ذات عيون الريم🍷مكتملة🍷

🍷الجزء 19🍷

✨🍷الجزء 19🍷✨
❤🍷ذات_عيون_الريم🍷❤
Hermosa El & Nour Qamar
في بَحرِ عَينيكِ هامّت كُل أشوْاقي
يا رَبةَ الحُسنِ هل تنّويِنَ إغْرَاقي؟

تنهد وطفا التيل ورجع كيكمي حتا الكارو لي مكانش كيكميه بسباب المشاكل تبلا بيه بخ الدخان فالهواء شاف فالكاروا وهو يلوحوا للأرض وعفط عليه برجليه خشا تيليفونوا فجيبوا ونزل من السطح نيشان لبيتوا حتا العشا متعشاهش تسدات ليه الشهية كيفكر ويعاود هامل ولدوا بزاااااف
خاص يديها فيه شوية مع الوقت غيبدا يكبر وهادشي لي فيه هو غيأتر ليه على نفسيتوا

تخشا فبلاصتوا طفا الضوء وهز راسوا للصقف كيفكر ويعاود خدا تيليفونوا مني تفكرها ومع جا يدخل للفايس حتى كيلقاها بلوكاتوا عض على شفايفوا ونطق
عز العرب:هادي راه غتكمل عليا داك الشوية ديال العقل لي عندي غطيروا
(خرج من داك الفايس وداز للتاني دايروا بنفس السمية والكنية عاود كتب سميتها صيفط طلب الصداقة ورجع كتب ليها ميساج)
"علاش كتقلبي فهاد الليل؟؟؟؟"

كانت متكية ومعاجبها حال علاش يخليها
Vu
شكون هو باش يديرها كاااع وفعز سهوتها سمعات تحنحين باها وهي تجمع وجلسات مقادة إحتراما ليه ضارت وارها حتى كتشوف باها ومها جايين قاصدينها والتبسيمة مرسومة على وجهم

عزيز:موو عوينات لاباس عليك؟؟؟
بلقيس(جمعات الوقفة وباست ليه يديه ونطقات بخفوت باش ميكونش صوتها مرفوع قداموا كتحتارموا لأبعد الحدود ):لاباس أبابا ونتا بيخير؟؟؟؟
عزيز:الحمد لله
فردوس:شوفليك الغدارة كتشوف باها وتنسا مها أنا السخارة ديالك أبنت كرشي
(ضحكات لغيرتها وتلاحت عليها عنقاتها باستها فحكنها ونطقات)

بلقيس:حاشا نتي الكل فالكل

عزيز:وأنا
بلقيس(ضحكات غيسطيوها بجوج):نتا العمر كولوا أبابا
(رجعات باست ليه يديه وهو غير كيرضي عليها هادي بنتهم الوحيدة هادي تمرة حبهم لي لطالما صبروا وعضوا فالصبر وربي مخيبهمش وهداها ليهم وغير مزادت رابطة حبهم قوات ضور عليها باها يدوا من جيهة الكتاف وتم غادي بيها للجليسة فين كانت متكية ومها من وراهم هربات ليها الدمعة هاد النهار بالضبط مناش كانت خايفة ولاكن سنة الحياة هي هادي ولابد تاهي ماتروح لدار راجلها تولد وليداتها وتربيهم كيف داروا هوما بجوج تلفت لعندها عزيز وشاف فيها بحنية كأنوا كيطمنها وكأنوا كيقول ليها أجي نهضروا معاها يقدر ترفض كيف مولفة دير ديما تبعاتوا بخطوات هادئة وبلقيس قلبها بدا كيضرب كيضرب عارفة واليديها فاش كيستيوها هاكا كيكون شي موضوع ماشي هو هداك وكأنها حسات بالشيئ لي غيقولوه ليها

جلس وجلسات حداه فردوس وجلسوها هي قدامهم حنحن عزيز واخا قلبوا ضاروا ولاكن ضروري غيجي هاد النهار
عزيز:عارفة قصتي أنا ومك وحافضاها ياك؟؟
(حركات ليه راسها دهابا وإيابا وكأنها كتقول ليه آه)
عزيز:مك النهار الأول مكانتش باغاني كان عندها فالعمر باقي عاقل
15
عام وأنا 28
تعدبات وبكات وعانات فالعام الأول من زواجنا ولاكن ولفات صبرات وكانت نعم الزوجة دارت واليديا بمتابة واليديها فاش كنت نمرض مكتنعسش كنت واحد المريض التخنزيرة مكنحيدهاش من وجهي وهي بدلاتني فهمتي هضرتي؟؟؟
(حركات ليه راسها بمعنى اه وقلبها كيضرب كيضرب كتحس بيه غيوقف هاد المرة كتحس بيها غير كتحس بيها ماشي بحال المرات لي قبل حتى باها أول مرة يهضر بهاد الطريقة ديما كيجي كيقول ليها واحد السيد بغاك لامابغيتيهش منبززش عليك حتاش لحد الساعة كاااع لي خطبوها مكانش راضي عليهم كانوا كيجيوه ماشي بحال بنتوا فالمستوى يا إما مبرهشين يا إما شايف عليهم شي حاجة معجباتوش ولاكن هاد المرة علاش كيهضر هاكا

(تنهد كيشوف فيها سهات عرفها غتكون فهمات الموضوع مسحات فردوس دمعة حارة نزلات مع خدها شدات فيدين بنتها ونطقات بحنية واخا مقاداش)
فردوس:جاو فيك الخطاب اليوم أبنتي والناس لي جاوا الله يعمر ليهم الدار
(يالاه غتنطق حتا كتسكتها مها)
فردوس:الزواج أبنتي معندوش عمر محدد لا بغيتي تزوجي خاصك توصلي للسن المناسب ومع الشخص المناسب وفالوقت المناسب واخا بنت العروبية وكبرت فيها ولاكن راني كنشوف وفاهمة ومنبغيش ليك المضرة راني مربياك بيدي وعاجناك عجين البنت قبل تزوج فهاد الوقت يستحسن تكون بخدمتها تكون قارية وواعية وصبارة حتاش أول حاجة خاص تكون فيك لابغيتي تزوجي هي الصبر خاص تكوني مرأة ديال الدار نقية وكتعرفي تهضري تكوني المرأة لي تحط على الجرح يبرا وهادشي كامل فيك أبنتي

بلقيس(بغصة فقلبها نزلات عينيها للأرض وعاودات طلعاتهم شافت فباها ومها مزيان باها كيبانوا ليها عينيه مغرغرين بالدموع واخا منزلهمش واخا ديك القصوحية كاملة لي فيه ولاكن باين فيه مقصح أما مها خلاص كينزلوا ليها الدموع وتمسحهم شيئ عادي يوقع ليهم هاكا ما هادي الجوهرة الوحيدة لي عندهم ونعمها عليهم الله

تبسمات واخا كتحس بدموعها غينزلوا ولاكن مبغاتش تشوفهم هاكا عضات لسانها وسط فمها كتفكر تنهدات وهي تنطق

بلقيس:من ديما لي كانوا كيجيوا كيبانوا ليكم ممناسبينش ليا غير من نهار خدمت لهنا بلاما نهضر على لي قبل حتاش كنت مزال ممكملاش قرايتي
(تنهدات من أول وجديد وكملات فهضرتها)
طريقتكم فالهضرة هاد المرة كيبان ليا الشخص لي خطبني شفتوه هو الأنسب ليا على الإطلاق من كااااع لي سبقوا شفتوه مناسبني وهو لي يستاهل نكمل معاه حياتي
(نطق عزيز مقاطعها)
عزيز:شوفي أبنتي لامابغيتيش منبززوش عليك

يتبع...