قمت و انا رايح للبوابه بطلع من المستشفى الا شوي أسودت الدنيا و طحت من طولي و انا مو حاس بنفسي كل لي كنت احس فيه ثقل براسي مو قادر اشيل راسي من الدوخه لي فيني سمعت صوت الناس حولي ناس تسألني
" انت بخير فيك شي " و ناس تنادي على الممرضه و صوت الممرضه تنادي على راشد أخوي " كل هذا كان يصير حولي لكن مو قادر اشيل نفسي كنت احس بكل لي يصير حولي حسيت براشد و هو يرفع راسي من الارض و يحطه على رجله و يدقني على كتفي
: فارس شو تحس علمني فارس تسمعني؟
فارس بصوت اشبه للهمس : راسي يدور احس الدوخه ذبحتني
راشد: تقدر تقوم فيك حيل؟
فارس : ما قدر
غمضت عيوني دون ماحس و ما صحيت الا بأمي فوق رأسي و هي تبكي و تقرأ علي و مريم قاعده عند رجولي و دموعها بعينها
: انا وين شو صاير يوووه ياراسي
ام راشد: لا تتعب نفسك ارتاح يا امي
فارس: انا بخير يا أمي
رفعت ايدي و أنا أمسح دموعها
: لا تصيحين يا أمي و انتي يا مريوم بعد أمسحي دموعج مافيني الا العافيه بس شكله جاني هبوط
مريم: خوفتنا عليك راشد يوم قال لنا انك بالمستشفى خفت والله خفت
فارس : بس قلت ادلع عليكم شوي اشتقت للدلع
ام راشد: شو تحس نفسك
فارس: بخير بس راسي ثقيل بنام شوي و بيخف عني أرجعوا البيت عشان أبوي لايحس بغيابكم
ام راشد: خله يحس قاعده انا لين اشوفك بخير
فارس: والله يا أمي بخير ها شوفيني يلا مريوم خذي أمي على البيت و ترا راشد موجود اذا احتجت شي مابيقصر
مريم: يلا يا أمي صدقه فارس لا تخلينا نطول
مشوا أمي و مريم و أنا رجعت حطيت راسي على السرير و أنا احس بالثقل نفسه
: لازم أخذ غفوه شوي و انام و اريح نفسي واضح إرهاق لي فيني
غفت عيني بكل تعب و ما صحيت الا على شهد و هي ماسكه أيدي و تبكي أستغربت من وجودها كيف عرفت اني بالمستشفى و كيف عرفت أنا ب أي غرفه شفتها مانتبهت أني فتحت عيني و انها هي جنبي رجعت غمضتها و أنا أسمع بكاءها " كل هذا خوف علي يا شهد كنت وقتها ابا اسمعها ابا اشوف خوفها لي دايم تكابر به و تسوي نفسها ما همها "
شهد بهمس و هي ترص على أيدي
: تكفى يا فارس لا تسوي فيني كذا ما أقدر أشوفك بهذا التعب ولا بأيدي شي أسويه ليتني أقدر اشيل تعبك والله اني حسيت حسيت انه فيك شي ويهك كان واضح عليه التعب ليتني كنت معك و حولك و جنبك باللحظه لي طحت فيها
رصيت بأيدي على أيدها كأني اطمنها أني انا بخير و أخذت ايدها و أنا ابوسها ما كنت حاس بنفسي ما كنت حاس باللي اسويه فتحت عيني و سحبت أيدها بقوه و قامت من على الكرسي بارتباك واضح
: ريحي نفسج يا شهد انا بخير و مافيني الا العافيه
شهد: الحمدلله بس كنت جايه بطمن أستأذن
فارس : لا تروحين شهد
شهد: لازم أمشي أخاف أحد يدخل
فارس: تدرين بطني فاضي روحي و خذي لي كرواسون و عصير وقتها انا مخلص و شالوا عني المغذي و بنطلع سوا اذا ممكن
نزلت رأسها : زين بنتظرك برا
طلعت عني و تنهدت تنهيدة حلوه من بعد تعب و إرهاق و أنا احس براحه كبيره من بعد كلامها دقيت على الجرس عشان أحد يجي ما مرت ثواني الا راشد يفتح الباب
: ها فارس شو صحتك الحين؟
فارس: الحمدلله
راشد و هو بتفحصني بنظراته : متاكد؟
فارس: متاكد
راشد: نظامك هذا يا فارس لازم تعدله مايصير كذا ماتهتم بنفسك و لا تأكل شايف التعب انت لي بوجهك؟ ترا انت مو صغير عشان أعلمك وش تسوي ووش ماتسوي اهتم بنفسك ووجبه الفطور عندك اهم شي كل و غذي نفسك ولا تبا امي تراكض وراك و تأكلك
فارس: شفيك سويتها قصه انت تراه بس شوي إرهاق و تعب و الحين احسن
راشد: تتوقع هذا التعب مابيرجع لك لو قعدت على حالك هذا؟ و ترا نادر حرق تلفوني كل شوي يدق طمنه عليك
فارس: يوه وصل الخبر لنادر
راشد: وصل له و ليته ما وصل اذاني كل شوي يتصل
فارس: زين خلاص فك عني المغذي بطلع
راشد بجديه: صدق تحس نفسك بخير؟
فارس: والله بخير اطمن
راشد: اهتم بنفسك محد بينفعك غير نفسك
فارس: أبشر
