القلب مايشاور😂❤الجزء 6
بقلمي: #وفاء_ السمري
اما عند لالا سكينة ليالله بدات تفيق تتسمع غير صوت دجاج مصبح بدات تتحل فعويناتها مكمشة وجها من شعا ديال شمس حايدات لمانطة وناضت مشات باش توجد لفطور دارت بغيريرات فيهم عسيلة وزبيدة لمنضر ديالهم تيشهي طيبات داكشي سمعات صوت ديال عمها كيعيط عليها مشات عندو لبيت كان شاد واحد راديو قديم تيخدم بالحجر كلو مخرشش والصوت فيه تيتقطع ولانطير تاعو تقب بيه طبقة الاوزون مرة مرة يجمعها معاه بخبطة تا يرجع يخدم تاهو مولف عليه وعارف قوالبو شوية تا سكت بدا تاني تيحرك فيه هزو لعند ودنو تيخبط فيه والو قلبو وهو يجبد ليه لحجرات وبدا تيعض فيهم بسنانو لي نصهم طايح رجع ركبهم وهو يخدم قاد القناة تاع عطير ريحة لبلاد وبرك يتصنت ليه
سكينة: عمي شساير دير
عبدالحق:على السلاااامة فاش فقتي من صباح وانا نتسنا فيك ونتي لا فقتي
سكينة:سمح ليا اعمي راه دبا كنوجد لفطور انا نمشي نجيب اتاي ونجي مشات جابت صينية بنعناع ريحة ديالها تشهيك
جلسات على الكرسي لي مصاوب بالخشب والدوم تستاراح
العم هز واحد السريح تاع النخل مقادو تينش بيه الدبان ضرب بيه فالارض:اريي مناكلو قبل مانخرج ونتي كيف ديما سيري عاود شوفي دوك نعيجات ووكليهم عفا بنتي
سكينة:كون هاني اعمي غنمشي عندهم حكاا نسيت فاش تكون راجع طرك مول لحانوت رله لبيض تقادا
العم حط الراديو و جمع النوضة كيلبس فجلابيتو وفمو باقا فيه لماكلة
العم:وجه المحااين متنفعي متضري كي حليب حماارة جيليه نتي اييخ شنو اخر بغيتي غير البيض صافي نوضي بعد طيبي لغدا ولا ياكما نديرو ليك انا
سكينة:واخااا هاهي ناايضة
خرج وهي ناضت شعلات الكانون بالعواد وتخشات فالكشينة كتوجد الغدا...وجداتو خلاتو فالكانون على المجمر يطيب على خاطرو وخرجات هزات الراديو بغات تخدمو خدم شوية وهو يسكت حطاتو بحال الا عمرها قربت ليه ليجي عمها يحيح عليها
بقات تضور فيعينيها وهي تنوض تنكس الدار وتجمعها بينما طاب لغدا بقات كالسة تما مربعة رجليها...حتى دخل عمها حطات الغدا تغداو وتلاحو ضروري من القيلولة. .. ماناضت تالحال بدا يضلام .. عمرو اتاي وجلسو عليه
العم كيسكح فاتاي ويهضر:اييييه ا ليااام. . باقي نعقل على بووك الجييلالي الله يواليه برحمة الله....نهار حطك بين هاد ليدين (وضرب فدراعو وهي متبعة معاه عينيها مغرغرين) قاالي تهلاا فييها. ..لاوقعات ليا شي حاجة بنيتي اماانة عندك. .فحالا كان حااس اجلو قرب...اما موك فطومة غابزلاتك وهربات....مادقتي حليبها كاع. ..تبعت داك الشييخ هربت معاه لاباقا حية الله يلكيها ليها كحلة زحلة ولا ماتت لهلا يرحم فيها شي عضم...( وهز كاسو يشرب منو وهي مدات يديها مسحات دموعها وناضت )
سكينة بصوت منغنغ بالبكية:هانا غنخرج شوية يضربني الغربي
عبدالحق:ماتبعديش على العتبة ها ودني يمشي يكوشك شي حد.....
أنت تقرأ
القلب ومايشاور❤️مكتملة❤️
Romance💎مكتملة💎 ❌حصرية على الواتباد❌ 🌟القلب و مايشاور 🌟 🌟رمضان كرييم على جمييع المسلميين 🌟 🕯ايوا كيقولو ناس زمان " القلب مايشور " كانو المغاربة الحرار و الرجالة الكبار لي بشلاغمهم لابغاو مرة الدااار لي تصونهم و تصون عراضهم مايقربوش لبنت المدينة و ل...
