Mga tula, luha at tinta ni Ulan

Bangungot ng kahapon

Naalala ko pa ang huling beses kong nakisalamuha
sa isang lugar kung saan maraming tao ang nakapila
isa ako roon habang pilit na pinapakalma
ang pusong dumadagundong, nagwawala, nagmamakaawa

Puso'y patuloy sa malakas na pagkabog
isipan ay natutuliro, nais nang lumubog
katawan ay nanginginig
kalamnan ay nangangatog

Akala ko ay ayos na
hindi na dinadalaw ng mga bangungot sa aking pagtulog
subalit akala ko lang pala
pagkat hinahabol pa rin pala ako ng bangungot habang dilat ang mga mata

Nais kong lisanin ang lugar
nais kong mapag-isa
subalit kailangan kong tatagan ang loob
para hindi makapinsala

Ang akala kong bangungot ng nakaraan
at ang sugat na dinulot nito ay naghilom na
subalit hindi pa rin pala
at palagi ko pang dala-dala

Hindi ko akalaing ang masalimuot na karanasan
dala ko pa rin ang sugat hanggang sa kasalukuyan
tuluyan man itong maghilom pagdating ng panahon
subalit hindi ng pilat na dinulot ng kahapon

✍ Scarlet Rain| Bangungot ng kahapon