လောကနိယာမများကို ဆန့်ကျင်၍ (သို့) ဧကနဒီ
အပိုင်း ၃၃
လေသာပြတင်းပေါက်ရှေ့တွင် သုန္ဒရသည် လပြည့်ဝန်းကြီးကို ငေးမောကြည့်နေပြီး မဏိရဇ္ဇသည်တော့ သူ့ကို အနောက်မှနေ၍ သိုင်းဖက်ထားသည်။
“ လပြည့်ညပဲ ”
မဏိရဇ္ဇသည် သုန္ဒရ၏ ပခုံးပေါ် မေးတင်ထားရင်း ပြောလိုက်သည်။
ဒီအချိန် …. ဒီအချိန် ရောက်ပါပြီရောလား…
အိပ်မက်ငယ်လေးဟာ အချိန်တိုတောင်းလှပါဘိ ။
သုန္ဒရလည်း တွေဝေငေးမောနေရာမှ သက်ပြင်းချလိုက်ပြီးနောက် သူ့ခါးထက်ရှိ မဏိရဇ္ဇ၏ လက်အပေါ် သူ့လက်တို့ကို အုပ်မိုးလိုက်ရင်း ပြောလိုက်သည်။
“ ဓနုရာသီရဲ့ လပြည့်ညလေ ကောင်းကင်မှာ နက္ခတ်တာရာတွေ စုံတဲ့လပေါ့ ကျွန်ုပ်တို့ ဧကနဒီ မြစ်ဆိပ်ကို သွားကြမလား မဏိ "
မဏိရဇ္ဇ အံ့အားသင့်မိသွား၏။
“ သည်အချိန်ကြီး… နေပါဦး ဓနုရာသီ ဆိုတော့ သုန္ဒရရဲ့ မွေးနေ့ နီးလာပြီကော ၊ ဘာလက်ဆောင်လိုချင်လဲ သုန္ဒရ… ”
သုန္ဒရ၏ မွေးနေ့သည် ဓနုရာသီ၏ လဆုတ် ၉ ရက်နေ့ပင် ။ ဤတစ်ကြိမ်တွင်တော့ အတူရှိနိုင်တော့မည် မထင် ။ သူ့အတွက် အချိန်စေ့လေပြီ ။
သုန္ဒရသည် လပြည့်ဝန်းကြီးကို ငေးစိုက်ကြည့်ရင်း မဏိရဇ္ဇ ၏ မေးခွန်းကို လျစ်လျူရှု၍ ထပ်မံပြောလိုက်သည်။
“ သွားကြရအောင်မဏိ ”
မြင်းဇောင်းသို့ရောက်သည့်အခါ ပုံမှန်မြင်းကိုယ်စီဖြင့် သွားလေ့ရှိသော်လည်း သုန္ဒရ အသာပြုံးရယ်လိုက်မိသည်။
“ မဏိ အတူတူသွားစို့လေ ”
မဏိရဇ္ဇသည် သုန္ဒရ၏ စကားအဆုံး ကြောင်အသွားပြီးမှ မထိန်းနိုင်စွာ ပြုံးရယ်လိုက်မိပြီး လက်ကမ်းပေးလိုက်သည်
။ ငွေသော်တာ အလင်းရောင်အောက် လုလင်ပျိုနှစ်ဦး မြင်းတစ်စီးဖြင့်သာ ခရီးနှင်ပုံက နတ်တို့ရေးဆွဲသည့် ပန်းချီအလား လိုက်ဖက်ညီလွန်းနေသလို ။ သို့တည်းမဟုတ် ဝေဝါးပျောက်ကွယ်သွားရမည့် ပုံရိပ်ယောင်တို့ပေလော ။
YOU ARE READING
ဧကနဒီ (Completed)
Romance''မောင်မင်းဟာ ကိုယ်တော်ရဲ့ ဧကနဒီပါပဲ သုန္ဒရ'' ဧကနဒီ ပြည်ဆီ အလည်တစ်ခေါက်သွားကြရအောင်လား💜 ကိုယ့်ရဲ့Ficထဲမှာ ပါဝင်သမျှ အကြောင်းအရာတွေက ကိုယ့်ရဲ့ စိတ်ကူးယဥ်မှု သက်သက်သာ ဖြစ်ပါတယ်..ဒီတော့ အမှားအယွင်းရှိရင် ခွင့်လွှတ်ပေးကြပါနော်။ End Date - 17.9.2023(SUN)
