فجاه سمعنا شي طاح بالغرفه و سوا صوت بالارض أرتبكت و هم مستغربين شو لي طاح او بالاصح كيف طاح
راشد باستغراب: حد بالشقه يا فارس؟
فارس: لا طبعا بس شريت قطوه امس شكلها طيحت شي بالغرفه لمهم ايوه كمل
نادر كان يتفصحني بنظراته كأنه عارف انه شي وراي..
" شهد "
كانت دموعها بعينها و الخوف مالي قلبها كانت ترجف دون ماتحس من الموقف لي حطت نفسها و من اصواتهم لي واصله لها للغرفه كانت خايفه بأنه يعرفون أنه فارس معه حد بالشقه و كيف بيكون موقفه قدام اخوانه كانت تتامل الغرفه و تشوف التسريحه لي فيها انواع و أشكال من العطور قامت و هي تحاول تنسى خوفها أخذت واحد من العطور و هي تشمه و ترش نفسها منه دون ماتفكر بشي كانها كانت تبا تاخذ شي معاها يذكرها بفارس و تحس أنه قريب منها غمضت عيونها و هي تتذكر الموقف و هو واقف قدامها مصدوم من وجودها و أنه هالمده كلها كانت هي لي تحط الاكل و فجاه طاح العطر من إيدها خافت خافت من فارس يدخل فجاه و يهاوشها شو ممكن يصير و كيف بيتصرف فارس راحت و قعدت على السرير و هي تغطي وجهها و تحاول تكتم شهقاتها ماتطلع أخذت المخده ودفنت وجهها و هي تبكي... سمعت فتحت الباب ورجعت ظهرها لورا و هي خايفه شافت فارس و أبتسامته الواضحه و هو يناظرها
: أهدي يا شهد ماصار شي
شهد كانت واضحه عليها الرجفه
: الحين ليش كل هالدموع و الخوف؟
شهد: خفت يا فارس خفت تنكشف و يعرفون أني انا معاك فارس شو بيكون موقفك شو بيكون موقفي؟ فارس خفت تدخل علي و أنت تهاوش اني ماكنت هاديه مثل ماقلتلي خفت والله خفت
فارس: لاتخافين صرفتهم قلت لهم ان عندي قطوه و تلعب اكيد طيحت شي
شهد وسط دموعها أبتسمت على تصريفته : قطوووه؟ مالقيت غير القطوه
فارس: شسوي بعد مالقيت تصريفه بس تبين الصدق؟ عندي قطوه و أحلى قطوه شافتها عيني
شهد: وينها
فارس: هذي قدامي
شهد: وع
فارس و هو يشوف الساعه: يوووووه تأخرت أنا هالمره احمد بدون تفكير بيطردني اسمعي بعد ماطلعين اقفلي الباب و حطيه تحت الفرشه لي عند الباب
شهد هزت رأسها له بأنه تمام و هو طلع عنها مستعجل رايح لدوامه نزلت عيونها للعطر لي تحت رجولها و هي تنزل له و تفكر بأنها تشيله دون مايدري
: اكيد مابيضيعه على كثر عطوره بيضيع هذا ماظن
و أخذته معاها و هي تقفل الباب و تحطه تحت الفرشه نفس ما قالها و نزلت لسيارتها و شافت العنود حارقه تلفونها من الاتصالات و رجعت تتصل لها علطول ردت
: انتي ويييين الكوفي و ما لقيتج و الجامعه و انتي محد وينج لتجلطيني ولا بعد فارس مب موجود لتخبلين فيني يا شهد
شهد: اعوذ بالله استلمتيني علطول حبه حبه علي
العنود: شهود سالتج انتي وين؟
شهد: لتسالين انا وين أساليني عن الاكشن لي صارلي
العنود: شو الاكشن لي صار؟
شهد: عنوووووده فارس عرف أني انا لي احط الاكل تكفين تمنيت الارض تنشق و تبلعني! عنوده احس كنت بموت
العنود: شافج؟؟؟ كيف بالعاده يطلع متاخر شصار اليوم ولا انتي تاخرتي
شهد: لاا ماتاخرت بس هو طالع بدري و تصادفنا
العنود: وشو صار ليش تاخرتي؟
شهد: اغمى علي و الاكل طاح علي ماصحيت الا بالكنبه اللي بشقته
العنود: دخلتي شقته؟ صاحيه انتي
شهد: عنوده ترا والله اني مادري عن شي ولا ادري كيف دخلت
العنود: ماقول غير الا الله لا يحطني مكانج
" فارس "
مر اليوم سريع و خلصت دوامي و أنا راجع للشقه و عيني على تلفوني أفكر بيني وبين نفسي هل اتصل؟ و اطمن عليها ولا شسوي ولا أرسل لها مسج كنت محتار مادري شسوي كنت أتامل رقمها و أخر شي قررت بأني أتصل لكنها ما ردت وصلت الشقه و نزلت و أنا أشوف نادر سابقني للشقه
: كيفني و أنا حافظ موعد رجعتك؟
و أنا افتح باب الشقه
: أكيد وراك شي
نادر: لا وين بس جاي اشوف قطوتك
ابتسمت و دخلت الشقه و أنا اقعد على الكنبه
نادر: شفيك تتبوسم وينها؟
فارس: بقلبي
نادر: خلني اتكلم هالمره جد منو كان عندك فالشقه يا فارس؟ لاتتوقع انه تصريفتك بتمشي علي يمكن مشت على راشد لكن انا مستحيل
فارس بهدوء: شهد
نادر: شهد؟؟ فارس انت مستوعب وش تقول
فارس: ترا مو مثل لي فبالك كل شي صار صدفه
نادر بعصبيه : صدفه و هي معاك بالشقه فارس لاتلعب بأعصابي انت صاحي تجيبها للشقه؟ فارس لاتخليني اغير فكرتي صوبك
فارس: انت يعني ماتعرفني يا نادر؟ شوو لي يدور فبالك ابا افهم ترا طلعت شهد لي تحط الاكل و الصبح كنت طالع للدوام و طلعت بوجهي و طاحت علي و دخلتها للشقه يعني شو كان لازم اتصرف اخليها طايحه برا؟ و يشوفونا الجيران؟
نادر: شهد ماغيرها لي مع العنود؟
فارس: ايوه
نادر: شي غريب
فارس بتقليد: فااارس لاتخليني اغير فكرتي صوبك يعني ماتعرفني ها ماتعرف اخوك؟
نادر: فارس ترا صدق فعلا لي يسمعك يفكر بأفكار مايبي يفكر فيها.. لمهم خلني أقولك
فارس: ايوه قول
نادر: خليت أمي تكلم ام العنود و تخطبها ماقدر اصبر اكثر الصدق
فارس: ماشاءالله خلصت امورك
نادر: انت و شهدك مامنكم فايده لو تميت عليكم ماخطبت
حطيت أيدي على كتفه و ابتسمت له
: الله يكتب لك اللي فيه خير ياخوي
نادر: فارس بقولك شي بعد بس بشرط ماتزعل مني
فارس: شو صاير؟
نادر: انا كنت عارف أنه شهد لي تحط الاكل
فارس: و انت شدراك؟؟
نادر: تصادفت مره مع العنود و هي تحط الاكل بدل شهد و من ذاك اليوم انسرق قلبي كان ودي اقولك بس سكتت
فارس: كذا نظامك يا نادر؟ و مخليني على فضولي دون ماتفكر و تقولي هين
تقدم نادر و هو يحط أيده على كتفي بمزح
: احسن اني ماقلت عرفت انت بطريقتك
و يغمز لي مرت دقايق و انا و نادر نسولف و ناخذ علوم بعض الا شوي اشوف أشعار منها
أبتسمت و انا أفتح الرسالة
