. .
غمضت عيوني بقوة الكلام كان قاسي علي والله قاسي ابوي تبرأ مني! لسبب انا مظلوم فيه حتى ماحاول يسمع مني او يسألني بكل هدوء لكن هذا ابوي مافي اي جديد، أعرفكم علي انا فارس عمري٢٤ و اثنين اخوان راشد الكبير و نادر يكون توأمي و اخت وحده لي هي مريم
. .
وصلت لسيارتي وقفت على دريشه السياره و انا اشوف الكدمات لي صارت بوجهي لكن لمحت شي ثاني وراي التفت و أنا اشوفها قدامي اشوف نبض قلبي واقفه و الدموع بعينها
: فااارسس
وبدت تبكي بصوت مسموع
فارس: روان لا تكفين اسكتييي لحد يسمعج ويشوفنا انا طبعا انتهيت وخلصت لكن انتي مابا شي يصيبج و انا السبب فيه مابا اكون ضرر لج
روان : بس أنا خطيبتك والكل يعرف و ترا سمعت كل شي انت مستحيل تكون شخص كذا مستحيييل
فارس: طبعا مستحيل لكن منو لي يصدقني؟ انا انتهيت ياروان انتهيت
حطت ايدها على وجهي تلمس الكدمات لي بوجهي لكن نسيت نفسي وغمضت عيوني احس محتاج انسى كل شي محتاج انسى الدنيا حتى لو لدقيقه وحده!
روان : شي يعورك؟
فارس: بوجودج انسى كل الالم لكن روان تكفين روحي خلاص احس خايف عليج والله اكثر من نفسي روحي بعد لي صار حتى وقفتج معاي غلط بعيونهم
روان : زين تكفى انتبه لنفسك وروح المستشفى ع الاقل اطمن على نفسك
فارس: لاتشيلين هم
ركبت السيارة وطلعت من البيت و انا مو عارف وين اروح مو عارف شو اسوي احس ما لي أحد احس الدنيا صارت ضدي كنت أفر بالسيارة و قررت أروح للبحر مكاني الوحيد لي صدق قادر انه يغير مزاجي حتى لو شوي وصلت و قعدت مقابل البحر و أخذني التفكير و أنا اتذكر كل لي صارلي وكيف انه حياتي تغيرت بغمضة عين ماقدرت امسك دموعي اكثر وسمحت لها بأنها تنزل بكل هدوء فجاه حسيت بأيد تربت على كتفي صديت أشوف وكان أخوي نادر
: افا ياخوي وش هالدموع تزعلك الدنيا و أخوك موجود؟
فارس: كيف عرفت اني انا هنيه؟
نادر: قلبي دليلي وبعدين لاتنسى تراني احس فيك علمني ياخوي شصاير معاك وش الكلام لي سمعته؟
فارس: والله انا بروحي مصدوم من لي صار
نادر: والله شي غريب ماصدقت مريوم يوم قالتلي انهم لقوا بسيارتك مخدرات وانك تتعاطى وانك وانك تخبلت صدق وطلعت بدون عقل ادورك وعرفت اني بلقاك عند البحر وفعلا طلعت هنيه الله يلعن الدوام والله لو اني كنت موجود مستحيل يصير لي صار
فارس: ماعليك اخوك تراه قوي مايهزه شي
نادر بضحك : مايهزك شي وانت دموعك اربع اربع استرجل ياولد
فارس: كل تبن ولي يعافيك ترا صدق بفك كل ضيقتي فيك وهذا راشد العله ليتني كفخته لو يقابل زوجته وفكنا أبرك
نادر: ليششش ليكون هو مد ايده عليك؟
فارس: لا يخسي ابوي مسح بي الارض بدون لايسمعني حتى ولي قهرني امي ماتكلمت لا بكلمه حق ولا بشي بس كانت تصيح نزين انا انضرب قدامج سوي شي
نادر: فارس انت تعرف ابوي كيف لاتلومها
فارس: مالوم حد وصار لي صار الحين شوفني انا بالشارع ولا اعرف شسوي ولا ادري كيف بتكون حياتي خلني اركز على هالشي الباقي ماصار يهم
نادر: انا بقنع ابوي و بفهمه وباذن الله انك بترجع البيت
فارس: هههههههههه لاتضحكني تقنع منو؟ ابوي؟ زين ماعليه
نادر: ماشي مستحيل خل املك بالله قوي
التفت للبحر أتامله أتامل للي حولي والزعل واضح بعيوني كنت أحس جسمي كله متكسر احس بألم بظهري ودي اصرخ و اصيح بصوت عالي اطلع كل لي فيني!
نادر يقاطع تفكيري
: قوم خلنا ندور لك شقه تسكن فيها هالفتره شرايك؟
فارس: هالفتره؟ حبيبي انا شكلي البيت بنساه وبنسى شكله
