ماعاد ابا افكر فيها ولو للحظه ودي أشيلها من بالي ب أي طريقة قمت اتكلم مع نفسي بدون لا أحس
: اهخ يا روان ياحر قلبي حراه
قمت أشعر دون ما أحس
الحزن فيني قد وصل آخر الكون
فيني عتب عيت عيوني تشيله
ماعادها نعسى مثل ماتحبون
كلي ملام و خوف من أشتكي له؟
. .
من هو ينسيني بأكون ممنون
أمشي و أحس الأرض هذي ثقيله
كن الأوادم فوق قلبي يمشون
قمت من مكاني بتقرب من البحر وسمعت شهقه بكاء وراي التفت علطول و انا أشوف شهد عيونها ممتليه دموع ووجها أحمر اول مالفيت صدت بوجهها كأنها ماتبيني أشوفها و هي تبكي
فارس: انتي من متى هنيه؟
شهد: فارس شاركني حزنك شاركني لاتكتمه بقلبك فارس انت قاعد تدمر نفسك دون ماتحس! لازم تشارك حزنك مع أحد فارس انت لازم تعرف شي ان الله يختبر صبرك بكل شي قاعد تمر فيه ولازم تعرف انه لكل شي فرج و ان فرج الله قريب بتقول انا ماعرفك صح؟ يمكن صح فعلا ماعرفك ولا اعرف شي عنك لكن لي اعرفه ومتاكده منه انك ماتستاهل لي يصيرلك و ان قلبك يستاهل من يدير باله عليه و مب لقافه مني اباك تشاركني حزنك وضيقتك لكن ابا اريح قلبك ب اي طريقه و اي واحد بمكاني كان بيسوي هالشي لك
فارس: لي لمفروض يدير قلبي يا شهد رماه وداس عليه بكل برود! و من رايي افضل شي انه هالشي يكون بيني وبين نفسي ليش اكدر لي حولي انا تعودت على هالشي بس الشخص الوحيد لي كان يقدر يطلع لي فيني هو نادر اخوي بس خلاص ورمت راسه من كثر الاشياء لي قاعده تصيرلي ورا بعض
شهد: بس انت تدري انه غلط لي تسويه فنفسك؟
فارس: لاتضغطين علي
رن تلفونها وتغيرت ملامح وجهها ولفت عني بضيقه بترد على الاتصال
: الو هلا يدوه خير ان شاءالله زين زين انا بالجامعه بكلمج بعدين يدوه الله يهديج مب وقتها
كنت مركز على كلامها واضحه الضيقه بصوتها وهي تتكلم و استغربت اكثر انها جدتها وتكلمها بالطريقه هذي شي غريب بس بعد مالي دخل دقايق و قفلت عن جدتها سويت نفسي مشغول بتلفوني و انا اذني عندها
شهد : اهخ يارب صبرني على هاليوم يارب انه يعدي هاليوم بسرعه
فارس: شصاير؟ شفيه اليوم
شهد: سالفه طويله مابزيدك يكفيك لي فيك
فارس: زين لي يريحج
شهد: فارس بسألك سوال صغير اذا ممكن
فارس: اساليني
شهد وهي متردده: مممم منو روان؟
فارس: سالفه طويله مابزيدج يكفيج لي فيج
شهد: ترد فيني الحركه يعني؟
فارس ببراءه: انا؟ لا لا
شهد: زين انا بمشي
كنت اشوف موج البحر ونسمات باردة تضرب على وجهي رديت عليها دون مالتفت
: الله معاج
شهد: قبل لا أمشي انت بخير؟
فارس : قبل لاتوجهين السوال لي وجهيه لنفسج ويهج معتفس من اليوم
شهد: لاتتكلم وكأنك تعرفني
فارس: و انتي لاتتكلمين و كانج تعرفيني
شهد بنرفزه: انااااا شو مقعدني للحين خل امشي
فارس: هذا و انا ماقلت شي وتنرفزتي مني انا لي بمشي خلج
و مشيت عنها و أنا أدق على نادر يجي يأخذني مارد علي ورجعت أدق مره ثانيه و رد علي
: نااااادر انت وينك عن تلفونك الشغل ماجاك الا يوم احتاجك؟
: مرحبا فارس
كنت أدقق بالصوت و أحاول أركز اكثر هذا الصوت لي قادر بأنه يقلب موازيني من كثر الشوق له
: فارس انت معاي؟
غمضت عيوني وفتحت
فارس: معاج يا أمي طمنيني عنج عساج بخير
ام راشد: ماعليك من حالي طمني عليك انت شمسوي شخبارك ووين دارك
فارس: الحمدلله عايشين
ام راشد: فارس يا أمي سامحني انت تعرف لوضع
فارس: يا أمي تراني مب زعلان وعاذرج على كل شي يكفيني انج انتي بخير
كان الشوق يقطع قلبي بس عجزت اتكلم و اقولها وافضفض نفس ما كنت اسوي دايم عندها عجزت اقولها " يا أمي مادريت أنه الشوق غلاب يا أمي مادريت اني بفقدج و انتي موجوده ولا كان مافارقتج دقيقه "
ام راشد: ناقصك شي؟
فارس بصوت مبحوح: ناقصني وجودكم
ام راشد: الحال بيزين و انا أمك تصبر
فارس: نادر حولج عطيني اياه
قامت أمي و هي تنادي على نادر دقايق و جا نادر
: ها فارس
فارس: ويييينك انت عن تلفونك؟ احس اني بطلع من التلفون وبضربك على عينك لمهم اسمعني مرني الحين انا عند البحر ولتطول علي
نادر وهو ياكل: ليش شو عندك
فارس: نااادر لاتستفزني وقاعد تاكل بعد! اقول اذلف بس
وسكرت التلفون فوجهه وبديت أمشي و المطر كل ماله يزيد وصوت المطر و الرعد كان كفيل بأنه يغير مزاجي توجهت لمطعم قريب من البحر وطلبت لي قهوه كنت أتامل الجو وقطرات المطر على زجاج المطعم و كنت أفرفر أشوف السنابات شوي و أشوف أشعار الواتساب
" يا جماعه الخير بكره ملكتي و كلكم معزومين ولي يتعذر اقولكم من الحين مو محلله "
كانت الرساله من محمد مرسلها بقروب العيال حسيت أطرافي انشلت زادت نبضات قلبي ضغطت على إيدي بغضب و انا متاكد من شي واحد انه هو متعمد يستفزني متعمد يعذب قلبي متعمد الحركه لي سواها متعمد انه يألمني بالطريقه هذي
