Veridalia Academy 2: Returned

Returned: Prologo

Nasaksihan ng lahat ang pagbagsak ng Misthaven.

Ang pagkawala ng mga monarka ay nagdulot ng malaking sigalot sa pamumuhay ng mga taga-tubig. Binalot ng yelo ang noon ay matubig at buhay na bansa ng Misthaven.

Sila ang ikatlong bansang bumagsak.

Nadiskubre ng lahat ang lihim ng Verdantia.

Ang pagtataksil ng mga taga-lupa ay nagkaroon ng matinding balik sa kanila. Unti-unting nagkawatak-watak ang kumonidad sa kanilang bansa. Nagkaroon ng mga rebelde. Ang masaganang lupain ng mga Terran ay naging isang mabatong disyerto.

Sila ang ikaapat na bansang bumagsak.

Ngunit kasabay ng pagbagsak ng dalawang bansa, muling naitaguyod ang dalawang nauna pang bumagsak na kaharian. Muling nagbalik ang mga nilalang na iniwan na sa nakaraan.

Sa kanilang pagbabalik, isang panibagong giyera ang magaganap. Mga panibagong lihim. Bagong kamatayan. Bagong pagdurusa.

Hindi sila palalayain ng nakaraan.

Hahabulin sila nito hanggang sa lahat ng lihim ay mabunyag.