سكره

سكره ٣٥

سكره ٣٥
********
بعض الأدعية لهداية الأبناء بإذن الله -تعالى-: (ربنا هب لنا من أزواجنا وذريّاتنا قرّة أعين واجعلنا للمتقين إمامًا)
اللهم أحفظ أولادى من كل شرء وسوء وأكفهم شر تلقب الدنيا وحوادثها
اللهم اهدِ أبنائي، وثبّتهم على الصلاة، وأقمهم في طريق الطاعة. اللهم اجعل أبنائي هُداةً مُهتدين، وارضَ عنهم، واغفر لهم، وأصلح حالهم. اللهم إنّي أسألك أن تهدي أولادي وأن تفتح لهم طُرق الخير، وتُرشدهم إلى سُبل الفلاح والفوز في الدنيا والآخرة. اللهم اهدني وأبنائي فيمن هديت وعافني وإيّاهم فيمن عافيت، وتولّني وإيّاهم فيمن تولّيت، وقِنا شرّ ما قضيت، تبارك ربّنا وتعاليت
. من أجمل الأدعية  لاتنسوها
اللهم بارك لي في أبنائي، وارزقهم تقواك وخشيتك، وأقرّ عيني بصلاحهم وهدايتهم والتزامهم بصراطك المستقيم. اللهم اجعل أولادي من الهداة المهتدين المتمسّكين بسنّة نبيّهم عليه أفضل الصلاة والسلام.
اللهم صل وسلم وبارك على سيدنا محمد وعلى آله وصحبه أجمعين
❤❤🧡🧡🧡🧡💛💛🧡🧡💛💚💚💙💙💙💙💜
فتحى بيتكلم بعصبيه : إهدى شويه أنا اسبوع لا عارف أنام ولا أكل ولا مرتاح الله يسامحك يا محمد كنت خليها تقعد معايا وتبقى تحت عيونى بدال القلق إلا إحنا فيه
محمد ماسك دماغه : أرجوك يابابا ما تقطمنى أنا فيا إلا مكفينى بتحرق من جوايا ومحدش حاسس بيا وضعى كله صعب قدرو حالتى
فتحى بزهق : خلاص أقفل مش قادر أتكلم معاك فى حاجه روحى رايحه يابنى
محمد : خلاص ماااشى .. ساب المستشفى ومشى كلم شخبوط وركب معاه وراحو يخلصو إجراءت سفر محمد بعد ما شخبوط أتوسط له فى المستشفى خلصو وراجعين مع بعض الاتنين محمد أتحايل عليه يطلع معاه رفض فاطلع لوحده لقى نورا واقفه برا ومعاها مهند وأتكلمت بقلق شديد : فى أخبار عنهم يادكتور محمد
محمد بتعب شديد : لاء مفيش أى أخبار لسا
مهند بزعل : إنشالله ربنا بيطمنك عليهن بكل صلاه راح أدعيلهم ينجيهم
محمد من قلبه : ياااارب
نورا بقلق شديد : بجد نفسى أسافر معاك بما انك نويت تسافر قلبى واكلنى عليهم حتى التليفون مفيش مكالمه تطمن الواحد منها
محمد بتعب : ربنا يستر .. بعد أذنكم
مهند  : دكتور محمد تعى كلك شى لقمه والله ما بينفع هيك 
محمد : الف شكر مليش نفس والله .. بعد اذنكم وسابهم ودخل جوا .. أول مادخل قعد على الكنبه وماقدرش يتمالك نفسه كل إلا جاى علييييه عياااط وبس الوقت بيمر عليه ببطئ شديد نفسه فى اللحظه دى كل حاجه تقف فى العالم .. عشان لو هما فى أزى يقف .. حد بيعمل أو ناوى يعمل حاجه تقف .. لحظه زمنيه صاعبه  بتمر بتقل على قلبه وعلى نفسيته .. نايم مغمض عيونه ودموعه نازله وكالعاده بيفتكر كلام مختلف حصل ما بينهم أو مواقف بيستغربها ومش فاهم إن لها وقت بتتفسر وبنفهمها كووويس
فلاش باك
**********
محمد داخل من باب الشقه وبيزق مليكه وبعصبيه : أتفضلى ياهانم أنتى مس هاتخرجى معايا تانى أنسى خلاص أخر خروجه
مليكه بعصبيه : لاص يا حمو مش روح معاك روح سكر هنا روح هنااا لاص
محمد رفع حواجبه : أنتى بتعلى صوتك على  بابى وكمان مش عاجبك ياله على جوا وفى عقاب على أسلوبك .. أتكلم بغيظ وبيبص لسكر الا بتضحك من تحت لتحت .. وخلى سكر تنفعك وورينى هاتوديكى فين ولسا يا مليكه هانم بابى مبقاش له لازم
مليكه  :  لازمن بابى هو قول لاص خرجيش .. شاورت على سكر .. روح معاك اخرجيش لاص نام معاك .. أقعدى معاك .. كل معاك .. كله معاك
محمد بيمشى إيده على دقنه : يعنى افهم إن سكرا هانم منين ماتروح أنتى معاها ماهو دلوقتى بتخرجى معاها وتاكل معاها وتنامى معاها وكله معاها صح
مليكه قربت منه : اه أنتى معاها روح مكان حبك يابابى .. حب سكرا وراحت لزقت فيها .. حبك تاالى .. وحبك تالى .. وحبك تالى...
محمد شهق وحط إيده على قلبه :  يعنى كمان فى الحب بتحبيها تلات مرررات ماطمرش فيكى كل السنين ولا كل الحاجات ولا كل الرعايات .. بينطر إيده .. روحى أنتى وسكر مطرح ماتروحى دانا لو مربى قطه هايطمر فيها
وسكره ميته على نفسها من الضحك منهم الاتنين طول الطريق يتخانقو فى العربيه عشان محمد عايز مليكه تنزل معاه لوحدهم وهى مش راضيه من غير سكررر
باااااك
*******
محمد ومازالت دموعه نازله : كنتى مقرره تسبينى يا مليكه وتروحى معاها فى أى مكان هى فيه  وروحتى أنتى وهى وسايبنى أموت فى كل لحظه من قلقى عليكو ... فتح عيونه وباصص لفوق .. يارب طمنى عليهم يااارب
**
منى خطيبة يونس عرفت من زنوبه إن سكره بقالها أسبوع مايعرفوش عنها حاجه لما فتحى راح لهم وقال لأبوها وبيسئله عن أى مكان ممكن تكون فيه بس زيد مانفعوش بحاجه .. نزلت شحنت وبتكلم يوونس
يونس : اخيرا افتكرتينى ولا حد منكم فكر يرن رنه واحده بس ويقفل ويحسسنى إنى موجود فى حياتكم
منى : إحنا نقدر ننساك معلش أبويا كان مرخم عليا من بعد أخر مكالمه بينك وبينه
يونس بتفهم : ماشى أنتى ليكى عذرك إنما سكره زعلان منها قوى ولا جاتلى زى ماوعدتنى ولاأتصلت
منى : إيه دا أنت قابلت سكر
يونس بتأكيد : أيوا قابلتها وحكى لها
منى بصوت محشرج  : أنت نازل أمتى
يونس : بكرا إن شاء الله بعد العصر .. مال صوتك وغيرتى الكلام عن سكر ليه
منى : بصراحه فى خبر وحش مش عارفه أقولك وإلا لاء
يونس بقلق : أنتى تقلقينى وتقولى أقولك والا لاء حصل إيه يامنى
منى :  أصل سكره بقالها أسبوع مايعرفوش عنها حاجه والكل بيدور عليها
يونس بصوت خض صاحبه : أنتى بتقولى إيه
منى : زى ما بقولك حماها راح لمامتك وبباك وسألهم عليها وبيدورو لما طلع روحهم مفيش حس ولا خبر حتى بلغو عن إختفائها 
يونس بدء يتخنق : طيب أقفلى
منى : يونس أنا ماكنتش عايزا أقولك بس لما عرفت إنك نازل بكرا أطمنت شويه عشان اقرب حد لها أنت يمكن تعرف أى مكان يدلهم عليها
يونس دموعه نزلت  : لا تعرف حد ولا لها مكان ياريت كانت هربت  من زمان .. حتى بيت عمى إلا فى البلد لايمكن تروح لهم ما بتحبش حد فيهم .. أقفلى سلام
منى : بس .. ما كملتش الكلمه ولقت الخط قفل فى وشها .. فضلت تنفخ وتأنب فى نفسها إنها قالتله كانت تصبر شويه ها يفضل على نار لحد ماينزل من جيشه
أمها : منى .. يامنى
منى : نعم يا ماما تعالى أنا قاعده هنااا
أمها دخلت وقاعده مهمومه : فى حاجه لازم أفاتحك فيها ماهو مش عايز يسكت
منى : خير ياماما  مين دا الا مش عايز يسكت
أمها : أبوكى مصر يفشكل خطوبتك على يونس بيقولى فى عرسان أحسن منه بكتير وأهاليهم محدش بيسمع عنهم حاجه وحشه
منى بدئت تعيط ونطرت إيديها : مليش دعوه أنا عايزا يونس ومش ها أعيش مع حد غيره ..  وبعدين  أبويا  إلا ها يتجوز وإلا أنااا
أمها : ماتزعليش منى أنتى عارفه أنا بحب يونس أد إيه بس أمه ماتتعاشرش ولا أبوه وأنتى يابنتى هاتدخلى فى نفس البيت الا هى عايشه فيه هاتتعبى يامنى ياما ناس أطلقت ومن ضمنهم أم سكر ربنا يرجعها بالسلامه يارب ماشافتش شويه منهم كانت بتصعب على الشارع كله عايزا تعيدى القاره وتعيشى نفس إلا عاشته دا زنوبه دى حربايه قضت على حماتها إلا كان الكل بيستجير منها
منى بعياط أكتر : أنتو مش عارفين بتقولو إيه ولا بتعملو معايااا إيه أنا ماقدرش أستغنى عن يونس ماقدرش ياماما يونس كفايه عندى هو لايمكن هايخلى أمه تدايقنى ولا أبوه طول عمره بيحبنى وما بيقبلش عليا الهوا
أمها : أعمل إيه مع أبوكى مصررررر تسيبيه وتبعدى عنه بيقول مش من توبنا ولا ينفع يكون بينا نسب
منى بصريخ قامت تتنطط : مليش دعوه هو دا إلا أنا عايزاه نش ها أتجوز غير يونس فاهمين
أبوها دخل هجم على الكلمه وأمها وقفت فى النص بينهم : بتقولى إيه يا قليلة الربايه .. على أخر الزمن البنت تبجح وتزعق وتتشرط .. الواد دا لا أنا حابه ولا طايقه هو وأهله إيه يجبرنى أقبل واحد مش هايقدر يفتح بيت ولا هايقدر يعيش مستور  من فضايح أهله كل يوم والتانى
منى بعياط : يابابا يونس غيرهم وبعدين أبوه وأمه بيعملو إيه
ابوها زعق : مطلعين عين بت مسكينه كل ذنبها إنها بنت زيد عايزانى أرميكى وسطهم عيشتى هنا معززه مكرمه طول عمرك تخرجى تروح لحد يصونك وإلا حد يهينك ويفضحك
منى مسكت فى أمها : والنبى ياماما قوليله إن يونس هايصونى وعمره ماهايعمل زيهم أبدا
أبوها على صوته : عايزاه يجيب شقه بعيد عن أهله
منى اتنططت أكتر : يابابا هايجيب منين أنت بتعجزه عن الجواز ليه من يوم ما دخل البيت كل ماتقوله على حاجه يقولك حاضر ياعمى .. خروج لاء بقى لاء .. تيجى لاء بقى لاء .. كلام لاء ومش راضى تشحنلى ليييه كدا
أبوها :  عشان هى دى الأصول ودا الأدب والاخلاق إلا أترببينا عليها يامنى عايزا تصيعى فى الشواع وتتعلقى فى دراع واحد لا هو حلالك ولا محرم ليكى هو دا إلا هايرضيكى بس ما يرضيش ربنااا
منى بعياط مخنوق : منا وهو بنعمل كل إلا بتقول عليه إيه يثبت إنه كويس ويستحقنى وها يحافظ عليا
أبوها : يجيب شقه يا ياخد حاجته ويا دار مادخلك شررر
منى طولت فى الكلمه : أزززاى
أبوها : ماعرفش وسابها وخرج
أمها : بس يامنى يجرالك حاجه
منى بعياط أكتر : يجرالى وإلا أغور فى داهيه أنتو بتعملو معاه كدا ليه حرام عليكو
أمها : أبوكى ماغطلش فكرى فى كلامه هاتلاقى عنده حق ..  ماتزعليش منى لو كانت سكره لها مكان يابنتى ماكنش دا بقى حالها ولا بيدورو عليها فى الشوارع دلوقت   عقلك فى راسك أعرفى خلاصك وسابتها وخرجت ومنى ساعتها حست بالظلم وأد إيه هما جاين على يونس وعليها هى كمان هاتقول ليونس إيه تانى كل يوم طلب جديد وشرط جديد أكيد ها يزهق ويسيبها  هو وساعتها يكون عنده حق
**
مر يومين كمان ومحمد نزل مصرررر .. من اللحظه إلا نزل فيها ما بطلش يدور عليها مع حازم ويسئلو عليهم ويعملو إعلانات على مواقع التواصل وتقريبا بيدخل البيت صدفه .. بعت لها أكتر من رساله أنا نزلت مصر يا حبيبتى أرجوكى لو فتحتى أبعتيلى أجيلك لو زعلانه من مامتك أنا ذنبى إيه موجوع عليكى أنتى ومليكه ريحينى  .. كل لحظه يفتح يشوف قرت الرساله وإلا لاء  والشرطه شغاله من ناحية تانيه عملو تتبع  لرقمها وتليفونها وبمجرد ما يتفتح ها يعرفو المكان بالظبط 
حازم قاعد فى العربيه : دا إيه أبوها دا بجد راجل زباله تخيل ولا بيتحرك من البيت ولا بيسئل رجعت وإلا لاء اخوها قابلينى إمبارح لما روحت أسأل ومن اللحظه إلا قابلنى فيها وهو بيلف معايااا ماقعدش بهدوم جيشه
محمد بتعب : منه لله .. حازم تعالى نسئل على شارع والدتها يمكن حد يدلنا عليها
حازم : يابنى ما الشرطه قلبت الدنيا وفى شباب قالو ركبناها تاكسى وكان شكلها معيط حاولو يشوفو اى كاميرا قريبه تجيب التاكسى او رقمه مالقوش منطقه من برا  مقطوعه بنت لازينه
محمد مسك دماغه بيضغط عليها جااامد : مش قادر خلاص هاتنفجر ..
حازم بزعل شديد : ياريتنى ما سيبتها تمشى بس أعمل إيه غصب عنى
محمد بتأكيد ؛ عارف يا حازم عارف .. ريحنى وتعالى نسئل
حازم أتحرك : حاضررررر  ياله راحو هناك وأتصلو على امجد هو عارف المنطقه أكتر منهم جالهم ومعاه أنس ويونس  والأربعه ماهديوش لحظه واحده وأنضم لهم فتحى لما أتصل على محمد يشوفه فين 
**
فى بيت صغير جدااا وناس بسيطه أو أقل من البسيطه .. قاعده سكره جمب واحده نايمه تعبانه بتئن وبتحاول تأكلها  وتساعدها تقوم أو تتعدل
الست بتعب : شكرا يابنتى شكرا
سكره : الشكر لله .. أبتسمت .  ياله عايزاكى تاكلى طبق الخضار دا كله يا ست فتحيه
فتحيه : تسلم إيدك من ساعة ما دخلتى علينا وأنتى شايله عننا كتير وبنتى بقت تروح المدرسه وبتذاكرى لأبنى .. الله يكرمك ويستر عرضك ويصلح حالك
سكره أتنهدت : يارب
فتحيه : بس أهلك زمانهم قلقانين عليكى طمنى إنك حتى بخير
سكره عيطت قووووى مره واحده لمجرد ذكر إسمهم  : مفيش حد هايقلق غير واحد بس ويوم ما يقلق ها يقلق على بنته مش علياااا
فتحيه مسدت عليها : معلش يا بنتى معلش ياما الدنيا فيها بس أكيد ليكى معزه فى قلوب حبايبك ماتقوليش كدا
سكره بتتشنهف : مفيش ياست فتحيه كتير قوى بفكر أنتحر وأخلص من حياتى إلا زيى عايش ليييه هايستفيد إيه بالحياه يوم ما الدنيا ضحكتلى وأفتكرت إن خلاص ها أعيش زيى زى البنى أدمين طلعت خدامه زى ما أمى قالت .. حتى هو أستندل معايااا ليه كدا أنا لازم أموت ماينفعش أعيش لحظه واحده تانى مش ها أسيبهم هايأذونى أكتر من كدا
فتحيه : لا إله إلا الله ما ياخد الروح إلا خالقها فى وقتها .. حقى أنا إلا أفكر فى الموت مش أنتى .. من يوم ما ولدت أبنى وأنا نايمه النومه دى رجليا مكسره وعايشه على الأدويه والمسكنات عملت أكتر من عمليه ومفيش فايده وجوزى زى إلا فى ساقيه بنام وأقوم على الوجع وأقول ياااارب المرض نهش فى جسمى أربع سنين وجالى قرح فراش ربنا يعافيكى .. بشوف جوزى تعبان وحاطت إيده على راسه من علاجى ومن تعبى وصريخى من الوجع ويقول أعمل إيه أعيش حرامى عشان أعرف أصرف ونتعالج ياااناس .. . أكتم الوجع جوايا وأقوله معلش ..  بنتى كانت قاعده من المدرسه عشان تخدمنى لا دروس ياكبدى ولا راحه عيلتى مدمره بسببى .. قوليلى أنا وإلا أنتى إلا ينتحر عشان حياتهم إلا أدمرت .. بصتلها .. يعنى  نصبر على دا كله وفى الأخر نموت كافرين يبقى عذاب دنيا وأخره الدنيا عذابها هين إلا عذاب الأخره ربنا يعافينا منه ويعافى أولادنا يارب
سكره بإحباط رهيب : بس ربنا ها يسامحنا
فتحيه : ها يسامحنا إننا بنقنط من رحمته .. ها يسامحنا إننا بنستعجل قدرنا بإيدينااا وبننهى حياه هو وهبها لينا  .. ها يسامحنا إننا مش صابرين على بلاءه ياما يا سكر ناس عايشه عيشه ما تتحمليها يوم واحد ويقولو الحمد لله إحنا فى نعمه وأحسن من غيرنا .. بصى بقلبك وجوارحك على باقى نعم ربنا عليكى .. ربنا يباركلك فى صحتك دى بالدنيااا . أنا بتمنى أقوم أدخل الحمام .. بتمنى بس أخدم جوزى وولادى هى دى أمنيتى فى الحياااه .. مسدت على رجليها .. أستغفرى ربنا  وماتيأسش من رحمة ربنا ما ييأسش منها غير الكافرررين  ربنا يعافينا
سكره : ياااارب
فتحيه أبتسمت : معاكى حتت بت سكره ياقلبى تهون عليكى حمل جبااال وكلامها عسل يا خواتى
سكره نظرها راح برا الأوضه وشافت مليكه بتجرى ورا عمار إلا عنده أربع سنين وبتشاكس فيه وأبتسمت .. عمار داخل عليهم جررى ومليكه معاها كنكة القهوه وداخله وراه
عمار بيمسك فى سكر : إلحقنى عايزه تاخد اللعبه
مليكه : لعبى ..  إلعب معانا هناك أجرى معاك بصت لسكر .. أنت أقعد معايا لييييه ( بتقوله دى لعبتى بنعلب بيها بتاخدها وتجرى وبتقول لسكره أنتى بتقعدى معاه ليه .. غيرانه منه )
سكره : مليكه ألعبو مع بعض وبلاش خناقات
مليكه بعصبيه : أنت خانق  ..( هو إلا بيتخانق) .. هو معاك ليييه  .. (هو بيقعد معاكى ).. وبحركه فجائيه منها نزلت بقوتها على راسه بالكنكه .. والواد صرخ من وجع الضربه وعيط
سكره غمضت عين وفتحت عين وحطت إيديها على راسها  : اه ياراسى الكنكه نزلت على راسى أنا حرام عليكى مسكت الكنكه بتاخدها منها ..  دا طنط فتحيه هاتطلع عينك على إلا بتعمليه فى أبنها الواد مش نافع تانى خلاص
فتحيه ضحكت لما عمار أتعدل وبيشد مليكه وخارج معاها على برا  ولا كأن حصل فيه حاجه : دا واد جبله سبيه
سكره : حرام دى هاريه ضرب وهو ياعينى مستسلم
فتحيه : هو إلا جايبه لنفسه مش مبطل ياخد منها حاجتها ويجرى ويخبيها قرررد مش عايزا أقولك قبل ماتيجى  وتمنعيه من الخروج  كان الشارع كله بيشتكى منه وكل دقيقه والتانيه يجى جرى ووراه مصيبه لو على ضرب مليكه يبقى رضا قضا أخف من قضااا  دا حتى بندق عامل معاهم جووو قاعدلى على كتف مليكه ولا كأنها أخته
سكره : ههههههه أنتى عسل ياست فتحيه الحمد لله ان مليكه قضا أخف من قضا غيرها عليكى واحده غيرك كانت هارتها ضرب  بس عمتا أنا سايبه بندق يخلص منهم الأتنين
فتحيه : هههههه دى بت تضرب لاء هى إلا تضرب بس  ..  بس قوليلى هاتفضلى قالقه الراجل على بنته حتى لو زعلانه منه حرام
سكره افتكرت يوم ما مشيت من عند مهااا ومعيطه وحالها حاااال راكبه التاكسى ومليكه على رجليها
فلاش باااك
*********
صاحب التاكسى من وقت للتانى يبص لها بصات غريبه قوى وهى بتعيط بحرقه وكل ما تفتكر .  أبوها ..  شيرى .  حماتها .. أمها تعيط أكتر وأكتر .. مسكت الفون بتفتح البيانات عشان تقول لمحمد  ويساعدها تروح تقعد فى أى مكان تبعه .. جالها راسايل كتير جدا على الواتس .. بتفتحها أتفاجئت بكذا صوره لمحمد وشيرى وهما بيحضنو بعض وبيبوسها .. وبدأت تعيط أكتر وتنهار أكتر وأكتر .. فتحت الفديو وهى إيديها بتتعرش شيرى نايمه فى حضن محمد على الكنبه وبتقوله أنت هاتعمل إيه مع الزفته إلا معاك أنا مش طايقه من ساعة ما جبتها هناااا هانفضل كدا كتير
محمد باسها من خدها : حبيبى قولتلك هى مش أكتر من واحده بتراعى وبتاخد بالها من بنتى صدقينى أنا ما بكذبش عليكى .. أتعدل وبيبص لشيرى .. وبعدين أنتى بتقارنى نفسك بمين أنسيها عشان عمرها ماهاتاخد مكانك فاهمه انتى إلا فى قلبى وبس
*****
بااااك
****
فتحيه بتناولها مناديل : خدى أمسحى دموعك وإهدى يا حبيبتى
سكره مسحت دموعها : قوليلى أعمل إيه يا ست فتحيه حتى الراجل إلا أفتكرت إنه بيحبنى  طلع بيضحك عليا .. يا إما بيضحك علينا إحنا الأتنين  بعتالى بتقولى عشان تعرفى إنك ملكيش قيمه ومكان فى قلبه زى ماقولتلك محمد ليا أنا وبس يا خدامة بنتى
فتحيه بحيره : والله يابنتى ماعارفه أقولك إيه  عدمها شكلها كياده .. ياجوز الأتنين يا ماشى على الحبلين .. بصى أصبرى ما تتسرعيش ..  ملامح وشها أتغيرت وبدئت تئن بالوجع مفعول المسكن بينسحب  ونسيو الكلام بينهم أو سكره اتلهت إنها تعمل حاجه لها تريحها لحد ما جوزها يجيب لها المسكن وهو راجع .
أنسحبت بمجرد ما جوزها وصل دخلت جوا الأوضه مسكت  التليفون بتردد عايزا تفتحه وتكلم محمد على الأقل  تطمنه إن بنته بخيررر وتبلغه قرارها النهائى فى جوازهم  فتحت الفووون وأول ما فتحته
❤❤🧡🧡💛💚💚💙💜
بقلم : لبنى طارق
💜❤🧡🧡💛💚💙💜
حبايبى انا بعتذر إنى ما ردتش عليكو والله بكتب الحلقه قبل نزولها بالعافيه مسئولياتى كترت جداااا ومش عايزا أقصر معاكو ولا حبيت اعتذر فا بنزلها ماتزعلوش منى .. سامحونى  على اخطاء الكتابه لعدم المراجعه بصوره كويسه