عشكَ عيون الملازم

البارت 17

السلام عليكم
راح اشوفون اشصار بيه وبحالتي بعد هاذ البارت الي اثر عله حياتي تاثير اكبير وخله اثر ابكلبي راح يبده البارت ابكيان وشنو الي صارله
.
ورجعت وياكم ابارت جديد اتمنه تطوني رأيكم ابتعليق😊
.
اتركم ويه البارت
.
.
.
___________________
.
.
كيان
فزيت عله صوت المنبه شفتهة الساعه ب٣الفجر وكمت غسلت ومشطت شعري ولحيتي وبدلت ملابسي لملابس الشغل مالت الملازم وشلت غراضي ونزلت جوه شفت خالتي محضرتلي الريوك وتخدر بالجاي عفت الغراض عله الكاع وكتلهة
.
كيان: صباح الخير يالعافيه
حمديه: هلا صباح الخير يمه شلونك
كيان: لحمد لله
صبتلي الجاي وكعدت كدامي وكالت
.
حمديه: ربي يحفضك ويسترك يا رب ويرجعك بسلام جاه هل فجر يا رب
كيان: انشاء الله يكلبي لا تخافين زلمه الراح ايروح
حمديه: يمه الزلم كلهة تنسحك كدام الموت
كيان: انشاء الله ارجع واوكف كدامج واكلج شوفي حمديه رجعت
حمديه(بضحك):انشاء الله يوليدي
.
.
كيان
خلصت ريوكي وكمت شفت حيدر نزل من الدرج كتله
صباح الخير سيد
حيدر: هلا بحضره الملازم
كيان: اتوقعت متكعد
حيدر: مستحيل لازم اودعك وكبل رحت وحضنت كيان وخرت
كيان: حبيبي انته
حيدر: ارجعالنه ابسلامه
كيان: انشاء الله واذا ما رجعت بعد وصيتك ودير بالك عله البيت ولبنات وامي انته زلمه البيت بعد
حيدر: انشاء الله خير
.
كيان
حيدر شال غراضي وراح خلاهن بالجنطه مالت السياره واني ركبت وشغلت السياره وحيدر فتحلي الباب واني طلعت بعد اتوكلت عله الله واهل البيت
.
.
.
__________________
.
.
فدك
فزيت من نومي مقبوض كلبي وحسيت نفسي خايفه شفت الساعه بال٦ونص الصبح خفت عله اهلي خاف صار شي الهم همه ابغداد بالي بقه يمهم صارت الساعه بال٧ وتصلت عله ابويه
.
.
ابويه حسين: الووو
فدك: هلا بويه صباح الخير
ابويه حسين: هلا بيج شكو ليش متصله هيج وكت صاير شي
فدك: لا ماكو شي بس بالي يمكم اريد اسال عليكم
ابويه حسين: احنه زينين كلش
فدك: هاا لحمد لله
ابويه حسين: ردي نامي بويه احسن
فدك: ايي باي
.
.
سديت الخط وكلت معقوله راح ايصيرلهم شي بعدين لو شنو ليش كل هل خوف يا رب سترك وحفضك النه احمي الكل بهل يوم
.
.
.
______________________
.
.
كيان
وصلت الموصل هستوني دخلته واشوف الخرابه اشونهة كل هاي لبيوت المهدمه وشقق ولمحلات كلهة امفجره ابسبب الدواعش الله يلعنهم مريت من صيطره وكفني الشرطي
.
.
كيان: السلام عليكم
الشرطي: وعليكم شعدك اهنا
كيان: (كبل طلعتله الهويه مالت الملازم وكتله)عدي شغل لازم اروح
الشرطي: يله اعبر وابد لا توكف ولا اتخفف امشي ابسرعتك احسن الك ولحياتك هاذ الدرب خطر
كيان: اوكي مشكور
.
كيان
صدك مشيت ابسرعه بالسياره ابد ما خففت ردت امر من جوه جسر وشفت كوم طابوك عله الشارع ما اكدر امر لازم انزل واشيله كله شفت منا منا اكو درب ما لكيت حوالي الشارع سيارات امفلشه ونزله اكبيره كلش خلت وشلت اسلاحي فتحت الباب ونزلت رحت ابسرعه شلت الطابوك من الدرب ردت ارجع وما احس اله طلقه اجت ابجتفي من الوجع عطت عيطه ورجعت اليوره اشوي وردت ارجع للسياره اجت طلقه ثانيه ابرجلي وكعت بالكاع وكمت ارمي بسلاحي بكل لاتجاهات وكعت عله ضهري انمطلت حسيت اكو واحد اجه من اتجاه راسي سويت نفسي ميت شفته لحيته اطويله وجهة اسوود ولابس دشداشه سوده وهابيه اجه كام ايفتش بجيوبي وذكرت اكو سجينه ابنطروني سحبتهة عله كيف بدون ميحس وكبل ابسرعه ضربته ابطنه بالسجينه وخر من يمي ردت اكوم واروح للسياره ضربني طلقه ابضهري وكعت بالكاع بعد ما اكدر عرفت هاي نهايتي بعد كمت اكول بيني وبين نفسي
.
.
كيان: اشهد ان لا الله الى انته وحدك لا شريك لك
.
وشفت هاذ جاب ابلوكه اكبيره وضربني ابراسي بيهة...........
.
.
.
.
طبعن حدث الي صار ويه كيان مجرد توقع عله اثار التصويب بالطلق ومكان موته
________________________
.
.
فدك
ياا ربي راح ينشك صدري من الخنكه شكو شصاير شنو الي راح ايصير ليش كل هل خوف شصارلي اني كمت ابسرعه غسلت وجهي وتعوذت من الشيطان وكلت يا رب شصاير بقيت كاعده بالغرفه وجت نرجس
.
فدك: نرجس روحي جيبيلي ماي
نرجس: ليش
فدك: شنو ليش غير عطشانه
نرجس: اوكيي باي
.
فدك
راح نرجس كلت لروحي ميصير شي اذا اتصلت عله كيان وسالت عليه خاف صايرله شي اتصلت مجاوب اتصلت مره ثانيه وهم ما رد كلت ابخوف
.
فدك: اكيد السالفه يم كيان اكييد ليش مجاي ايجاوبني اشصارله يا ربي سترك حفضه من كل اذه بقيت حايره مر الوقت اي خبر لكيان ماكو الساعه بال١٠ بالليل كاعده يم كوثر جاي انباوع عله المسلس اتصل الجهاز شفت من كيان كبل طفرت رحت للغرفه الثانيه وجاوبت
.
.
فدك: الووو كيان وينك
سمعت صوت مخنوك مالت ولد كال
حيدر: الووو فدك
فدك: منوو
حيدر: وياج ابن خال كيان
فدك: ايي اي عرفتك وين كيان اشصاير
حيدر: تكدرين تجين ابسرعه
فدك: شنوو وين اجي
حيدر: للمستشفة
فدك: هد حيلي من كالي هيج ودموعي كامت تنزل وكتله ياا مستشفه
حيدر: مستشفه.......... تعالي ابسرعه فدوه لا تتاخرين
.
.
فدك
سديت الخط ورحت ركض لكوثر واني ادموعي تنزل
.
فدك: كووثر فدوه وديني فدوه
كوثر: شنوو شصااير اشبيج
فدك: كياان كوثر اخذيني اله
كوثر: وين اخذجج غيير افهم
فدك: للمستشفه فدوهه كوثرر
احجي واني اطفر من القهر والبجي
.
كوثر: يله ابسرعه اخذج ورد منتاخر ونرجس تبقه بالبيت
نرجس: لييش
كوثر: اكلليي خره وكعدي
.
فدك
ابسرعه رحت ولبست حجابي والبشت بس فوك لتراك وبسرعه رحنه اجرنه سياره ورحنه اله دخلت ركض للمستشفه وسالت الممرضات
.
فدك: وين المريض كيان محمد عصام
الممرضه: بالطابق الثاني الغرفه ٥
.
فدك: ركضت ابسرعه صعدت عله الدرج وشفت والد كاعد عله كرسي يبجي ابهدوأ وصحتله
.
فدك: انته اننته ابن خاله(ابجي)
وهوه حركلي راسه بمعنه ايي
فدك: ويين كيان
اشرلي عله الغرفه الكدامه
.
فدك
رحت وحيلي مهدود اخاف ادخل واشوف شي ما تتحمله اعيوني دخلت وسديت الباب واني مغمضه اعيوني انداريت لكيت ممطول عله السديه ومغطي ركضت عليه سحبت الغطه من وجهة شفت راسه امفلش منضر هزاني هزز ما احس عله نفسي اله صحت
.
.
فدك: (بعيطه وبجي)لاااا كييياان لااا
وكمت الطم عله وجهي حيل وكول لا يا ربيي لاا موو هيج لااا كيااان افتح اعيونك فدوه كيااان انيي فدك فدوه كووم لا تخلينيي افتح اعيونكك ياا ربيي ما تكدر هيج والله كييااان وكمت اضرب ابكصتي حيل وكول
طيح الله حضيي والله اسفه اكعد والله كلشي اتريد ايصيرلك ياا حيلي ياا كلبيي دكعد ولا اتعوفنيي ياا نور دربيي افتح اعيونك يااا الله مشوفنيي ليش هيج يا ربي لييش شمسويه انيي كاضه ايده وفاحطه من البجي ابمكاني نزلت وبس ايده وكلت ابهدوأ
فدوه افتح اعيونك من اروحلهن فدوه يله يا بعد حيليي فدوه لا هيج اسويي
.
وكوثر دخلت
.
كوثر: يله فدك اهله اجو بالدرب
فدك: ماا اريد اهده ماا اريد والله
.
اجه حيدر كضاني من ايدي كومني وكوثر مشتني كوه وخذتني واني نفسي كوه حاملتهة احس كلبي راح ينفجر انشك نصين من الوجع والقهر سال ربي ليش هيج جيصيرلي اني شمسويه حته اجازه بكل هل قهر رجعت للبيت واني موكفن اعيوني من الدموع والبجي كعدت عله التخم نرجس جابتلي ماي كتلهة ما اريد اريد اشوف كيان
كوثر: ششوفي اهله غير اجو
.
فدك
انقهرت وتندمت حيل لان ما سامحته من اجه وعتذر مني جان رجعنه سوه ضرربت رجلي حيل وصحت
.
فدك: ياا ربي باووعلي دخيلك كافي ما اتحمل
.
صارت الساعه بال١بالليل واني بالي كله يم كيان وادعي كون ربي ياخذني ورا ما كدرت اسكت اعيوني من البجي وتمنيت محد ايصير بي هل موقف
.

مرن يومين واني عله نفس الوضعيه وكلساع اكول لاختي كوثر هسه فاتحه عد اهله وزيد بجي اكثرر اهلي اجو اخذوني اني ونرجس ابويه اول ما شافي
.
ابويه حسين: هااي اشبيج فدك
فدك: مريضه اشويي
ابويه حسين: هسه نوصل للبيت واخذي علاج
.
اني بقيت ساكته لان ماله علاج لبكلبي اتمنيت لو مسامحه كيان اشلع كلبي عله مجاي استوعب اشلون هيج صار
اول ما نزلت من السياره مالت ابويه سمعت صوت قران من الجامع كبل ادموعي نزلن وابويه انتبهلي
.
ابويه حسين: اشبيج فك صااير شي احجيي
فدك(ابشهكه وبجي):هااي فااتحه
ابويه حسين: ايي ليش تعرفين الميت
فدك: لااا بس قبضتلي روحيي
ابويه حسين: دخليي للبيت شو دخلي
.
اني ابسرعه دخلت البيت وتمنيت ما سمعت ايشي اشتعلت من جوه احس احتركت ما اتحمل كل هاذ يا ربي اطيتني اكبر من طاقتيي وما احس اله مرت ابويه حجت
.
امي فوزيه: شكوو فدك ليش تبجيين
فدك: يمهه ماا اكدرر والله مختنكه من جوه مشتعلهه ماا اكدرر يا يمهه
امي فوزيه: يمه ابنيتي كافي شو تعالي يمي
.
فدك: رحت كبل هيه كاعده واني عفت راسي ابحضنهة وابجي وهيه تمسح ادموعي وصبر بيه وتقره المعوذات احس نفسي اشوي هدأت ونمت بدون ما احس عله نفسي فزيت عله حركه فوك راسي فتحت اعيوني شفت ابويه يمسحلي ابراسي وكمت كبل
.
ابويه حسين: شبيج يا بويه شصايرلج احجيلي اني ابوج
فدك: هزيت راسي بمعنه لا وكتله مصاير
ابويه حسين: لعد ليش تبجين ومختنكه
.
فدك
ردت الزم روحي بس مكدرت كبل نزلن ادموعي
.
ابويه حسين : شوفي احجي اشبيج
فدك: ماا اعرف مختنكه حييل مقبوض كلبي خاايفهه
ابويه حسين : اذا تبقين عله هاي الحاله لزم اشوفلج شي ايعالجج
.
فدك
بقيت ساكته محجيت شي بس ابجي مر اربعه ايام عله هاي الحاله نفسهة ابويه كال لامي ياخذني الطبيب نفساني بس اني مرضيت لان اعرف ابروحي كلشي ما بيه بس منقهره عله وفات كيان مر اسبوع كامل عله فاتحته واني جنت فوك نزلت رحت كبل لاهلي وكلت لابويه
.
فدك: اتريد ارجع نفس قبل واحسن هم
ابويه حسين: اكيد هوه هاذ الاريده غير
فدك: اريد اروح زياره للنجف
ابويه حسين: شنووو
فدك: ايي اريد ازور الامام علي(عليه السلام)
واني دمعتي ابعيني
.
.
.
.
يتبع في البارت القادم❤
ما اعرف ليش ذاك الوكت كلهن التمن عليه ما سولي مجال اتنفس بس لحمد لله على كل حال❤❤🥀
الكاتبه: ضحى الطائي