حسيت بأيد نادر على كتفي
: باقي متضايق؟
فارس: لا الحمدلله ما فيني الا العافيه بس من دخلت و انا اتذكر أيامنا
نادر: السهره لعيونك اليوم
فارس: وين الشباب
نادر: كلمتهم بالطريق جايين
فارس: منو لي بيجي
نادر: سعود و عبدالرحمن
فارس: يوه أبشرك كلهم عليهم غبار
نادر: دايم يسألون عنك بس انت حمار ساحب على كل احد زين تتواصل معاي بس
وصلوا الشباب و أنتبهت لعبدالله انه موجود بعد كان أقربهم لي بعد نادر لاحظت التغير اللي بوجهه التعب واضح بوجهه و لكن رغم هذا كله الابتسامه كانت على وجهه طبعه الكوميدي باقي فيه أبتسمت و انا اسلم عليهم واحد واحد و جلسنا نأخذ أخبار بعض
عبدالرحمن: فارس انت ابدا لا تكلمني ما تقول عندي ربع بسأل عنهم بكلمهم بلاقيهم
فارس: مشاغل الدنيا و أنا أخوك
سعود: هذا أكبر لوتي عرفته بحياتي
نادر: اقووووول بس يلا قوموا كل واحد فيكم يستلم شغله بنسوي العشاء
قمنا ووزعنا الشغل علينا لي يسوي الحمسه و لي يقطع اللحم و لي يشب النار طبعا انا قمت و سويت لهم قهوة عربية كنت مبسوط من الجمعه الحلوه لي رجعتني لأيام حلوه سمعت الإشعار لي جاني و قمت و أنا عارف و متاكد أنها شهد و بالفعل كانت هي
" فارس أحس الدنيا راضيه عني اليوم حاسه براحة مو طبيعيه و الله يخليك لا عاد تفسر الاشياء على مزاجك "
بانت ابتسامتي الابتسامه لي فعلا طالعه من قلب ابتعدت عنهم و أنا اتصل عليها
: تدرين أني حاس بمثل هذا الشعور و أكثر صارلي أسبوع مو ذايق طعم النوم
شهد بهدوء: أنا اسفه مره ثانيه على لي صار
فارس: لا عاد تخبين علي شي مهم مثل هذا أتفقنا ؟
شهد: اتفقنا.. الا أنت وينك أسمع إزعاج عندك ؟
فارس: بالشاليه نادر عازم الربع لكن تدرين ما غبتي عن بالي؟
شهد: ما أصدق
فارس: احسن لا تصدقين
: فااااارس يلا عشاء تعال
فارس: يلا انا بسكر توصيني على شي
شهد: دير بالك على نفسك
سكرت عنها و رجعت لهم و هم يخزوني بنظراتهم الغريبه و كأنهم ماسكين علي شي
: اقول الاكل ترا قدامكم مب عندي
سعود: تصدق ما كنت ادري
بعد العشاء أنتبهت لعبدالله و هو جالس عند شبة النار جيت و جلست جنبه و أنا أحط أيدي على رقبته و اسحبه علي كأني أخنقه
: لك وحشه
عبدالله: والله كلكم وحشتوني صار لي فتره عن هالقعدة و السوالف هذي
تمعنت بوجهه: ليش وين كنت؟
عبدالله: صارت سالفه طويله عريضه مالك بوجع الراس خلنا مبسوطين
فارس: أنا احب وجع الراس قول وش عندك
عبدالله: مادري شقولك بس يا فارس من ثمان شهور الحين و أنا أتعالج و ما يعلم بحالي غير الله غبت عن الكل محد يدري عني ولا ادري عن أحد
فارس: تتعالج؟؟
عبدالله: ايوه أتعالج
فارس: عسى ماشر يا اخوي وش اللي صابك
نزل رأسه و هو مو عارف وش يقول
فارس: ارفع رأسك و قول لي
عبدالله: أخوي عرف أني أتعاطى و هددني لو ما رحت معه بيعلم ابوي عن كل شي و أخترت أني أروح معه ولا اقابل ابوي
سكت و أنا أتأمل ملامحه و هو يتكلم و الذكرى ترجعني لورا و اذكر لي صار لي كله مر علي ذاك الشريط و كأنه أمس
: تذكر يوم أخذت سيارتك ذاك اليوم بعد ما رجعتها لك انا اختفيت عن الدنيا ولا ادري وش لي صابني ولا اذكر شي من لي صارلي بس كل لي اعرفه اني كنت اعاني والله اعاني
ماقدرت أتمالك نفسي و مسكته بحلقه و انا أتذكر كل لي صار مر قدام عيوني كل لي صار و كيف انضربت من ابوي ذاك اليوم
: على بالك بس انت الوحيد لي يعاني من ذاك اليوم على بالك لي صار ما ضر غيرك انا فقدت كل شي احبه بالدنيا و السبب أنت فقدت كل شي أملكه و السبب انت ولا انت داري عن شي انا انطردت من البيت شكوا فيني شكووووا فيني و ليتها جت على هذي حتى أخلاقي انشك فيها ابوي لي هو ابوي ما يطالع بويهي
نادر جا و هو يمسكني و يبعدني عنه مسكني بقوه
عبدالرحمن : شو فيكم شو لي صاير توكم حلوين
عبدالله بصوت أشبه للبحه: والله يا فارس اني ما ادري عن ولاشي والله يا فارس أني ما اتمنى لك الا كل خير توني ادري عن وضعك توني اعرف كل لي صار لك أعذرني يا اخوي اعذرني
