدحت على السرير و هي تتامل تحركات العنود و هي تسوي القهوة بدت تتذكر ملامح فارس و تتذكر ضحكته لي كانت نادرًا ماتشوفها تحس إنها سوت إنجاز لأنها رسمت الضحكه على وجهه تحس براحه كبيرة لكن بنفس لوقت كانت شايله همه ليش تركها و راح
: العنود عادي أقول شي وماتعصبين علي؟
