قمت مفزوع على صوت الباب وهو يدق بطريقة غريبه و بقوه
: افتح الباب يا فارس ولا كسرته على رأسك افتح
كان ابوي على الباب يصارخ بطريقه هستيريه غمضت عيوني وفتحتها احاول افهم انا شو سويت عشان ابوي يكون معصب لدرجه ذي وشوي ويكسر الباب على رأسي
قمت فتحت الباب واندفع لي ابوي بقوه وهو يدزني لورا كنت أحاول أفهم الموضوع كنت احاول اتكلم لكن ماعطاني فرصه بدأ يضربني بكل قوته لين طحت على الارض
ابو راشد : فشلتنا الله يفشلك انت شو مسوي!!! فشلتنا طيحت سمعتي بالارض صار مالي ويه اطلع للناس بسبب فعايلك يالوسخ ياللي ماعرفت أربيك حسبي الله عليك من ولد
وفجاه رمى بوجهي الكيس وطاح قدامي و أنا للحين مو مستوعب و رأسي حرفيا أحس من قو الالم مو قادر استوعب لي يصير هذا شو الكيس شو فيه انا شو سويت عشان أبوي يعصب ويضربني رفعت رأسي اشوف ابوي فوق راسي و أمي تصيح واقفه عند الباب و أخوي راشد جنب أبوي بدأت ارمش بشكل متكرر
: هذا شو ابوي الكيس شو فيه انا شو سويت عشان افشلك وتضربني هالضرب؟
راشد بعصبيه: اسأل نفسك يا فارس هذا شو لاتسألنا بذمتك ابوي قصر فيك عشان تمشي بالدرب ذا؟ ابوييييي قصصصصررر يا فارس؟
فارس: انا ماسويت شي يفشل ابوي عشان تصارخ الحين علي!!!!
مسكت الكيس وفتحتها و أنصدمت من لي داخل هالكيس تغيرت ملامح وجهي
ابو راشد: كسرتتتت ابوك يا فارسسسس كسرتتتتته
ورجع يضربني بكل قوته كانت الضيقه واضحه بوجه كانت عيونه من شدة عصبيته حمراء استسلمت لضرب ابوي كانت عيني على الباب اشوف أمي تبكي بصوت مسموع
ابو راشد: اطلع برااااا بيتي لا والله لا انت ولدي ولا أعرفك من اليوم ماتشرف بواحد مثلك فبيتي! انت دام وصلت للمرحله ذي ماستبعد منك شي اكيد أنك راعي بنات وسوالف والله اني ماعرفت اربيك
وهو يمسكني بأيدي ويرفعني ويرميني على الباب ماتحملت الاهانه لي تجيني وصرخت بكل قوتي
: كفايييييه ابوي كفايييييه اهانه وتجريح فيني بس و أمي انتي مصدقه الكلام لي ينقال عني امي انتي مصدقه اتهاماتهم علي! مصدقه انه ولدج فارس يسوي هذا كله؟
راشد و هو يقاطعني
: اسكت بس ولاتكثر كلام البيت يتعذرك
فارس: انا عارف انه كل شي من تحت راسك انا داري انك السبب بكل شي يصير
راشد: ليش تبا اشوف هالشي واسكت واضحك لك و أشجعك؟ ع لي تسويه؟
خشمي بدا ينزف من الضرب لي جاني و الكدمات بوجهي من ضرب ابوي مسحته بطرف اصابعي و انا احس الضيقه بدت تتملكني! مو عارف ش لي قاعد يصير معاي لكن قطع تفكيري ابوي و هو يمسك بإيدي ويطلعني من الغرفة
بو راشد : يلا انقلع عن ويهي و الحين مابا اشوفك بالبيت هذا ماعاد ابا اشوفك تسمع
فارس: امي تكلمييييي قولي شي! امي انا ولدج ارفعي راسج شوفيني يا امي تكفين
ام راشد: والله اني واثقه فيك ياولدي ولا فكرت بالشينه فيك لكن ابوك! ابوك منو يقدر يواجهه منو يقدر يتكلم بحرف عنده منووو تتوقع حتى لو اتكلم بيسمع لي؟
رفعت رأسي احاول امنع دموعي اطيح احاول ابين اني انا القوي مابا اضعف قدامهم مابا اضعف ضغطت إيدي بقوة و انا أمشي للباب بطلع حاولت قد ماقدر مالتفت حتى لامي لي زاد بكائها وسمعت أبوي وهو يصرخ على أختي ويمنعها أنها تلحقني
: والله يا مريم لو فكرتي بس انج تركضين وراه لتشوفين شي ماشفتيه مني خليييييه يروح خليه! هذا مب اخوج اخوج راشد و نادر غيرهم ماعندج اخوان سمعتيني! لاتخليني أعيد كلامي مرتين
مريم: بس ابوي...
ابو راشد: خلاص يابنت لاتناقشيني
