: الله يروعك طيرت فؤادي
نادر بابتسامة: خوفتك ؟
فارس: شرايك أنت ياخي انا غلطان يوم عطيتك نسخه من مفتاح الشقه تدخل و تطلع على كيفك
نادر: صبر صبر بطلع و بدق الباب أوامر ثانيه استاذ فارس
سحبته من أيده و انا اسحبه لي و ضميته بأيد و الايد الثانيه فيها قهوتي
: ايوه احرقني احرقني
فارس: حلال من رفسك والله
رجعت اقعد و كملت قهوتي بهدوء و هو جلس بالكرسي المقابل لي
: ترا بعد شوي بأخذك معاي
فارس: وين
نادر: شو شكلك نسيت ؟
تنهدت : وين أنسى دخيلك
نادر: عيل يلا روح بدا ملابسك و مشط شعرك الطاير
لا إرادي مسحت على شعري و كأني اعدله
: يلا بقوم احس قلبي يدق بسرعه متوتر وايد
نادر: لا تحاتي شي بإذن الله انك راجع اليوم للبيت
وصلنا البيت و أنا حاس قلبي بيطلع و أيدي ترجف لكن كنت أحاول أبين عكس اللي فيني و عكس كل اللي حاس فيه باللحظه هذي كنت ملتزم الصمت و انا بس أسمع نادر و هو يكلم عبدالله و يسأله وينه . . دقايق ووصل عبدالله و معاه عبدالرحمن لف علي نادر
: انت لا تدخل لين عبدالله يقول لابوي كل شي تبا تقعد بالصاله تبا تقعد وين تقعد بس مابا أشوفك داخل اخاف ابوي لا شافك يسوي سوالف
هزيت رأسي بمعنى موافق و نزلنا هم راحو للمجلس و انا تصادفت مع راشد و سلمت عليه
: شو اللي صاير ؟
فارس بهدوء واضح: ادخل و تعرف كل شي لا تسألني
تقربت من الباب و أنا احاول أسمع اللي يصير داخل ..
ابو راشد: حي الله من يانا اقربوا .. راشد فز صب لإخوانك من القهوة
قام راشد و هو يصب القهوة و يغنم عليهم
عبدالله: شحالك عمي عساك بخير ؟
ابو راشد : بخير يعلك الخير و انت عبدالرحمن وين هالغيبه محد يشوفك الحين الا شخبار أبوك من فتره ما شفته
عبدالرحمن: ابشرك بخير و يوم قلتله اني رايح صوبكم قال سلم عليه
ابو راشد: الله يسلمه من الشر نووويدر انت اشوفك اليوم هنيه ليش ما داومت ؟
نادر: حسيت انك مشتاق لي قلت أخذ اجازه
ابو راشد : حركاتك ما تخليها انت .. يلا عيل أخليكم وراي شغل اعتبروا البيت بيتكم
فز عبدالله من مكانه : عمي بغيتك بموضوع
ابو راشد التفت عليه : عسى ما شر ؟
عبدالله: ما من شر استريح
رجع مكانه ابو راشد و هو مركز على عبدالله و ينتظره يتكلم
نادر: عبدالله ادخل بالموضوع على طول
عبدالله بدا يلعب بأصابعه بتوتر: عمي ما عرف شو اقولك بس الموضوع يخص فارس
قام ابو راشد من مكانه بنرفزه : من الحين اقولك لا تكمل طاري هالولد مابا اسمعه مابا اسمع اكثر عن فضايحه مابا اسمع اي شي يكفي انه نزل رأسي و ما خلى لي ويه اقابل فيه الناس!
نادر بحده : لا بتسمع الحقيقة هالمره بتسمعها يا ابوي كفايه اللي يصير كفايييييه يا ابوي لين متى بتبعده عنا لين متى ؟
عبدالله بصوت أشبه للبحه و دموعه بعينه : عمي والله انه فارس بريئ من كل الاتهامات يا عمي انا بكمل سنه و انا اتعالج من الادمان يا عمي الا فارس لا تظن فيه ظن السوء انا السبب بكل اللي صار لفارس انااااا يا عمي والله لو اني كنت موجود ما اسمح للشي هذا يصير مستحيل اليوم انا واقف قدامك يا عمي و أطلبك انك تسامح فارس انا ما كنت ادري والله اخذني اخوي و بعدني عن العالم عشان يعالجني من الخراب لي طحت فيه
ابو راشد : هذا شو يقول يا راشد هذا شو يخربط يطلع لي بعد المده هذي كلها و يقول فارس بريئ انا اعرف النظام هذا اعرفه عشان اسامح فارس مسويين هالقصه فارس خربان خالصين منها لكن لا تجون تطلعون لي هالقصه و كأني صغير قدامكم و تبوني أصدقها
قام من مكانه و طلع من المجلس و كنت على طرف قاعد و انا أحس اني مكسور بالحيل هذا كان أخر امل لي اخر امل لي بأني ارجع بين أهلي و خسرت هالامل شفت عبدالله و هو يركض وراه
: عمي والله اني مستعد اجيب لك كل تقاريري و اني كنت فعلا أتعالج و اني انا السبب بكل اللي صار لفارس انا السبب يا عمي تكفى لاتخليني اعيش هذا الشعور يا عمي لا تخليني أعيشه شعور اني انا السبب بأني ابعدت خوي عمري و دنيتي عن أهله ترا شعور يعور
شفت ابوي و هو يوقف و صد لنا كأنه بدا يقتنع و قفت و انا عيني بعينه
: هات التقارير و خير ان شاءالله
راشد: ابوي الله يهديك خلاص لا تطول الموضوع واضح أنه عبدالله صادق
عبدالله: والله اني صادق بكل كلمه قلتها فارس بريئ
ابو راشد: كلمتي و ما بثنيها هات التقارير و خير ان شاءالله
